پولیو تور پروگرام نا زالبول آتا جہانی دے انا بابت "فرام رائٹس ٹو ایکشن” نا سرحال آ ن خصوصی ءُ گپ وتران اس اڈہلک

اسلام آباد ۔ 10 مارچ (اے پی پی ) پولیو تور پروگرام(ای پی آئی ) زالبول آتا جہانی دے انا بابت "فرام رائٹس ٹو ایکشن” نا سرحال آن خصوصی گپ وتران اسے نا اڈتننگ نیشنل لائبریری آف پاکستان کرے ۔ دود انا کماشی ءِ وزیراعظم نا فوکل پرسن انسدادِ پولیو و گلوبل پولیو ایریڈیکیشن انیشیٹیو نا جینڈر چیمپئن عائشہ رضا فاروق کرے ۔دا دیوان اٹی پولیو نا برخلاف مہم اٹی اولیکو صف آ کاریم کروک  آ زالبول آتے یکجا کننگا۔ دیوان اٹی ہیلتھ ورکرز، صحافی، مذہبی راہشون و پروگرام نا نمائندہ غاک بشخ ہلکر۔ بشخ ہلوک آک الس نا پت سازی ، غلط معلومداری تا توننگ و ویکسینیشن مہم آتا سرسہبی ٹی زالبول آتا کڑد ءِ تالان کریر۔دا وخت آ عائشہ رضا فاروق پارے کہ پاکستان اٹی پولیو نا چٹفنگ نا مہم اٹی زالبول آک اہم کڑد ادا کننگ اٹی ءُ ۔ او پارے کہ اُرا اُرا غا ہنسا چنا تے پولیو نا پڑی شاغوک آ نیاڑی ویکسینیٹرز، صحافی و مذہبی راہشون آک الس اٹی پت ودی کننگ اٹ اہم ءُ کڑد اس ادا کیرہ ، ہندا سوب آن المی ءِ کہ دا زالبول آتا آزموندہ غاتے پالیسی سازی و حکمت عملی نا بشخ جوڑ کننگے۔دیوان اٹی بشخ ہلوک آک فیلڈ نا آزموندہ غاتے اسہ ایلو تون بشخار اور پولیو نا چٹفنگ نا آخیریکو ریسہ ٹی چندی بشخ آتا نیام اٹ کمکاری ءِ پین جوان کننگ نا وڑوڈول آتیا ہم غور کریر۔دا وخت آ پاننگا کہ مچ آ ملک اٹی پولیو تور نا بروک آ قومی مہم 13 اپریل آن بنا کننگ ءِ  ، دا مکالمہ جان جوڑی، کمیونٹی رابطہ و پت سازی نا بشخ آتیٹی کاریم کروک آ زالبول آتا نیام اٹ تین پہ تینی کمکاری ءِ سوگو کننگ کن اسہ اہم ءُ پلیٹفارم اس پک مس۔