پاکستان اوگانستان ءِ تہ ءَ جنگولانی پناہ گاہانی ھلاپ ءَ راستیں انٹیلی جنس ءِ ھالانی بنیاد ءَ کارروائی کنگ ءَ اِنت، ھال ءُ اھوالکاری ءِ بنجاھی وزیر  عطا اللہ ترار ءَ گوں درملکی روتاکاں گپ ءُ تران

اسلام آباد۔9مارچ  (اے پی پی): وفاقی وزیر ءِ اھوالکاری ءُ شنگکاری عطا اللہ ترار ءَ گوشت کہ پاکستان اوگانستان ءِ تہ ءَ جنگولی پناہ گاہ آنی ھلاپ ءَ راستیں انٹیلی جنس ءِ ھال آنی بنیات ءَ کارروائی کنگ ءَ اِنت۔ پاکستان ءَ اوگانستان ءِ ھچ سول دمگ نشانگ نہ کتگ۔ پاکستان ایوک ءَ ناشرکارانی بنیاتی ڈھانچہ ءُ آیانی سپورٹ سسٹم ءَ نشانگ جوڑ کنگ ءَ اِنت۔ درملکی روتاکاں گوں گپ ءُ تران کنان ءَ وفاقی وزیر ءِ اھوالکاری ءَ گوشت کہ اوگان طالبان ءِ رژیم ءِ نیمگ ءَ پیش کنگ بوتگیں خیالی اعداد و شمار ھچ وڑیں سنگینیں تبصرہ ءِ لائق نہ اَنت۔ اوگانستان ءِ وزارت دفاع ءِ جارکش ءِ نیمگ ءَ پاکستان ءِ ھلاپ ءَ جنگ ءِ میدان ءَ سوبمندی ءِ دعویٰ راست نہ اَنت ءُ ایوک ءَ پروپیگنڈا اَنت۔ وفاقی وزیر ءِ ھال عطا اللہ ترار ءَ اوگان طالبان ءِ رژیم ءُ اقوام متحدہ ءِ مشن ءِ اوگان شہری ءِ کُشگ ءِ ھال رد کتگ ءُ گْوشتگ کہ کابل ءَ ھواریں اقوام متحدہ ءِ ادارگ ءِ نیمگ ءَ داتگیں ھال سرجم ءَ طالبان ءِ رژیم ءِ سر ءَ بندوک اَنت۔ آئی ءَ گوشت کہ اوگان طالبان ءُ فتنہ الخوارج ناشرکار آنی یکجائی اُرش اوگان طالبان حکومت ءُ اوگان سرزمین ءَ چہ کار کنوکیں بازیں ناشرکاریں گل آنی نیام ءَ یک سیادی ءِ ھست بوھگ ءِ پدرائی انت۔ آئی ءَ گوشت کہ اوگان طالبان سرکار ءِ نیمگ ءَ چہ درستیں اُرش آنی سر ءَ ترند ءُ جوانیں رنگ ءَ پسو دیگ بوتگ۔ عطا اللہ ترار ءَ گوشت کہ پاکستان ءَ اوگان طالبان ءِ فوجی اڈہ آنی ھوار ناشرکار ءُ آھانی کمک کار آنی سر ءَ راستیں رنگ ءَ نشانگ جوڑ کتگ۔