خصوصی کمکار ہارون اختر خان نا کماشی ٹی سمال اینڈ میڈیم انٹرپرائزز ڈویلپمنٹ اتھارٹی نا دیوان

اسلام آباد ۔ 10 مارچ (اے پی پی ) وزیراعظم نا خصوصی کمکار صنعت و پیداوار ہارون اختر خان نا کماشی ٹی سمال اینڈ میڈیم انٹرپرائزز ڈویلپمنٹ اتھارٹی (سمیڈا) نا اسہ بڑزکو کہولی دیوان اس مس۔ دیوان اٹی سیکرٹری صنعت و پیداوار سیف انجم، سمیڈا نا چیف ایگزیکٹو آفیسروسمیڈا بورڈ انا باسک آک ساڑی ئسر۔دیوان آن تران کرسا ہارون اختر خان پارے کہ ڈیجیٹلائزیشن نا کمک اٹ چنکا و نیامی درجہ نا کاروبارنا(ایس ایم ایز) نا  ڈیجیٹل ساڑی گری ءِ سوگو کننگ مریکتانکہ اوفتے جہانی مارکیٹ اسکان رسینگ فراوان کننگ مریک ۔ او پارے کہ ڈیجیٹل پلیٹ فارم آک ایس ایم ایزءِ تینا گڑاتے جہانی کہول آ درستی راستی کرفنگ و برآمد کننگ نا وارخواہی فراوان کیرہ۔او مستی پارے کہ ایس ایم ایز کن اسہ جتا ءُ ڈیجیٹل پلیٹ فارم اس جوڑ کننگ انگ ءِ۔ وزیراعظم شہباز شریف نا وژن نا رداٹ مائیکرو، اسمال اینڈ میڈیم انٹرپرائزز، جیمز اینڈ جیولری و آٹوموبائل سیکٹر کن اسہ جوان ءُ پلیٹ فارم اس جوڑ کننگک۔ہارون اختر خان پارے کہ دا پوسکن آ پلیٹ فارم جہانی ای کامرس ماڈلز نا آب آ جوڑ کننگک تانکہ پاکستانی گڑاتے مچ آ دنیا ٹی جوان وڑاٹ پیش کننگ مرے۔ دا پورٹل آ پاکستان اٹی جوڑ مروک آ گچین و ویلیو ایڈڈ گڑاتے مون آ اتنگک۔دیوان اٹی ہارون اختر خان نا پارت آ دا وژن ءِ عملی دروشم اس تننگ کن اسہ ورکنگ گروپاس ہم جوڑ کننگانے۔