پاکستان اٹی کاروباری سرجزآتیٹی نمان پیش رفت ، پوسکن آ کمپنی تا رجسٹریشن اٹی ریکارڈ ودکی

اسلام آباد۔ 09مارچ (اے پی پی) اسپیشل انویسٹمنٹ فسیلیٹیشن کونسل(ایس آئی ایف سی ) نا گچین پالیسی تا سوب آن پاکستان اٹی کاروباری سرجز و کارپوریٹ رجسٹریشن اٹی پدریسہ ودکی نظر بننگ اٹی ءِ۔ ایس آئی ایف سی نا کارندہ غاتا رداٹ، سکیورٹیز اینڈ ایکسچینج کمیشن آف پاکستاننا رداٹ فروری ٹی 3444 پوسکن آ کمپنی تا اندراج کننگا، اوکان پد ملک اٹی رجسٹرڈ کمپنی تا جم کچ ودسا 2 لکھ 87 ہزار 49 مسنے ۔پوسکن آ رجسٹر مروک آ کمپنی تیٹی 82 کمپنی تیٹی پیشن نا ملک انا زرکار آک ہم اوار ئسر ہرافتے ٹی چین و امریکہ نا زرکار آک نمان ءُ ۔ جہانی زرکار تا چکار خاص کر معدنیات، واپار و آئی ٹی نا بشخ آتیا ئس ہرا پاکستان نا قدرتی وسیلہ و مون آ بروک آ ڈیجیٹل زرگزران نا ودوک آ اہمیت ءِ ظاہر کیک۔وزیر خزانہ نا سلاہکار خرم شہزاد نا رداٹ تدوک آ 15 تیٹی BYD، Google، Saudi Aramco و ایلو بھلا جہانی کمپنی تتون اوار 19 جہانی کمپنیک پاکستان اٹی زرکاری کن بسنو۔چاہندار آتا رداٹ ، پوسکن آ کمپنی تا رجسٹریشن اٹی پدریسہ ودکی پاکستان اٹی گچین مروک آ کاروباری حالیت و زرکار آتا ودوک آ پت انا اسہ پیدوار ءُ چیدہ اسے وخت اس کہ ایس آئی ایف سی نا گچین کمکاری ملک اٹی پائیدار زرگزرانی شونداری و کاروباری وارخواہی تا مون آ دننگ اٹ اہم کڑد ادا کننگ ءِ۔