5G سپیکٹرم نیلامی پاکستان ءِ ڈیجیٹل آیوکیں وھد ءِ واستہ راجدپتری گامگیج اِنت، پنچ ءُ شش ماہ ءِ تہ ءَ اولی رند ءَ اسلام آباد ءُ صوبائی دارالحکومت آنی تہ ءَ سروسز بندات کنگ بنت، 4G سروسز گہتر بنت، شزہ فاطمہ خواجہ

اسلام آباد۔10مارچ  (اے پی پی): انفارمیشن ٹیکنالوجی ءُ ٹیلی کمیونیکیشن ءِ وفاقی وزیر شزہ فاطمہ خواجہ ءَ گوشت کہ 5 جی سپیکٹرم ءِ نیلامی پاکستان ءِ ڈیجیٹل آیوکیں وھد ءِ واستہ راجدپتری گامگیج اِنت ایشی ءَ چہ ڈیجیٹل رابطہ کاری ءَ را گہتر کنگ ءُ پاکستان ءِ ڈیجیٹل معیشت ءَ را مھکم کنگ بیت، اولی رند ءَ اسلام آباد ءَ سروسز ءِ بندات کنگ بیت نیلامی ءِ چار ءُ پنچ ماہ ءِ تہا 4G سروسز ءِ تہا گہتری ءِ سبب جوڑ بوتگ۔ آئی ءَ اے ھیالانی درشانی سئے شمبے ءِ روچ ءَ نیکسٹ جنریشن موبائل سروسز 5 جی ءِ سپیکٹرم نیلامی ءِ بنگیجی مراگش ءَ گوں تران کنان ءَ کت۔ مراگش ءَ وفاقی وزیر ءِ اھوالکاری ءُ نشریات عطا اللہ تارڑ، وزیر ءِ ھزانگ محمد اورنگزیب، چیئرمین پاکستان ٹیلی کمیونیکیشن اتھارٹی میجر جنرل (ریٹائرڈ) حفیظ رحمان ءَ شریک بوتگ ءُ پارلیمنٹ ءِ باسک آں شریک بوتگ انت۔ شزہ فاطمہ ءَ گوشت کہ پاکستان ءَ گوستگیں وھد ءَ بازیں ٹیکنالوجی ءِ انقلاب گندگ بوتگ بلے ڈیجیٹل ٹرانسفارمیشن ءِ استیں بھر ملک ءِ واستہ ھاسیں رنگ ءَ المی انت۔ آئی ءَ گوشت کہ اے نیلامی ءِ واستہ سپیکٹرم ءِ دستیابی ءَ را دل یکیمی کنگ ءِ واستہ جتا جتائیں ادارگ آناں یکجائی ءَ کار کتگ۔ آئی ءَ گیش گوشت کہ اے دیمروئی پاکستان ءِ واستہ دلبڈی ءِ ساھت اِنت پرچا کہ ایشی ءَ چہ ملک ءَ را آیوکیں نسل ءِ ٹیکنالوجی ءِ نیمگ ءَ رھادگ بیت۔ آئی ءَ گوشت کہ پاکستان پیسریگیں مزن وزیر نواز شریف ءِ حکومت ءِ وھد ءَ 2014 ءَ چہ 2016 ءِ نیام ءَ تھری جی ءُ فور جی ءِ دور ءَ داخل بوتگ ایشی ءَ پد سپیکٹرم ءِ مزنیں نیلامی نہ بوتگ ایشی ءَ چہ انٹرنیٹ ءِ کوالٹی ءُ کارمرد کنوک آنی واستہ جیڈھ پیداک بوتگ۔ شزہ فاطمہ ءَ گوشت کہ اے نیلامی ءَ چہ نہ ایوک ءَ 5 جی سروسز دیم ءَ کیت بلکینگ ءَ استیں 4G نیٹ ورک آنی کوالٹی ءُ گنجائش ھم گہتر بیت ۔ آئی ءَ گوشت کہ تیز، معتبر ءُ ارزانیں انٹرنیٹ نوں شہری آنی بنیاتی لوٹ جوڑ بوتگ ءُ ڈیجیٹل کنکٹیویٹی معیشت، کشت ءُ کشاری، صنعت ءُ راجی سلامتی ءِ وڑیں شوبگ آنی تہ ءَ ھاسیں کرد پیلو کنگ ءَ اِنت۔ وفاقی وزیر ءَ گوشت کہ حکومت ءَ ٹیلی کام انفراسٹرکچر ءِ دیمروئی ءَ را ترند کنگ ءِ واستہ رائٹ آف وے چارجز ھم ھلاس کتگ تانکہ سرجمیں ملک ءَ فائبر نیٹ ورک ءِ دیمروئی ممکن بہ بیت۔ آئی ءَ گیش گوشت کہ زوت راجی فائبرائزیشن پلان ھم بندات کنگ بیت تانکہ ٹیلی کام کمپنی سپیکٹرم ءِ گرگ ءَ پد وتی انفراسٹرکچر ءَ را گیش گیش ءُ گیوار بہ کن اَنت۔ آئی ءَ گوشت کہ نیلامی ءِ فریم ورک سپیکٹرم ایڈوائزری کمیٹی، وزارت خزانہ، پاکستان ٹیلی کمیونیکیشن اتھارٹی ءُ فریکوئنسی الوکیشن بورڈ ءَ ھوار جتا جتائیں ادارگ آنی گوما شور ءُ سلاھ ءَ پد تیار کنگ بوتگ۔ آئی ءَ گوشت کہ میاں اوستمانی ٹیلی کام ادارگ آناں پاکستان ءِ نیلامی ءِ فریم ورک ءِ توسیپ کتگ۔ موبائل ورلڈ کانگریس ءِ وھد ءَ گپ ءُ تران ءِ وھد ءَ لھتیں ملکاں ھم اے بندوبست آنی توسیپ کتگ۔ آئی ءَ گیش گوشت کہ مردم نیلامی ءَ چہ چار ءُ پنچ ماہ ءِ تہ ءَ 4G سروسز ءِ تہ ءَ گہتری گندگ بندات کن اَنت وھدے کہ 5G سروسز اولی رند ءَ پنچ ءُ شش ماہ ءِ تہ ءَ اسلام آباد ءُ صوبائی دارالحکومت آنی تہ ءَ بندات کنگ بنت۔ مراگش ءَ گوں گشتانک دیان ءَ پیسریگیں آئی ٹی وزیر امین الحق ءَ سرکاری ادارگ ءُ سلاہ بندیں اُرد آنی کرد ءِ ھم توسیپ کت کہ آھاں راجی مفاد ءِ واستہ تجارتی کارمردی ءِ واستہ سپیکٹرم ءِ دستیاب کنگ ءَ کمک کتگ۔ آئی ءَ گوشت کہ ٹیلی کام ءِ شوبگ ءِ دیمروئی مزن وزیر شہباز شریف ءِ ’’ڈیجیٹل نیشن پاکستان‘‘ ءِ وژن ءِ بھر اِنت، ایشی ءِ مول ءُ مراد ڈیجیٹلائزیشن ءَ را دیم ءَ برگ، ورنا آناں ٹیکنالوجی ءِ تہ ءَ تربیت دیگ، آئی ٹی ءِ برآمدات ءَ را گیش کنگ ءُ کیش لیس معیشت ءِ دیمروئی کنگ اِنت۔ اے موہ ءِ سر ءَ گشتانک دیان ءَ پاکستان ٹیلی کمیونیکیشن اتھارٹی ءِ چیئرمین میجر جنرل (ریٹائرڈ) حفیظر الرحمن ءَ گوشت کہ گڈی ءَ ھما روچ ءِ دیر ءَ چہ ودار بوتگیں روچ اتکگ۔ آئی ءَ ھما درستیں ادارگ آنی شگر ءُ منت گپت کہ آھاں سپیکٹرم ءِ نیلامی ءَ را ممکن جوڑ کتگ ءُ گوشت کہ سپیکٹرم ءِ دستیابی مستریں چیلنج اِنت۔ آئی ءَ گوشت کہ پی ٹی اے ءُ فریکوئنسی الوکیشن بورڈ ءَ یکجائی ءَ سپیکٹرم ءِ دستیابی ءَ را دل یکیمی کنگ ءِ واستہ کار کتگ، ءُ دوریں دمگ آنی تہ ءَ 5 جی سروسز ءُ نوکیں انٹرنیٹ ءِ آسراتی آناں آرگ ءِ واستہ کار کتگ۔ آئی ءَ 5 جی ءَ را ’’ڈیجیٹل ہائی وے‘‘ ءُ پاکستان ءِ آیوکیں وھد لیک اتگ۔ ایشی ءَ را انجن ءِ رنگ ءَ بیان کنان ءَ آئی ءَ گوشت کہ مرچی نوکیں ٹیکنالوجی ءِ دور ءِ بندات اِنت۔ پی ٹی اے ءِ چیئرمین ءَ گیش گوشت کہ پاکستان ایشیا ءِ اولی ملک جوڑ بوتگ کہ آئی ءَ رائٹ آف وے چارجز ھلاس کتگ کہ پیسر ءَ 36ہزار کلومیٹر ءِ چارج بوتگ ءُ نوں صفر ءَ چہ کم کنگ بوتگ۔ آئی ءَ گوشت کہ حکومت ءَ ٹیلی کام انڈسٹری ءِ کمک ءِ واستہ ھمک رنگ ءِ گامگیج چست کتگ ءُ نوں سپیکٹرم نیلامی ءَ سرگرمیں رنگ ءَ بھر زوری کنگ ٹیلی کام آپریٹرز ءِ ذمہ واری انت۔