اعظم نذیر تارڑ ءَ دری پالیشی ءِ سر ءَ تبصرہ کنان ءَ آئین ءُ راجی مفاد ءِ ھیال ءَ دارگ بہ بیت

اسلام آباد۔10مارچ  (اے پی پی): کانود ءُ انصاف ءِ وفاقی وزیر اعظم نذیر تارڑ ءَ گوشت کہ پاکستان یک ذمہ وار ءُ جوہری ریاست انت، پمیشکا راج ءُ رسانکدر ءَ میاں اوستمانی معاملہ ھاسیں رنگ ءَ دری پالیشی ءِ سر ءَ وتی ھیال ءُ لیکہ آنی درشان کنگ ءِ وھد ءَ آئین ءُ راجی مفاد ءَ را ھیال ءَ بہ دار ایت۔ سئے شمبے ءِ روچ ءَ پی ٹی وی ءِ بنجاہی کارگس ءَ نیوز کانفرنس ءَ گوں گشتانک دیان ءَ وفاقی وزیر ءِ کانود ءُ انصاف ءَ گوشت کہ پڑ ءَ گوستگیں کش ءُ چیل آنی وھد ءَ پاکستان ءَ مدام متوازن ءُ ذمہ واریں موقف زرتگ۔ آئی ءَ گوشت کہ گلوبل یا دمگی تک ءَ کجام ھم وئیل بوتگ گڈا پاکستان ءَ سفارتی رھبند آنی رد ءَ رد عمل پیش کتگ ءُ دوستیں ملک آنی گوما وتی دیریں سیادی ءَ را ھیال ءَ داشتگ۔ وزیر ءِ کانود ءَ گوشت کہ پاکستان ءِ آئین ءِ آرٹیکل 19 ءِ رد ءَ ھمک شہری ءَ را لبزانک ءِ آجوئی ءِ ھک ھست، البت اے آجوئی ءِ سر ءَ لھتیں معقولیں بندش ھم ایر کنگ بنت۔ اے بندش اسلام ءِ مزنیں بستار، پاکستان ءِ ایمنی، دیمپانی، دوستیں ملکانی گوں سیادی، امن ءُ ایمنی، اخلاقیات ءُ توہین عدالت ءِ وڑیں جیڑہاں گوں بندوک اَنت۔ آئی ءَ گوشت کہ گوستگیں روچ آنی تہ ءَ سوشل ءُ الیکٹرانک میڈیا ءِ سر ءَ لھتیں تبصرہ گندگ بوتگ کہ ایشی ءَ چہ سفارتی تک ءَ ردیں تاثر پیداک بوت کنت۔ آئی ءَ گوشت کہ پاکستان ءِ دری پالیشی ءِ بابت ءَ ھچ وڑیں مردم یا گل ءَ را اے ھک نیست کہ آ ھما بیان بہ دنت کہ دوستیں ملک آنی گوما سیادی ءَ را تاوان بہ دنت۔ اعظم نذیر تارڑ ءَ گوشت کہ پاکستان ءِ گوں خلیج ءُ ایندگہ براتیں اسلامی ملک آنی گوما دہ سال آنی دوستی ءِ سیادی است انت، پمیشکا اے گپ ءِ گشگ کہ پاکستان یک ملک ءِ گوما بہ بیت ءُ دومی ملک ءِ ھلاپ ءَ بہ بیت، نہ آئین ءِ اجازت انت ءُ نہ کہ راجی نپ ءِ لوٹ انت۔ آئی ءَ گوشت کہ حکومت ءُ وزارت ءِ درئی کار پڑ ءَ کش ءُ چیل ءِ کم کنگ ءُ امن ءِ دیمروئی ءِ واستہ وتی وتی ذمہ واری آنی پیلو کنگ ءَ انت۔ وزیر ءِ کانود ءِ رد ءَ مزن وزیر دمگی سروک آنی گوما ھم مُدام رابطہ ءَ اِنت تانکہ جیڈھ آناں ایمنی ءِ گوما گیواری ءِ کوشست کنگ بہ بیت۔ یک جست ءِ پسو ءَ وفاقی کانود ءِ وزیر ءَ الس، اھوالکار ءُ سوشل میڈیا ءِ کارمرد کنوکاں گوں دزبندی کتگ کہ آ وتی ھیالانی درشان کنگ ءِ وھد ءَ آئین ءُ کانود ءِ سیمسراں دلگوش بہ کن اَنت ءُ ھما بیاناں چہ بہ پھریز اَنت کہ دوستیں ملک آنی گوما پاکستان ءِ سیادی ءَ را تاوان بہ دنت۔