نوکیں ضلع آنی جوڑ کنگ انتظامی ڈھانچہ ءِ مھکم کنگ ءُ بنجاہی تک ءَ گورننس ءِ گہتر کنگ ءِ واستہ المی انت، بلوچستان ءِ سر وزیر

کوئٹہ۔ 09 مارچ (اے پی پی): بنجاھی وزیر بلوچستان میر سرفراز بگٹی ءَ تربت ءِ تر ءُ تاب ءِ وھد ءَ نوکیں ضلع ٹمپ ءِ جوڑیشت ءِ نوٹیفکیشن صوبائی پارلیمانی سیکرٹری انرجی میر اصغر رند ءِ دست ءَ باقاعدہ دیم دات۔ اے موہ ءِ سر ءَ بنجاھی وزیر بلوچستان ءَ گوشت کہ ضلعی ٹمپ ءِ جوڑیشت دمگ ءَ انتظامی نظام ءَ را موثر جوڑ کنگ، دیمروئی ءِ عمل ءَ را ترند کنگ ءُ الس آناں وتی درپگ ءِ سر ءَ سرکاری آسراتی پجاری کنگ ءِ نیمگ ءَ یک مزنیں گامگیج ءِ ثابت بیت۔ آئی ءَ گوشت کہ صوبائی حکومت بلوچستان ءِ دور ءُ دور ءُ پد منتگیں دمگ آنی دیمروئی ءَ را اولی ترجی ءَ دیگ ءَ انت ءُ اود ءِ مردم آناں بنیاتی آسراتی پجاری ءِ واستہ عملی گامگیج برجاہ انت۔ بنجاھی وزیر بلوچستان ءَ گوشت کہ بنجاہی تک ءَ انتظامی ڈھانچہ ءِ مھکم کنگ ءُ گورننس ءِ گہتری ءِ واستہ نوکیں ضلع آنی جوڑیشت المی انت تانکہ السی جیڈھ آناں وھد ءُ پاس ءَ گوں جوانیں گیواری ممکن بہ بیت۔ آئی ءَ وتی جزم ءِ درشان کت کہ بلوچستان حکومت صوبہ ءِ جتا جتائیں دمگ آنی تہ ءَ دیمروئی منصوبگ آنی رفتار ءَ را گیش تیز کنت ءُ الس گہبودی منصوبگ اولویت ءِ بنیاد ءَ سرجم کنگ بنت۔ اے مراگش ءَ بنجاھی وزیر بلوچستان ءِ ھمراھی ءَ صوبائی وزیر ءِ منصوبہ بندی ءُ دیمروئی میر ظہور احمد بلیدی، صوبائی وزیر مالیات میر شعیب نوشیروانی ءُ صوبائی آمدنی ءِ وزیر میر عاصم کرد گیلو، میر اصغر رند ھم مراگش ءَ ساڑی اتنت۔ مراگش ءَ سیادی داروکیں محکمہ آنی مزنیں سرکاری کارندہ ھم بہر زور اِت اَنت۔ اے موہ ءِ سر ءَ نوٹیفکیشن ءِ رسگ ءَ پد توانائی ءِ صوبائی سیکرٹری میر اصغر رند ءَ سر وزیر بلوچستان ءُ صوبائی حکومت ءِ شگر ءُ منت گپت ءُ گوشت کہ ضلع ٹمپ ءِ جوڑ کنگ دمگ ءِ الس آنی دیریں لوٹ اِنت۔ آئی ءَ گوشت کہ اے پیسلہ ءَ چہ نا ایوک ءَ انتظامی کار آنی تہ ءَ گہتری کیت بلکینگ ءَ دیمروئی منصوبگ آنی رفتار ءَ را گیش کنگ بیت ءُ الس آناں بنیاتی آسراتی آناں آسانی ءَ گوں دسترس رس ایت۔ آئی ءَ گوشت کہ بلوچستان حکومت ءِ اے گامگیج دمگ ءِ دیمروئی، وشھالی ءُ گہتریں حکومت داری ءِ نیمگ ءَ یک ھاسیں سنگ سنگ ءِ ثابت بیت ایشی ءَ چہ تامپ ءُ آئی ءِ کش ءُ گور ءِ مردماں یک شلی ءَ  پائدگ رسیت۔