بلوچستان ءِ زالبولانی دلیری، توان ءُ جزم صوبہ ءِ روژنائیں باندات ءِ ضمانت انت، زالبولانی میان استمانی روچ ءِ درگت ءَ بنجاھی وزیر میر سرفراز بگٹی ءِ کلوہ

کوئٹہ۔ 08 مارچ (اے پی پی):  زالبولانی میاں اوستمانی روچ ءِ درگت ءَ بنجاھی وزیر بلوچستان میر سرفراز بگٹی ءَ بلوچستان ءِ دلیر، باصلاحیت ءُُ دلیریں زالبول آناں شگر ءُُ منت گپت ءُُ گوشت کہ ھما درستیں زالبول احترام ءِ لائق اَنت کہ آ صوبہ ءُُ مشکل ءُُ چیلنج آنی باوجود ملک ءِ ھزمت ءَ گوں بندوک اَنت۔ زالبولانی میاں اوستمانی روچ ءِ درگت ءَ وتی کلوہ ءِ تہ ءَ بنجاھی وزیر میر سرفراز بگٹی ءَ گوشت کہ بلوچستان ءِ زالبول نہ ایوک ءَ وتی چاگردی ءُُ لوگی ذمہ واری آنی جوانیں رنگ ءَ پیلو کنگ ءَ اَنت بلکیں زندمان ءِ جتا جتائیں پڑ آنی تہ ءَ ھم نامداریں کرد پیلو کنگ ءَ اَنت ءُُ صوبگ ءِ دیمروئی ءُُ برجائی ءِ تہ ءَ مزنیں کردے پیلو کنگ ءَ اَنت۔ بنجاھی وزیر ءَ گوشت کہ ھما زالبول کہ مشکل آنی دیم ءَ اوشتگ ءِ وھد ءَ امن ءُُ دیمروئی ءِ راہ ءَ روان کنان ءَ ملک ءُُ راج ءِ ازمت ءَ کنگ ءَ اَنت آ مئے چاگرد ءِ شان اِنت، ھمے رنگ ءَ ھما زالبول کہ پولیس ءُُ سلاہ بندیں اُرد ءِ تہ ءَ ھوار بوھگ ءَ وتی صلاحیتاں ثابت کنگ ءَ اَنت ءُُ پاکستان ءِ رکھینگ ءَ ھاسیں کرد پیلو کنگ ءَ اَنت آ سرجمیں راج ءِ شان اَنت۔ میر سرفراز بگٹی ءَ گوشت کہ زالبول آنی صلاحیت ءُُ سروکی ءَ را ھیال ءَ دارگ ءَ بلوچستان حکومت ءَ آھاں صوبگ ءِ ھاسیں ضلع آنی تہ ءَ ڈپٹی کمشنر ءُُ اسسٹنٹ کمشنر ءِ وڑیں ھاسیں انتظامی اگدہ آنی سر ءَ ایر کتگ ءُُ ھما ذمہ واری ءُُ پیشہ وارانہ صلاحیت ءَ گوں آ وتی ازمت آناں ستا کرز انت۔ آئی ءَ گوشت کہ زالبول آنی اقتصادی آجوئی ءِ واستہ بلوچستان حکومت ءَ زالبول اقتصادی بااختیار کنگ ءِ وقف فنڈ ءِ بندات کتگ ایشی ءِ چیر دستی ءَ زالبول آناں آسانیں قسط آنی سر ءَ وام دیگ بوھگ ءَ انت تانکہ آ وتی جند ءِ کاروبار ءَ بندات بہ کن انت ءُُ معاشی رد ءَ آجو بہ بنت۔ اے درگت ءَ خضدار وومن مارکیٹ ءِ جوڑیشت ءِ سر ءَ کار ھم کنگ بوتگ ھما جاہ ءَ کہ زالبول آناں کاروبار ءِ شریں موہ رسگ ءَ اَنت۔ بنجاھی وزیر ءَ گوشت کہ زالبول آنی وانگ ءُُ زانگ ءِ دیمروئی ءِ واستہ نزیک ءَ شانزدہ ھزار زالبولیں نودربر آناں 10کروڑ کلدار ءِ وانگ ءُُ زانگ ءِ سکالرشپ پجاری کنگ بوتگ۔ 1.5 ارب ءِ سال 2024 ءُ 2025 ءِ تہ ءَ ھوار کنگ بوتگ ءُ ایشی ءَ ابید بلوچستان سرکار ءَ ھر ضلع ءِ پنچ زالبولیں نودربر آنی وانگ ءُ زانگ ءِ ھرچ ءُ درچ ءِ سر ءَ زورگ ءِ پیسلہ کتگ کہ آیاں شانزدہ سال ءَ میٹرک ءِ چکاس آنی تہ ءَ زبردستیں سوبمندی رستگ تانکہ صوبہ ءِ باصلاحیتیں جنک ہائی ایجوکیشن ءِ رندگیری ءَ بہ کن اَنت۔ آئی ءَ گوشت کہ زالبول آناں ایمن ءُُ شرپداریں سفری آسراتی پجاری ءِ واستہ پیپلز پنک بس سروس ءِ بنگیج ءَ کنگ بوتگ، ایشی ءَ چہ پد زالبول آناں سفری وھد ءَ دیم ءَ آؤکیں مشکل آنی تہ ءَ باز کمی بوتگ ءُُ آھاں ایمنیں، شرپدار ءُُ بھروسہ مندیں سفری آسراتی پجاری کنگ بوتگ۔ اے گامگیج ءَ زالبول آنی چاگردی ءُُ اقتصادی وت واجہی ءَ را گیش مھکم کتگ۔ سر وزیر بلوچستان ءَ گوشت کہ زالبول آنی جان سلامتی ءَ را دل یکیمی کنگ ءِ واستہ حکومت ءَ ھیلپ لائن 1089 جوڑ کتگ وھدیکہ آماچیں زالبول آناں شہید محترمہ بے نظیر بھٹو وومن سینٹر ءُُ شیلٹر ہومز ءِ وسیلگ ءَ رکھینگ، کانودی کمک ءُُ جاہ ءِ پھجارینگ بوھگ ءَ اِنت تانکہ آ ھرچ مشکلیں جاور ھال ءَ را رسگ ءَ بہ بنت۔ میر سرفراز بگٹی ءَ گوشت کہ بلوچستان سرکار ءِ یک ھاسیں ءُ راجدپتری کانودے چکانی آروس ءِ ھلاپ ءَ کانود اِنت کہ ایشی ءِ رد ءَ ھژدہ سال ءَ کم عمریں جنک آنی آروس ءِ سر ءَ بندش جنگ بوتگ۔ آئی ءَ گوشت کہ اے کانود نہ ایوک ءَ بلوچستان ءِ واستہ بلکینگ ءَ سرجمیں ملک ءِ واستہ یک ھاسیں سنگ ءِ انت، ایشی ءَ چہ مئے جنک زھگ آناں وانگ ءُُ زانگ ءِ موہ رس ایت، جوانیں جان سلامتی ءُُ شرپداریں زندمان ءِ واستہ رس ایت۔ آئی ءَ گوشت کہ زالبول چاگرد ءِ سک باز المی ءُ بنکی بھر انت ءُ ھمیشانی کرد ءِ وسیلگ ءَ چاگرد ءَ زیبائی ءُ توازن حاصل بیت ۔ بلوچستان ءِ دراہیں زالبولاں ھاسیں رنگ ءَ نودربر، گھار ءُ ماتاں گوں تران کنان ءَ آئی ءَ گوشت کہ آ وتی ازماں سرجمیں رنگ ءَ برجا بہ کن اَنت ءُ دیم ءَ بہ رو اَنت، بلوچستان سرکار ھمک گام ءَ ھمیشانی گوما اوشتاتگ۔ بنجاھی وزیر ءَ گوشت کہ حکومت زالبول آنی واستہ وانگ ءُُ زانگ ءِ اسکالرشپ، گلابی بس سروس، گلابی اسکوٹر ءُُ اے دگہ وشھالی پروگرام آنی وسیلگ ءَ دیمروئی ءِ دروازگ آناں پچ کنگ ءَ انت ءُُ مئے واھشت انت کہ بلوچستان ءِ جنک آناں دگنیا ءِ جوانیں یونیورسٹی آناں رسائی رس ایت، مزنیں وانگ ءُُ زانگ ءِ رندگیری ءَ بہ کن انت ءُُ آیوکیں وھد ءِ باوقاریں سوبمندی ءِ بنیات ءَ ایر بہ کن انت۔ آئی ءَ زالبولاں گوں دزبندی کتگ کہ آ وتی زھگانی وانگ ءُ زانگ ءِ سر ءَ ھاسیں دلگوش بہ کن اَنت ءُ اے گپ ءَ دل یکیمی بہ کن اَنت کہ نوکیں نسل ھچ وڑیں منفی پروپیگنڈا ءُ گمراہ کنوکیں کارانی آماچ مہ بنت۔ آئی ءَ گوشت کہ اگاں کجام ھم ورنا گمراہ بوتگ گڈا مارا آئی ءَ را مین اسٹریم ءَ آرگ ءِ واستہ یکجائی کوشست کنگی انت تانکہ آ وشھال ءُُ شرپداریں زند گوازینت بہ کنت۔ بنجاھی وزیر میر سرفراز بگٹی ءَ صوبہ ءِ توامیں زالبول آناں میاں اوستمانی روچ ءِ مبارکی دیان ءَ گوشت کہ بلوچستان ءِ زالبول آنی دلیری، توان ءُُ جزم صوبہ ءِ وشیں باندات ءِ ضمانت انت۔