ڈپٹی چیئرمین سینیٹ سیدال خان تون ڈی جی نادرا بلوچستان محمد کاشف اقبال ، مسکوہی ڈپٹی کمشنر کوئٹہ سعد بن اسد و سیکرٹری لوکل گورنمنٹ بلوچستان میر عبدالرؤف بلوچ نا اوڑدہی

اسلام آباد۔ 10 مارچ (اے پی پی) ڈپٹی چیئرمین سینیٹ سیدال خان تون اونا ہنکین آ ڈی جی نادرا بلوچستان محمد کاشف اقبال، مسکوہی ڈپٹی کمشنر کوئٹہ سعد بن اسد و سیکرٹری لوکل گورنمنٹ بلوچستان میر عبدالروف بلوچ ئسک اوڑدہی کریر۔ سینیٹ سیکرٹریٹ نا جاری بیان نا رد اٹاوڑدہی ٹی بلوچستان و خاص وڑاٹ کوئٹہ ٹی نادرا نا بابت السی ویل آک، ادارہ نا کارکڑد ، پوسکن آسراتی تا فراوانی و صوبہ ٹی تعلیمی و راجی شونداری نا باندات آتیا سرجمی اٹ گپ و تران کننگا۔دا وخت آ ڈپٹی چیئرمین سینیٹ سیدال خان پارے کہ نادرا اسہ اہم ءُ قومی ادارہ اسے ہرا شاری تے دستاویزآتا وخت آ فراوانی نا کمک اٹ ریاست و الس نا نیام اٹ پت ءِ سوگو کننگ اٹ اہم کڑد ادا کننگ ءِ۔ او زور شاغا کہ بلوچستان نا مرمر انگا و پدسلوک علاقہ غاتیٹی نادرا نا خذمت آتے پین گچین و جوان کننگے تانکہ الس ءِ شناختی کارڈ و ایلو کاغڈ آتا دوئی کننگ اٹ مشکل آتون مون تروئی تمپ ۔او پارے کہ ملک انا پسماندہ علاقہ غاتیٹی و خاص کر بلوچستان نا نادرا دفتر آتیا پوسکن ٹیکنالوجی نا ہتنگ بھاز المی ءِ تانکہ مُر مرانگا علاقہ غاتا الس ءِ ہم ہمو آسراتی دُوبرے ہرا ملک انا بھلا شارتیٹی فراوان کننگ انگ ءِ ، اوناپاننگ ئس کہ پوسکن آ ٹیکنالوجی اسکان رسینگ پدسلوک آ علاقہ غاتا الس ءِ قومی شونداری نا دنگ اٹ اوار کننگ اٹ اہم کڑد ادا کیک ۔اوڑدہی ٹی مسکوہی ڈپٹی کمشنر کوئٹہ سعد بن اسد کوئٹہ ٹی امن وایمنی نا حالیت و ضلعی انتظامیہ نا کنڈ آن السی ویل تا ایسری کن کروک آ گام گیج آتیا حوال تس۔ او پارے کہ ضلعی انتظامیہ شار اٹی امن نا قیام و سرکاری ادارہ غاتا نیام اٹ رابطہ کاری ءِ گچین کننگ کن عملی گام گیج کننگ اٹی ءِ۔سیکرٹری لوکل گورنمنٹ میر عبدالروف بلوچ صوبہ ٹی بلدیاتی نظام ءِ فعال کننگ و السی خذمت آتے گچین کننگ نا بابت معلومداری تس۔ او پارے کہ بلدیاتی ادارہ غاتا کمک اٹ بنداوی آسراتی تا فراوانی حکومت نا اولیت آتیٹی اوار ءِ، و مچ آ صوبہ ٹی سفائی، کُننگ کن ساف دیر، کسر تا گچینی و ایلو شاری آسراتی تا فراوانی کن گام گیج آتے پین گچین کننگ انگ ءِ ۔اوڑدہی ٹی دا ہیت آ امنا کننگا کہ بلوچستان نا پسماندہ علاقہ غاتیٹی نادرا نا آسراتی تا فراوانی و دفترآتا کارکڑد ءِ پین گچین کننگ کن اسیجائی گام گیج کننگک ۔ ڈپٹی چیئرمین سینیٹ سیدال خان دا عزم انا درشانی ءِ کرے کہ بلوچستان نا الس ءِ بنداوی آسراتی ، تعلیمی شونداری و پوسکن ادارہ جاتی نظام نا مون آ دننگ کن غٹ تعلقدار ادارہ غاتون پورو کمکاری ءِ جاری تخنگک۔