گریب ءُ تنگدستاناں ریلیف ءُ وت واجہی ءِ نیمگ ءَ آرگ راجی اولویت انت، امیر ءُ ازمکاریں ورناہانی سرا ٹیکس اقتصادی استحکام ءِ بنیاد انت، قیصر احمد شیخ

فیصل آباد/چینیوٹ۔ 9 مارچ(اے پی پی): سرمایہ کاری بورڈ ءِ وفاقی وزیر قیصر احمد شیخ ءَ گوشت کہ پاکستان ءَ را پائیدار اقتصادی استحکام ءِ نیمگ ءَ برگ ءِ واستہ گریب آناں ریلیف دیگ، ورنا آناں ہنرمند جوڑ کنگ ءُُ امیر آنی سر ءَ یک موثریں ٹیکس ءِ نظام ءِ سر ءَ عمل کنگ المی اِنت تانکہ ملک ءَ را چہ جھان ءِ مالیاتی دباؤ ءَ در کنگ بہ بیت۔ آئی ءَ چنیوٹ ءَ مستحقیں زالبول ءُُ ھاندان آناں ائید ءِ پیکج آنی بھر ءُُ بانگ ءِ سالانہ مراگش ءَ گوں تران کنگ ءَ ات، ایشی ءِ تہ ءَ ھزاراں مستحقیں ھاندان آنی گوما ائید ءِ وشیاں بھر ءُ بانگ کنگ ءِ ھاسیں بندوبست کنگ بوتگ۔ وفاقی وزیر ءَ مستحقیں زالبول آنی نیام ءَ پوشاک ءِ بھر ءُ بانگ کت ءُ اے جزم ءِ پدا زور دات کہ چاگرد ءِ نزوریں تبک آنی کمک ریاست ءُ سروکی ءِ بنجاہی ذمہ واری اِنت۔ سیاست ءِ اصل مکسد طاقت نہ انت بلکینگ ءَ انسانیت ءِ ازمت کنگ ءُ چاگرد ءِ محرومیں تبک ءِ زندمان ءِ شرپ ءَ را برز کنگ انت ۔ آئی ءَ گوشت کہ گوستگیں بیست ءُ پنچ سال ءَ چہ ائید ءِ موہ ءَ کمک ءِ مستحق آناں بھر ءُُ بانگ کنگ ءِ روایت برجم دارگ بوتگ ءُُ ھمک سال اے گامگیج ءِ وسیلگ ءَ ھزاراں کھول وشیاں بھر زورگ ءَ انت، ایشی ءَ چہ چاگردی ذمہ واری ءِ احساس ءِ عملی درور انت۔ اے موہ ءِ سر ءَ وفاقی وزیر ءَ ورنا آنی وانگ ءُُ زانگ ءُُ ہنر ءِ دیمروئی ءَ را راجی دیمروئی ءِ بنیات لیکگ ءِ وھد ءَ گوشت کہ ایوک ءَ مالی کمک جیڈھ آنی دائمی گیواری نہ اِنت بلکینگ ءَ ورناھیں نسل ءَ را ہنر ءُُ ہنر ءُ نوکیں وانگ ءُُ زانگ ءَ چہ لیس کنگ اصل سوبمندی اِنت۔ آئی ءَ گوشت کہ چنیوٹ ءَ فاسٹ یونیورسٹی ءُ گورنمنٹ کالج یونیورسٹی فیصل آباد ءِ کیمپس آنی جوڑ کنگ ءَ چہ دمگ ءَ وانگ ءُُ زانگ ءِ انقلاب ءِ بنیات ایر کنگ بوتگ، ایشی ءَ چہ دمگی نودربر آناں ہائیر ایجوکیشن ءِ واستہ دوریں شہر آنی تہ ءَ روگ ءِ ضلورت ءَ چہ رکّینگ بیت ءُُ دمگی دیمروئی ءَ را ھم نوکیں زور دیگ بیت۔ آئی ءَ گوشت کہ حکومت عام مردم ءَ را ریلیف پجارینگ ءِ واستہ جتا جتائیں گامگیج چست کنگ ءَ انت ءُُ اے درگت ءَ گوستگیں وھد ءِ روایت ءَ را برجاہ دارگ ءَ اے سال ءَ ھم آجوئی ءِ روچ ءِ موہ ءَ موٹر سائیکل ءُ رکشہ سوار آناں پنچ لیٹر مفت پٹرول پجارینگ بیت تانکہ مہنگائی ءِ دباؤ ءِ تہ ءَ شہری آناں عملی آسراتی پجارینگ بہ بیت۔ قیصر احمد شیخ ءَ ملک ءِ اقتصادی جاور ھال آنی بابت ءَ گپ ءُُ تران کنان ءَ گوشت کہ پاکستان ءِ معیشت ءَ را مھکم کنگ ءِ واستہ ٹیکس ءِ نظام ءَ بنیاتی اصلاحات المی انت۔ آئی ءَ اے گپ ءِ سر ءَ زور پر دات کہ وشھال ءُُ باوقاریں تبک ءَ را وتی راجی ذمہ واری ءِ سرپد بوھگ ءَ گیش ٹیکس دیگی اِنت تانکہ نزوریں تبک ءِ سر ءَ مالی بار کم کنگ بہ بیت ءُُ ریاست ءَ را دیمروئی منصوبگ آنی واستہ لوٹوکیں وسیلگ دست کپ اَنت۔ آئی ءَ گوشت کہ حکومت ءِ اقتصادی حکمت عملی ءِ مول ءُُ مراد پاکستان ءَ را میاں اوستمانی مالیاتی ادارگ آنی دباؤ ءَ چہ در کنگ ءُُ یک مھکم ءُُ آجوئیں معیشت ءِ نیمگ ءَ برگ اِنت، ایشی ءِ واستہ برے برے گرانیں پیسلہ ناگزیر اَنت۔ آئی ءَ گوشت کہ راجی وسیلگ آناں یکوئی رنگ ءَ کارمرد کنگ بہ بیت ءُُ ھمک تک وتی ذمہ واری ءَ پیلو بہ کنت گڈا پاکستان زوت اقتصادی استحکام ءَ رس ات کنت۔ وفاقی وزیر ءَ مزن وزیر شہباز شریف ءُُ سر وزیر پنجاب مریم نواز ءِ راجی گہبود ءِ گامگیج آناں ساڑات ءُُ گوشت کہ استیں حکومت الس ءَ را گیش ءَ چہ گیش ریلیف پجاری ءِ واستہ دستیابیں درستیں وسیلگ آناں کارمرد کنگ ءَ انت ءُُ چاگردی سلامتی ءِ منصوبگ آناں گیش چہ گیش موثر جوڑ کنگ ءِ سر ءَ ھاسیں دلگوشی دیگ بوھگ ءَ انت۔ مراگش ءِ گڈ ءَ آئی ءَ اے جزم ءِ درشان کت کہ حکومت ءُ سروکی یکجائی ءَ مستحقیں تبک آنی کمک، ورنا آنی وانگ ءُ زانگ ءُ ہنر آنی دیمروئی ءُ معیشت ءَ را مھکم کنگ ءِ واستہ عملی گامگیج برجاہ دار اَنت تانکہ پاکستان ءَ را وشھال ءُُ وت واجہیں ریاست جوڑ کنگ بہ بیت۔