پاکستاندرست  انٹیلی جنس معلومداری نا بنداو آ اوغانستان نا تہہ ٹی عسکریت پسند آتا ٹھکانہ غاتا برخلاف کارروائی کننگ اٹی ءِ، بنجائی وزیر حوالکاری عطاء اللہ تارڑ نا درملکی جریدہ غاتون ہیت و گپ

اسلام آباد ۔ 09 مارچ (اے پی پی) بنجائی وزیر حوالکاری و شینکاری عطاء اللہ تارڑ پارینے کہ پاکستان، اوغانستان نا تہہ ٹی عسکریت پسند آتا ٹھکانہ غاتا برخلاف درست انٹیلی جنس معلومداری نا بنداو آ کارروائی کننگ اٹی ءِ، پاکستان اوغانستان اٹی ہچ ءُ شاری علاقہ اسے شست کتنے ، پاکستان بیرہ دہشت گرد آتا بنداوی پنجر و اوفتا کمک کروک آ نظام ءِ ہدف جوڑ کننگ اٹی ءِ۔درملکی جریدہ غاتون ہیت و گپ کرسا بنجائی وزیر حوالکاری پارے کہ اوغان طالبان رجیم نا کنڈ آن پیش کروک آ خیالی حساب وکتاب  ہچ ءُ سنجیدہ تران اسے نا قابل اف ۔ اوغان وزارت دفاع نا ترجمان نا کنڈ آن پاکستان نا برخلاف جنگ انا پڑ اٹی سرسہبی نا دعویٰ غاک راست افس اور بیرہ پروپیگنڈا ءُ۔بنجائی وزیر حوالکاری عطاء اللہ تارڑ، اوغان طالبان حکومت و اقوام متحدہ نا مشن اوغانستان نا کنڈ آن اوغان شاری تا زوال کننگ ناخبرنا تردید ءِ کرسا پارے کہ کابل اٹی جوڑ اقوام متحدہ نا ایجنسی نا دا معلومداری تا پورو سیبو طالبان حکومت آٹی ءِ ۔او پارے کہ اوغان طالبان و فتنہ الخوارج نا دہشت گرد آتا کنڈ آن اواری اٹ جلہو کننگ دا ہیت ءِ پک کیک کہ اوغان طالبان حکومت و اوغانستان نا گل زمین آن سرگرم چندی دہشت گرد تنظیم آتا نیام اٹی گٹھ جوڑساڑی ءِ۔ او پارے کہ اوغان طالبان رجیم نا غٹ جلہو آتا دمدستی و گچین وڑاٹ ورندی ءِ تننگا۔ عطاء اللہ تارڑ پارے کہ پاکستان دہشت گرد و اوفتا کمکار بشمول اوغان طالبان نا فوجی اڈہ غاتے درست وڑاٹ شست کرے ۔