کوئٹہ غان پد تربت بلوچستان نا ارٹ میکو شار ءِ ہراڑے گرین پیپلز بس سروس نا بناءِ کننگ انگ ءِ، دا ڈٹ صوبہ ٹی پوسکن آ شاری ٹرانسپورٹ نظام نا مون آ دننگ نا کنڈآ اسہ اہم ءُ پیش رفت اسے، وزاعلیٰ بلوچستان میر سرفراز بگٹی

کوئٹہ۔ 09 مارچ (اے پی پی) کوئٹہ غان پد تربت اٹی ہم گرین پیپلز بس سروس نا باقاعدہ بناءِ کننگا وزیراعلیٰ بلوچستان میر سرفراز بگٹی سرکٹ ہاؤس تربت اٹی گرین پیپلز بس ءِ چلیفسا تربت شار اٹی پوسکن آ السی ٹرانسپورٹ سروس نا بناءِ کرے ، بنائی دود اٹی صوبائی وزیر ڈٹ بندی و شونداری میر ظہوراحمد بلیدی، صوبائی وزیر خزانہ میر شعیب نوشیروانی، پارلیمانی سیکرٹری توانائی میر اصغر رند ، صوبائی وزیر ریونیو عاصم کرد گیلو تون اوار ایلو گچین مروک آ نمائندہ و کمامدارآک ہم ساڑی ئسر ، داوخت آ گپ وتران کرسا وزیراعلیٰ بلوچستان میر سرفراز بگٹی پارے کہ تربت اٹی گرین پیپلز بس سروس نا بناء نا مسخت الس ءِ پوسکن، رکھ و آب اٹ سفری آسراتی فراوان کننگ ءِ تانکہ شاری تے ہن وبر اٹی آسانی دُوبننگ کے۔ اوپارے کہ دا بس سروس نئے بیرہ تربت شار بلکن مچ آ ضلع کیچ انا الس کن اسہ اہم آسراتی و ستاکڑزوک ءُ گام اسے ، وزیراعلیٰ پارے کہ تربت اٹی گرین پیپلز بس سروس نا بناٹی صوبائی وزیر میر ظہوراحمد بلیدی تون اوار ضلع کیچ انا غٹ صوبائی اسمبلی نا باسک آتا اسیجائی کوشست آک اوار ءُ ہرافتا سوب دا اہم ڈٹ عملی دروشم اس اختیار کننگ کرے اوپارے کہ حکومت بلوچستان الس نا گچین شاری آسراتی فراوا ن کننگ کن کوشست کننگ ءِ و گرین پیپلزبس سروس نا وڑآ زالبول آتیکن مخصوص پنک بس سروس ہم بھاز زوت بناکننگک تانکہ زالبول آتے رکھ و آسان سفری آسراتی دُوبننگ کے، وزیراعلیٰ پارے کہ کوئٹہ غان پد تربت بلوچستان نا ارٹ میکو شار ءِ گرین پیپلز بس سروس نا بناءِ کننگ انگ ءِ، ہراصوبہ نا پوسکن شاری ٹرانسپورٹ نظام نا مون آ دننگ نا کنڈآ اسہ اہم ءُ پیش رفت اسے کمامدارآتا رداٹ پوسکن آسراتی تیان شپ دا بس آتیٹی 37 مسافر آتا تولنگ نا گنجائشت ساڑی ءِ وخت اس کہ جِھک سلوک آ مسافر آتون اوار جم وڑاٹ کم و ود 100 بندغ سفر کننگ کیرہ دا ڈٹ انا رداٹ بنائی وڑاٹ تربت شار اکن چار بس فراوان کننگانے وخت اس کہ شار اٹی 18 اسٹیشن جوڑ کننگ انگ ءِ دا بس آک کم و ود 19 کلومیٹر مریس روٹ آ چلینگرہ و ہڑدے  لگ بھگ 4500 مسافر آتے تربت شار و کیبی علاقہ غاتا نیام اٹ گچین و رکھ سفری آسراتی فراوان کیرہ۔ بس آتیٹی زالبول ، چناو بزرگ شاری تیکن جتا ءُ نشست اس جتا کننگانے وخت اس کہ خصوصی بندغ آتیکن ویل چیئر نا آسراتی ہم فراوان کننگانے۔ وزیراعلیٰ بلوچستان میر سرفراز بگٹی داوخت آ دا عزم انا درشانی  ءِ کرے کہ حکومت بلوچستان صوبہ نا الس ءِ پوسکن و آب اٹ شاری آسراتی فراوان کننگ کن داوڑنا شونداری ڈٹ درستی راستی کرفسا کیک تانکہ الس ءِ گچین سفری آسراتی و آسان زند دُوبننگ کے۔