مزن وزیر شہباز شریف ءَ راج ءَ گوں گشتانک، 14 ٹکی پیسلہ آنی جار جتگ، سیر لاپیں مردمانی آسراتی آناں کٹ کنگ ءِ پنت ءُ شون

اسلام آباد – 9 مارچ (اے پی پی): مزن وزیر محمد شہباز شریف ءَ ایران، میاں اوستمانی ءُ خلیج ءَ ھوار سرجمیں دمگ ءَ جنگی جاور ھال آنی رد ءَ معیشت ءِ استحکام ءِ واستہ 14 ٹکی پیسلہ آنی جار جتگ کہ ایشی ءِ چیر دستی ءَ حکومت ءُ توانائی ءِ رکھینگ ءِ واستہ کچ ءُ کیل کنگ بیت۔ دوشمبے ءِ روچ ءَ مزن وزیر محمد شہباز شریف ءَ راج ءَ گوں تران کنان ءَ دمگ ءِ دیم ءَ اوشتاتگیں جاور ھال آنی سر ءَ راج ءَ را دلجمی ءِ تہ ءَ زرتگ ءُ سرکاری پیسلہ آنی جار جتگ ایشی ءِ تہ ءَ دو ماہ ءِ واستہ سرکاری گاڑی آنی پٹرول ءِ نرخ آنی تہ ءَ ترندیں 50درسد کمی، سرکاری گاڑی آنی کارمرد کنگ ءِ تہ ءَ 60درسد کمی ءِ پگار ھوار اِنت۔ اسمبلی، گریڈ 20 ءَ چہ گیش ءِ افسر آنی واستہ دو روچ ءِ پگار ءِ کٹوتی کہ آہانی پگار سئے سد ہزار ءَ چہ گیش اِنت، سرکاری محکمہ آنی ھرچ ءُ درچ ءِ تہ ءَ 20 درسد کمی، مزن وزیر، گورنر، سر وزیر، وفاقی ءُ صوبائی وزیر آنی ھاسیں کارگس، سرکاری مراگشانی سرا ھرچ ءُ درچ ءِ کم کنگ، 50% کارمنداں چہ لوگ ءَ کار کنگ ءِ اجازت دیگ، سرکاری کارگساں پنچ روچ ءِ بدل ءَ چار روچ ءِ پچ کنگ، اسکولاں دو ہفتگ ءِ چھٹی، ہائیر ایجوکیشن ءِ واستہ آن لائن کلاس ءُ دگہ بازیں گامگیج۔ مزن وزیر ءَ گوشت کہ مرچی من راج ءَ را خطہ ءِ دیم ءَ اوشتاتگیں سکیں گرانیں ءُُ ھترناکیں جاور ھال ءِ ھوالگ ءَ گشتانک دیان آں۔ آئی ءَ گوشت کہ بد بھتی ءَ سرجمیں دمگ ایشی ءِ تہ ءَ ایران ءُُ میاں اوستمانی تک اے وھد ءَ شدیدیں جنگی جاور آنی آماچ انت ۔ بے گناہیں انسانی جانانی گار بوھگ، آوار جتگیں ھاندانانی رنج ءُ گم ءُ امن ءِ ھترہ مئے درستانی ھاترا سکیں جیڑہ ءِ سوب اَنت۔ پاکستان اے کش ءُ گوریں جاور ھال ءَ وتی وس ءُ واک ءِ رد ءَ جیڈھ آناں شور ءُ سفارتی ءِ وسیلگ ءَ گیش ءُ گیوار کنگ ءِ کوشست کنگ ءَ اِنت۔ دومی نیمگ ءَ ما وتی روکپتی سیمسراں ھم ناشرکاری ءِ آماچ ایں ۔ اوگانستان ءَ ناشرکار آنی آسراتی ءِ ھاتر ءَ نفوذ ءُُ اُرش آنی پسو ءَ مئے سلاہ بندیں اُرد وتی مقدسیں فرض ءَ پیلو کنگ ءَ اَنت کہ آ مھروانیں وطن ءِ ایمنی ءُُ حاکمیت ءِ رکھینگ ءُُ شہری آنی جان ءُُ مال ءِ ایمنی ءَ را دل یکیمی کنگ ءَ اَنت، ایشی ءِ ھاتر ءَ من آھاں سلام پیش کن آں ۔ مزن وزیر ءَ گوشت کہ پاکستان ءِ حکومت ءُ الس ءَ ایران ءَ اسرائیل ءِ زالمیں اُرش آنی آسر ءَ آیت اللہ سید علی خامنہ ای ، آئی ءِ کھول ءُ بے گناھیں ایرانی برات ءُ گہار آنی شھید کنگ ءِ سر ءَ سک باز دلپدردی درشان کتگ۔ ما اے اُرشاں گوں زبردستیں لبزاں مذمت کنیں۔ پاکستان ءَ وتی براتیں مسلمانیں ملک سعودی عرب، متحدہ عرب امارات، قطر، کویت، بحرین، اردن، لبنان، عمان، ترکی ءُ آذربائیجان ءِ سر ءَ اُرش ھم سک مذمت کتگ ءُ جانی تاوان ءِ سر ءَ اپسوز ءِ درشان کتگ۔ اے اُرش سرجمیں دمگ ءِ امن ءُ ایمنی ءَ را مزنیں ھترہ یے جوڑ کن اَنت۔ مزن وزیر ءَ گوشت کہ اے گرانیں جاور آنی تہ ءَ منی اے براتیں ملک آنی سروک آنی گوما سرجمیں رنگ ءَ گپ ءُُ تران بوتگ۔ ءُ من سرجمیں راج ءِ نیمگ ءَ اے ملکانی راج ءُ سروکی ءَ را کلوہ داتگ کہ پاکستان اے آزمائش ءِ ساھت ءَ آھانی ھمراہ اِنت ءُ اے گپ یات دارگ بہ بیت کہ ما اے براتیں مسلمانیں ملکانی ایمنی ءُ برجائی ءَ وتی ایمنی ءُ برجائی ءِ بھر لیکیں۔ مزن وزیر ئَ گوشت کہ مرچیگیں دگنیا ئَ ھما بحران کہ یک ملک ئِ تہ ئَ پاد کیت لھتے روچ ئِ تہ ئَ اے دگہ ملک آنی تہ ئَ ھم پال اِنت۔ عالمی مارکیٹ ءَ خام تیل ءِ نرخ کہ لہتیں روچ پیسر 60 ڈالر ءِ نزیک ءَ بوتگ ات، اناگہ ءَ 100 ڈالر ءَ چہ گیش بوتگ۔ اگاں جاور ھال دیم ءَ ھراب بہ بنت گڑا ھُدا مہ کنت اے نھاد چہ وتی ھکّ ءَ درکپ اَنت کہ چہ ایشی ءَ گیشتر عام مردم ءِ زند ءِ سر ءَ تاوان رسیت۔ مزن وزیر ءَ گوشت کہ مئے معیشت، صنعت، ٹرانسپورٹ ءُ روچ مرزی زندمان ءِ مزنیں کساس ءَ خلیج ئَ چہ تیل ءُ گیس ءِ سپلائی ءِ سر ءَ بندوک اِنت۔ اے گپ ءَ ھیال ءَ دارگ ءَ سرکار ءَ معیشت ءِ استحکام ءِ ھاترا سک باز ھاسیں ءُ گرانیں پیسلہ کتگ۔ چوشیں انتظامی ءُ معاشی پیسلہ کہ آ ہچ وڑ ءَ آسان نہ بوتگ انت۔ ما مالیاتی نظم ءُ ضبط ءَ را گہتر کت، ءُ توانائی ءِ شوبگ ءَ گہتری کار ءِ جار جت تنکہ ملک ءَ را بے مثالیں بحران ءَ را کم کنگ بہ بیت۔ بلے مارا اے گپ ھم منگی اِنت کہ جھان ءِ بازار ءَ تیل ءُ گیس ءِ نھادانی ٹھینگ پاکستان ءِ دست ءَ نہ اِنت۔ وھدے کہ دنیا ءِ تہا تناؤ گیش بیت یا دمگ ءَ جنگ ءِ بندات بیت گڑا ایشی ءِ اثرات توانائی ءِ نرخانی تہا براہ راست گندگ بنت۔ مرچی یک رندے پدا جھان ءِ تک ءَ ھمے وڑیں گرانیں جاور ھال دیم ءَ اتکگ اَنت۔ کہ ایشی ءِ اثر مئے سرا ہم گندگ بوہگ ءَ انت۔ بلے من راج ءَ را دل یکیمی دیگ لوٹاں کہ تئی حکومت گران تریں جھان ءِ جاور ھال آنی باوجود پاکستان ءِ معیشت ءَ را مھکم دارگ ءِ ھاترا ھرچ وڑیں کوشست کنگ ءَ اِنت۔ مزن وزیر ئَ گوشت کہ گوستگیں روچ آنی تہ ئَ تیل ئِ نہاد ئِ تہ ئَ گیشی کہ حکومت ئَ را کنگی بوتگ، بے شک ئَ سک باز گرانیں ءُ دل ءَ سُرینوکیں پیسلہ بوتگ۔ منظور کنگ ءِ وھد ءَ منی دل ءُ ھیال یک تنازعہ یے ءَ چہ گوست۔ منی ذہن گُشگ ءَ اَت، دگہ راہ نیست بید چہ بھا ءِ گیش کنگ ءَ ءُ منی دل گُشگ ءَ اَت، گریب ءُ تنگدست مہ کپ اَنت۔ من ءَ پٹرول ءُ ڈیزل ءِ نرخاں چہ انوگیں گیشی ءَ باز گیش گیش کنگ ءِ سوج دیگ بوت۔ ما چہ اے شدیدیں مشکل ءَ درکپگ ءِ میانجی ئیں راہ ءِ شوہازگ ءِ جہد کت۔ دانکہ مہلوک ءِ سرا باز بار مہ بیت۔ راج گواہ انت کہ گوستگیں سالاں پاکستان ءَ را معاشی جاور چنچو گران بوتگ انت ۔ یک زمانگے بوتگ کہ ملک ءَ دیوالیہ بوھگ ءِ ھترہ بوتگ۔ اے گران تریں جاوراں ما سیاسی سوبمندی ءَ وتی پُشت ءَ ایر کنان ءَ ریاست ءُ معیشت ءِ مفاداں اولیت داتگ۔ اللہ تعالیٰ ءِ فضل ءُ کرم ءَ شما مئے گرانیں پیسلہانی تہا سرجمیں رنگ ءَ حمایت کتگ ءُ صبر ءُ دلبر ءِ درشانی کتگ۔ چوش کہ افراط زر ءِ شرح ءَ گیشی اتکگ۔ پالیسی ءِ شرح تقریباً نیم بوتگ، کلدار ءِ ارزشت مستحکم انت ءُُ بجلی ءِ نرخ ہم مزنیں کوشست ءَ گوں کم کنگ بوتگ انت۔ اے سوبمندی یک مردمے ءِ آسر نہ اِنت بلکیں سرجمیں راج ءِ دعا ءُ یکجائی ءِ کوشست اِنت۔ مزن وزیر ءَ گوشت کہ ھمے زمہ واری ءِ سما ءِ چیر دستی ءَ من مرچی یک رندے پدا دل یکیمی کن آں کہ ما الس ءِ سر ءَ کم چہ کم بار ءِ واستہ ھمک رنگ ءِ کوشست کنگ ءَ آں۔ من عام مردم ءِ رنج ءُ درداں سرجم ءَ سرپد باں ۔ من اے گپ ءَ شری ءَ سرپد آں کہ وھدے کہ زر پہ ھاندان ءِ مزنیں مردمانی دوا ءُ درمان ءَ کم بیت یا زھگانی وانگ ءُ فیس ءِ جیڑہ دل ءِ سر ءَ بار جوڑ بیت گڑا پت ءُ مات ءُ زھگ ءِ دل ءَ چے گوز اِیت۔ اے ہما غم اِنت کہ گوں گالاں بیان کنگ نہ بیت۔ مزن وزیر ءَ وتی جیڑہ ءِ درشان کت کہ آیوکیں روچاں تیل ءِ نہادانی تہ ءَ گیش گیشی ءِ گم است انت بلے حکومت اے گپ ءِ واستہ ھمک رنگ ءِ کوشست کنت کہ آیوکیں تیل ءِ نہادانی گیشی ءِ بار عام مردم ءِ سر ءَ مہ کپ ایت۔ اے مکسد ءِ واستہ شپ ءُ روچ مشورہ ءُ کوشست برجاہ انت ءُ انشاء اللہ من ترا مایوس نہ کناں۔ مزن وزیر ءَ پاکستان ءِ اشرافیہ ءُُ زرداریں تبک ءَ گوں تران کنان ءَ گوشت کہ ھر وھد ءَ کہ راج آنی سر ءَ گرانیں وھد کیت گڈا اے راج ءِ شرپداریں مردم کہ آھانی دل ءَ خدا ءِ ترس ھست آ اولی رند ءَ دیم ءَ کاینت ءُُ زھرناکیں انسانیت ءِ دست ءَ گپت کن اَنت۔ مئے راجدپتر ھم اے گپ ءِ گواہ اِنت کہ مئے گریب، محنتی، مزدور ءُ ھما درستیں مردم کہ شپ ءُ روچ ھید ءِ کشگ ءَ حلالیں روزی ءِ وسیلہ ءَ زند گوازینگ ءَ اَنت، مدام دیم ءَ اتکگ اَنت ءُ پہ ملک ءَ قربانی داتگ اَنت بلے نوں وھد اتکگ کہ اشرافیہ دیم ءَ اتک کن اَنت ءُ ھما کرد ءَ پیلو کن اَنت کہ آھانی شرہ ءُ ازت المی اِنت. اگاں فٹ پاتھ ءِ سرا وابیں کارمندے ہم اشرافیہ ءِ ضمیر ءَ بیدار نہ کنت گڑا ما وتی دل ءَ بہ چاریں۔ آئی ءَ گوشت کہ اے درگت ءَ مرچی یک دیوان ءِ برجم دارگ بوتگ کہ ایشی ءِ تہ ءَ وفاقی ءُ صوبائی حکومت آنی نیمگ ءَ بچت، السی ریلیف، کفایت شعاری ءُ حکومتی کار آنی تہ ءَ سادگی ءِ واستہ یکوئی ءَ ھاسیں پیسلہ کنگ بوتگ، ایشی ءِ چیر دستی ءَ آیوکیں دو ماہ ءِ واستہ سرکاری محکمہ ءِ گاڑی آناں داتگیں ایندھن ءِ تہ ءَ 50درسد کمی کنگ بوھگ ءَ اِنت۔ اے رد ءَ ایمبولینس ءُ سرکاری بس ءُ دگہ ھوار نہ اَنت سرکاری محکمہ ءِ سرجمیں گاڑی آنی 60 درسد آیوکیں دو ماہ ءِ واستہ بند کنگ بوھگ ءَ اَنت۔ آیوکیں دو ماہ ءَ کابینہ ءِ باسک، وزیر، مشیر ءُ کمک کار ھاسیں پگار نہ زور اَنت، آھانی پگار لس کمک ءِ سر ءَ ھرچ کنگ بنت۔ ایشی ءَ ابید پارلیمنٹ ءِ باسک آنی پگار ءَ چہ 25 درسد ھم کشگ بیت۔ درجہ 20 ءُ چہ ایشی ءَ گیش ءِ افسر کہ آہانی پگار سئے لکھ ءَ چہ گیش انت آہانی دو روچی پگار کشگ ءُُ لس کمک ءِ ہاترا کارمرز کنگ بیت۔ مزن وزیر ءَ جار جتگ کہ سرکاری توامیں محکمہ آنی پگار ءَ ابید دگہ ھرچ ءُ درچ 20درسد کم کنگ بوھگ ءَ انت۔ سرکاری محکمہانی تہا گاڑی، فرنیچر، اے سی ءُ اے دگہ چیزانی بھا زورگ ءِ سرا سرجمیں بندش جنئگ بوتگ ۔ وزیر، مشیر ءُ ھاسیں کمکار ءُ سرکاری کارندہانی درملکی تر ءُ تابانی سر ءَ ھم سرجمیں بندش جنگ بوتگ، بید چہ ھما تر ءُ تاباں کہ پہ راجی مفاد ءَ المی اَنت۔ آئی ءَ گوشت کہ ٹیلی کانفرنسنگ ءُ آن لائن میٹنگ آناں اولیت دیگ بیت تانکہ گیش ءَ چہ گیش ایندھن ءِ بچت کنگ بہ بیت۔ مزن وزیر ءَ گوشت کہ سرکاری شام ءُ افطار مراگش آنی سر ءَ ھم سرجمیں پابندی جنگ بوتگ۔ ھرچ ءُ درچ ءِ کم کنگ ءِ واستہ ھوٹل ءِ بدل ءَ سرکاری جاھاں سیمینار ءُ کانفرنس برجم دارگ بنت کہ ھاسیں کمیٹی ءِ نیمگ ءَ منظوری دیگ بیت۔ مزن وزیر ءَ گوشت کہ ملک ءَ ایندھن ءُ توان ءِ بچت ءِ واستہ حکومتی ءُ جندی شوبگ آنی تہ ءَ ھم ھاسیں پیسلہ کنگ بوتگ ایشی ءِ چیر دستی ءَ سرکاری ءُُ جندی شوبگ آنی تہ ءَ المی ئیں ازمت آناں ابید 50درسد کارندہ لوگ ءَ چہ کار کن اَنت وھدیکہ ایوک ءَ 50درسد کارگس ءَ کاینت۔ دفاتر ہفتہ ءِ تہا ایوک ءَ چار روچ ءَ پچ بنت ءُُ ایندھن ءِ بچت ءِ ھاتر ءَ یک ہفتگے ءِ تہا گیشیں چھٹی دیگ بوہگ ءَ انت۔ اے گپ بینکانی سرا لاگو نہ بیت۔ ہفتہ ءِ گڈی روچ ءَ چہ لوگ ءَ کار کنگ ءُ گیشیں چھٹی ءِ پیسلہ صنعتی ءُ زرعی شعبہ آنی سر ءَ لاگو نہ بنت۔ اے ہفتگ ءِ گڈسر ءَ چہ درستیں اسکولاں زوت دو ہفتگ ءِ چھٹی دیگ بوہگ ءَ انت ءُُ درستیں ہائیر ایجوکیشن ادارہ آں آن لائن کلاس زوت بندات کنگ بوہگ ءَ انت۔ ایندھن ءِ بچت ءِ ھاتر ءَ شاہراہ آنی سر ءَ سپیڈ ءِ حد 80کلومیٹر فی گھنٹہ ءَ گیش کنگ بوتگ وھدے کہ موٹروے ءِ سر ءَ 100کلومیٹر فی گھنٹہ ءَ گیش کنگ بوتگ۔ مزن وزیر ءَ راج ءَ چہ ھاسیں رنگ ءَ زردار ءُ کاروباری براتی ءَ چہ اپیل کت کہ آ اے راجی کوشست ءَ وتی سرجمیں بھر ءَ بہ زور اَنت۔ آئی ءَ مفاد دار، شرطی ءُ ڈیزل ءِ ذخیرہ کنوک ءُ منافع خوراں ھشدار داتگ کہ اے جاور ھال ءَ چہ پائدگ چست کنگ ءِ جھد ءَ مہ کن اَنت۔ اگاں نہ قانون ءِ آہنی دست کار ءَ کیت۔ اے درگت ءَ توامیں صوبائی حکومت آناں ہدایت جاڑی کنگ بوتگ ۔ مزن وزیر ءَ گوشت کہ مئے اولی ترجی پاکستان ءِ وشھالی، استحکام، دیمروئی ءُ ایمنی انت۔ اے راج ءَ بازیں آزمائشانی دیمپان بوتگ بلے ہر رند ءَ اللہ تعالیٰ ءِ فضل ءُ کرم ، یکے دومی ءِ یکوئی ءُ پاکستانی سلاہ بندیں اُرد ءِ بہادری ءُ قربانی ءِ سبب ءَ سوبمند بوتگ۔ مرچی جھان ءِ منظر نامہ نوکیں چیلنج آنی دیمپانی ءَ انت، آئی ءَ گوشت کہ طاقت ءِ توازن بدل بوھگ ءَ انت، نوکیں اتحاد جوڑ کنگ بوھگ ءَ انت۔ اے گران تریں وھد ءَ پاکستان ءَ یک رندے پدا ھما وڑا یکوئی، براتی ءُ ذمہ واری ءِ احساس ءِ زلورت اِنت کہ مرچی ھست اِنت، بوت کنت کہ پیسر ءَ ھچبر نہ بوتگ۔ مزن وزیر ءَ یات گوشت کہ اے مبارکیں ماہ رمضان مارا صبر، براتی ءُُ اجتماعی ذمہ واری ءِ سبق ءَ دنت ءُ مارا یات ءَ دنت کہ مھکمیں ءُُ شرپ مندیں راج ھما انت کہ مشکلیں وھد ءَ پھانسی، بھکامی ءُُ وت مہ وتی کمک ءَ گوں دیم ءَ روان کنت۔ اگاں مول ءُ مراد بلند ءُ نیت شر اِنت گڑا اللہ تعالیٰ ءِ کمک یقیں ءَ ھست اِنت۔ آئی ءَ وتی گپ ءِ آسر ءَ گوں مشرق ءِ شاعر علامہ محمد اقبال ءِ اے شعر ءَ کت کہ مرچی ہم ابراہیم ءِ ایمان ءَ ہرچی جوڑ کنت آتش ءَ پُلانی باگ جوڑ کت کنت۔