ہمسایہ ملک اٹی بے چیٹ حالیت آتا اثر مچ آ ڈیہہ آ تمنگ ءِ، حکومت بلوچستان دا بابت بنجائی حکومت تون اواری اٹ مون تروک چیلنج آتون مون تننگ کن جوان حکمت عملی اس مرتب کننگ ءِ ، وزیراعلیٰ بلوچستان میر سرفراز بگٹی نا میڈیا تون گپ وتران

کوئٹہ ۔09 مارچ (اے پی پی) وزیراعلیٰ بلوچستان میر سرفراز بگٹی پارینے  کہ پیپلز گرین بس سروس کیچ نا الس کن حکومت بلوچستان نا کنڈ آن اسہ اہم ءُ ٹیکی اسے، ہرانا مسخت الس ءِ گچین، رکھ و پوسکن آ سفری آسراتی فراوان کننگ ءِ۔ او پارے کہ صوبائی حکومت السی راجی آسودہی و بنداوی آسراتی تا فراوانی ءِ اولیت تننگ ءِ، و ہندا وژن نا رداٹ بلوچستان نا جتا جتا علاقہ غاتیٹی الس دوست آ ڈٹ آتے درستی راستی کرفنگ انگ ءِ ۔دا خیال آتا درشانی ءِ او پیپلز گرین بس سروس نا بنائی دود انا وخت آ میڈیا تون گپ وتران کرسا کرے، دا وخت آ صوبائی وزیر میر ظہور بلیدی، میر شعیب نوشیروانی، میر عاصم کرد گیلو، و پارلیمانی سیکرٹری حاجی برکت رند ہم ساڑی ئسر۔وزیراعلیٰ بلوچستان پارے کہ ساڑی آ حکومت دا وڑ نا پالیسی جوڑ کننگ ءِ ہرافتا کمک اٹ ورنا تا ریاست و ریاستی ادارہ غاتیا پت بحال مننگ کے۔ او پارے کہ حکومت نا اصلاحاتی ایجنڈا مریس مدی نتیجہ غاتا حامل ءِ و اونا گچین اثرات پدریسہ مون آ بننگ ءُ ۔وزیراعلیٰ بلوچستان میر سرفراز بگٹی پارے کہ حکومت صوبہ ٹی بند اسکول آتے چلیفنگ نا ہرا قول ءِ کریسساوڑآ ترندی اٹ عملدرآمد برجاءِ و اونا پیدوار نتیجہ مون آ بننگ بناکرینے ۔ اوپارے کہ داتم اسکان 3200 اسکول دُوارہ فعال مسنو وخت اس کہ استاد آتا بھرتی پورو وڑاٹ میرٹ نا بنداو آ کننگ انگ ءِ تانکہ تعلیمی نظام ءِ گچین و سوگو کننگ مرے اوپارے کہ مکران ڈویژن اٹی دا بابت نمان پیش رفت مسنے و گوادر اٹی اسہ ہم اسکول اس بند اف ہراکہ حکومت نا تعلیمی اصلاحات ناپیدوار شاہدی ءِ ، وزیراعلیٰ پارے کہ تعلیم نا مون آ دننگ آن بیدس بلوچستان نا پائیدار شونداری ممکن اف، ہنداسوب آن حکومت تعلیمی بشخ انا گچینی کن عملی گام گیج کننگ اٹی ءِ ، وزیراعلیٰ بلوچستان پارے کہ بلوچ ورنا، دانشور و باشعور تپہ غاتے سنجیدگی اٹ سجفوئی مریک کہ لاحاصل و مریس جنگ آتیان کس اسے فائدہ مفک بلکن اونا نسخان راج و بروک آ چین تے ہرفوئی تمک۔ اوپارے کہ شونداری، تعلیم و امن ہی ہمو کسر ءِ ہراڑآن بلوچستان و اونا ورناتا روشنا آخبت ءِ ممکن جوڑ کننگ مریک ڈیہہ انا ساڑی آ حالیت آتیا ہیت کرسا وزیراعلیٰ پارے کہ ہمسایہ ملک اٹی بے چیٹ حالیت آتا اثر مچ آ ڈیہ آ تمنگ ءِ۔ اوپارے کہ حکومت بلوچستان دا بابت بنجائی حکومت تون اواری اٹ مون تروک چیلنج آتون مون تننگ کن جوان حکمت عملی اس مرتب کننگ ءِ  اوپارےکہ بنجائی وزیر خزانہ و بنجائی وزیر پیٹرولیم تون مروک آ اوڑدہی ٹی ہم دا بابت سرجمی اٹ گپ وتران کننگانے۔ وزیراعلیٰ بلوچستان دا عزم انا درشانی ءِ کرے کہ حکومت بلوچستان صوبہ ٹی امن، شونداری، تعلیم و السی آسراتی تا مون آ دننگ کن تینا کوشست آتے برجاتخک تانکہ بلوچستان ءِ شونداری و شونہالی نا کنڈآ دننگ مرے۔