انتظامی پنجر ءِ سوگو کننگ و ہندی کہول آ گورننس ءِ گچین جوڑ کننگ کن پوسکن ضلع غاتا جوڑ کننگ المی ءِ، وزیراعلیٰ بلوچستان میر سرفراز بگٹی

کوئٹہ۔ 09 مارچ (اے پی پی) وزیراعلیٰ بلوچستان میر سرفراز بگٹی تینا دورہ تربت اٹی پوسکن آ ضلع تمپ انا جوڑ کننگ نا نوٹیفکیشن  باقاعدہ وڑاٹ صوبائی پارلیمانی سیکرٹری توانائی میر اصغر رند انا حوالہ کرے داوخت آ وزیراعلیٰ بلوچستان پارے کہ ضلع تمپ انا جوڑ کننگ علاقہ ٹی انتظامی نظام ءِ گچین کننگ، شونداری عمل ءِ ترند کننگ و الس ءِ حکومتی آسراتی اوفتا درگہ اسکان سرکننگ نا کنڈآ اسہ اہم ءُ پیش رفت اس جوڑ مریک ، اوپارے کہ صوبائی حکومت بلو چستان نا مر مر انگا و پدسلوک علاقہ غاتا شونداری ءِ اولیت تننگ ءِ و ہموجاگہ نا الس ءِ بنداوی آسراتی تا فراوانی کن عملی گام گیج آتے برجاتخانے۔ وزیراعلیٰ میر سرفراز بگٹی پارے کہ انتظامی پنجرءِ سوگو کننگ و ہندی کہول آ گورننس ءِ گچین کننگ کن پوسکن آ ضلع غاتا قیام المی ءِ تانکہ السی ویل آتا وخت آ و گچین ایسری ءِ ممکن کننگ مرے اوداعزم انا درشانی ءِ کرے کہ حکومت بلوچستان صوبہ نا چندی علاقہ غاتیٹی شونداری ڈٹ آتا رفتار ءِ پین ترند کیک و السی راجی آسودہی نا ڈٹ آتے اولیتی بنداوتیا پورو کننگک۔ دوداٹی صوبائی وزیر ڈٹ بندی و شونداری میر ظہور احمد بلیدی، صوبائی وزیر خزانہ میر شعیب نوشیروانی و صوبائی وزیر ریونیو میر عاصم کردگیلو، میر اصغررند ئسک ہم وزیراعلیٰ تون اوارساڑی ئسر۔ وخت اس کہ تعلقدار محکمہ غاتا بڑزکو سرکاری آفیسر آک ہم بشخ ہلکر داوخت آ نوٹیفکیشن ءِ ہلنگ آن پد صوبائی پارلیمانی سیکرٹری توانائی میر اصغررند وزیراعلیٰ بلوچستان و صوبائی حکومت نا منت واری ءِ ہرفسا پارے کہ ضلع تمپ انا قیام علاقہ نا الس نا اسہ متکن آ خواست ئس اوپارے کہ دا فیصلہ غان نئے بیرہ انتظامی امور اٹی گچینی بریک بلکن شونداری ڈٹ آتا رفتاراٹی ہم ودکی مریک و الس ءِ بنداوی آسراتی اسکان رسینگ اٹ نمان آسانی دوئی مریک اوپارے کہ حکومت بلوچستان نا دا گام علاقہ نا شونداری، شونہالی و گچین طرز حکمرانی نا کنڈآ اسہ اہم ءُ مزل نا نشان اس جوڑ مریک ہراڑآن تمپ و اونا کیبی نا الس ءِ براہ راست فائدہ رسینگک۔