اوغاِنستان اٹی فوجی کارروائی تا مسخت دہشت گردآتا رکھوک ہند آتا چٹفنگ ءِ ، پاکستان

اقوام متحدہ ۔ 10 مارچ (اے پی پی) پاکستان پارینے کہ اوغانستان اٹی پاکستان نا انسدادِ دہشت گردی کارروائی تا مسخت اوغان گل زمین آن مروک آ دہشت گردی نا خطرہ ءِ چٹفنگ ءِ ، نئے کہ ایلم اوغان الس نا برخلاف کارروائی کننگ ءِ ۔دا ہیت آتے اقوام متحدہ ٹی پاکستان نا آخبتی مندوب عاصم افتخار احمد تدوک آ دے اوغانستان نا حالیتآتیا سلامتی کونسل نا دیوان اٹیگپ و تران کرسا پارے۔ پاکستانی مندوب پارے کہ بھارت اوغانستان نا گل زمین آن پاکستان اٹ دہشت گردی ءِ تہو تننگ ناپالیسی ءِ دمدستی وڑاٹ بایدے بند کے۔ بھارت طالبان حکومت تون اواری اٹ پاکستان نا برخلاف سرجزآتیٹی اوار ءِ ۔او پارے کہ اوغانستان نا پندار ولے عملاََجتا نمائندہ نصیر احمد فائق اصل اٹ کس اسے نا نمائندگی ءِ کپک، بلکن او بیرہ تیناجند انا نمائندگی ءِ کننگ ءِ ۔ اوپارے کہ نصیر احمد فائق اصل اٹ اوغانستان نا الس نا نمائندگی ءِ کپکانتئے کہ او مستین نا اوغان حکومت نا کنڈ آن مقرر کروک نمائندہ ءِ و ساڑی آ ڈغاری راستی تیان گڈوک ءِ ۔پاکستان مندوب پارے کہ اوغانستان نا نمائندہ نصیر احمد فائق ڈغاری راستی تیان پورو وڑاٹ گڈوک ءِ و او حالیت آتا گڑاس پلو آتیا، خاص وڑاٹ پاکستان نا بابت آن، گچین وڑاٹ تران کرے۔ اوپارے کہ دا ہچ ءُ حیرت نا ہیت اس اف کہ نصیر احمد فائق اوغانستان آن مروک آ سرحدپار دہشت گرد ی نا بارواٹی ہچ اس پاتو، ہرا پاکستان آ شدید اثرشاغنگ اٹی ءِ، ہراٹی ننا شاری، سلہہ بند فوج ، کانود نافذ کروک آ ادارہ و بنداوی پنجر ءِ جانی و مالی نسخان ہرفوئی تمنگ ءِ۔ پاکستانی مندوب پارے کہ جہانی برادری طالبان تے تینا رویہ ءِ بدل کننگ کن موقع و کمکاری نا سلہ خلکوسس، ولے دانا ہچ ءُ جوان ءُ نتیجہ اس مون آ بتنے۔ اوپارے کہ اینو اوغانستان دہشت گرد ٹولی و اوفتا کمکار نیٹ ورک آتیکن رکھوک ہند اس جوڑ مسنے۔