اقوام متحدہ نا سیکرٹری جنرل نا گچین کاری، پاکستان جہانی اصول آتا محافظ نا وڑاٹ کڑد ءِ تالان کرے

اقوام متحدہ۔ 09 مارچ (اے پی پی) پاکستان اقوام متحدہ نا بروک آ سیکرٹری جنرل نا گچین کاری نا عمل  اٹی جہانی اصول نا محافظ نا وڑاٹ اقوام متحدہ نا سروک نا کڑد ءِ تالان کرینے۔اقوام متحدہ ٹی پاکستان نا نائب آخبتی مندوب عثمان جدون نیویارک اٹی اقوام متحدہ نا ہیڈکوارٹرز اٹی دیوان اٹی پارینے کہ سیکرٹری جنرل ءِ باسک ملک آتا پت بایدے دوئی مرے و او نزور تپہ غاتا توار و جہانی اصول آتا محافظ نا وڑاٹ کڑد ادا کیر۔ اوپارے کہ اقوام متحدہ نا سیکرٹری جنرل نا گچین کاری جہانی ادارہ غاتیکن بھاز اہم فیصلہ اس مریک انتئے کہ داعہدہ ادارہ نا ساکھ، گچینی و اخلاقی اختیار آ براہ راست اثرانداز مریک۔ اقوام متحدہ نا ساڑی سیکرٹری جنرل انتونیوگوتریش نا ارٹ میکو پنچ سال انا مد 31 دسمبر 2026 آ چٹک، اوکان پد پوسکن آ سروک نا گچین کاری ءِ کننگک۔ داعہدہ کن داتم اسکان 4 اومیتدار مون آ بسنو ہرافتے ٹی ارجنٹائن نا رافیل گروسی، ہرا انٹرنیشنل اٹامک انرجی ایجنسی (آئی اے ای اے) نا سروک ءِ، چلی نا مسکوہی صدر مشیل بیچلیٹ ، سینیگال نا مسکوہی صدر میکی سال، کوسٹاریکانا چاہندار اقتصادیات ریبیکا گرین سپین ہرا اقوام متحدہ نا واپار و شونداری نا سروک ءِ  اوار ءُ۔ اومیتدار آتا پنداری جمع کرفنگ نا آخیریکو تاریخ یکم اپریل ءِ وخت اس کہ اومیتدار آتون انٹرایکٹوڈائیلاگزاپریل نا مسٹ میکو ہفتہ ٹی مریک۔ دا گچین کاری عمل 25 نومبر 2025 آ بناکننگاسس ہراٹی شفافیت ءِ پک کننگ کن اومیتدارآتا وژن سٹیٹمنٹس، گچین کاری خڑچ آتا سرجم و فائدہ غاتا ٹکراؤ نا بابت معلومداری ءِ السی جوڑ کننگ کون آ گام گیج اوار ءِ۔ داڑتون اوار ہی اقوام متحدہ ٹی اولیکو وار زالبول سیکرٹری جنرل نا گچین کاری کن کوشست آک برجاءُ انتئے کہ تدوک آ کم و ود 80 سال آن دا عہدہ نرینہ غاتون رہینگانے۔