حکومت نا وخت آ کروک آ فیصلہ غاتا سوب آن ملک اٹی پٹرولیم مصنوعات نا فراوانی معمول نا رد اٹ برجاء ءِ، رانا مشہود احمد خان

اسلام آباد ۔ 09 مارچ (اے پی پی) چیئرمین وزیراعظم یوتھ پروگرام رانا مشہود احمد خان پارینے کہ حکومت نا وخت آ کروک آ فیصلہ غاتا سوب آن ملک اٹی پٹرولیم مصنوعات آتا فراوانی معمول نا رد اٹ برجاء ءِ۔ مشکل جہانی زرگزرانی چاگڑد اٹی نن کل بطور قوم زمواری نا بایدے درشانی ءِ کین ۔دوشنبے نا دے آچیئرمین پرائم منسٹرز یوتھ پروگرام رانا مشہود احمد خان پٹرولیم مصنوعات آتا نہاد آتا حالیت آ تیا اہم ءُ بیان اسے ٹی پارے کہ جہانی منڈی ٹی پٹرولیم مصنوعات نا نہاد آتیٹی بھلو ودکی اس نظر بننگ اٹی ءِ۔ جہانی مارکیٹ اٹی خام تیل انا نہاد 110 ڈالر فی بیرل آن ہم زیات مسنے۔ حکومتِ پاکستان وخت آ و زموارانہ فیصلہ کرسا ملک ءِ گمانی تنکی آن بچفنگ کن گام گیج کرے۔او مستی پارے کہ اگہ اِرادے مست پٹرول نا نہاد آتیٹی ایڈجسٹمنٹ کننگتو کہ تو ملک اٹی مصنوعی کاختی نا خلیس ئس۔ اوپارے کہ ڈیہہ انا ایلو ملک آتا ساڑی حالیت داحقیقت نا پیدوار  شاہدی ءِ، بنگلہ دیش اٹی حکومت ءِ پٹرول نا بہا کننگ ءِ گاڈی تا وڑ و ڈول انا رد اٹ محدود کروئی تمانے ولے وزیراعظم شہباز شریف نا مر ہروک کماشی نا سوب سوب آن پاکستان اٹی دُن ءُ حالیت اس ودی متنے ۔ او پارے کہ وخت آ فیصلہ غاتا سوب آن ملک اٹی پٹرولیم مصنوعات نا فراوانی برجاء ءِ ہرا نا سوب آن الس ءِ ہچ ءُ پابندی اسے تون مون تروئی تمپننگ ءِ۔ رانا مشہود احمد خان الس آن خواست کرے کہ او صبر و کمک نا درشانی ءِ کیر، انشاء اللہ حکومت نا گچین آ پالیسی تا سوب آن پاکستان دا چیلنج آن ہم سرسہبی اٹ پیش تمک۔