میان اُستمانی تک ءِ ھرابیں جاور ھال چہ کنٹرول ءَ در بوت کن اَنت، انتونیو گوتریس

اقوام متحدہ۔8مارچ  (اے پی پی):  اقوام متحدہ ءِ سیکرٹری جنرل انتونیو گوتریس ءَ ھال داتگ کہ میاں اوستمانی تک ءَ برجاھیں کش ءُ چیل چہ وتی کنٹرول ءَ در بوت کن اَنت وھدے کہ جنگ ءِ سبب ءَ شہری آبادی ءِ واستہ گیشیں مشکلات ءُ مزنیں کساسے ءَ بے لوگ بوھگ ءِ ترس ءُ بیم ءِ سبب جوڑ بوھگ ءَ اِنت۔ اقوام متحدہ ءِ ادارہانی رد ءَ اسرائیل ءُ امریکہ ءِ ایران ءِ بمب تراک ءَ پد بندات بوتگیں کش ءُ گوری ءِ ھشت روچ گوستگ ءُ اے وھد ءِ تہ ءَ سرجمیں میان اُستمانی تک ءَ بدلی ءِ اُرشانی یک سلسلہ یے برجاہ اِنت۔ انسانی کمک ءِ گلاں لبنان ءَ مزنیں کچے ءَ آشوب ءِ تصدیق کتگ کہ سداں پناہ گاہ پُر انت ءُ بیروت ءِ سرجمیں دمگ ھالیگ انت۔ اسرائیلی فوج ءِ زمینی آپریشن لبنان ءِ جنوب ءَ ، بیروت ءِ جنوبی دمگاں ، بیکا ءِ دمگ ءُ دریائے لیتانی ءِ جنوب ءَ درستیں دمگاں مزنیں کساسے ءَ چہ کشگ ءِ پرمان ءُ ملک ءِ جتا جتائیں دمگاں مدام بالی اُرش ءِ سبب ءَ یک پیسریگیں روہا ءِ آبادی ءِ ھاتر ءَ گیشتر مشکل ءُ رنج ءُ گم ءِ سبب جوڑ بوھگ ءَ انت ۔ اقوام متحدہ ءِ انسانی حقانی کارگس ءِ جارکش ءَ جنیوا ءَ گشتگ۔ اقوام متحدہ ءِ سیکرٹری جنرل انتونیو گوتریس ءَ وتی بیان ءَ ھال داتگ کہ میاں اوستمانی ءُُ چہ ایشی ءَ دریں دمگاں اُرش سرجمیں دمگ ءَ شہری آناں سکیں تکلیف ءُُ تاوان ءِ سوب جوڑ بوھگ ءَ انت ءُُ اے ھم جھان ءِ معیشت ءَ را مزنیں ھترہ ءِ جوڑ کنگ ءَ انت ءُُ ایشی ءَ چہ گیشتریں نزوریں گل ھاسیں رنگ ءَ آماچ انت۔ آئی ءَ گْوشتگ کہ جاور ھال چہ ھرکس ءِ دست ءَ در بوت کن اَنت پمیشکا نوں جنگ ءِ بند کنگ ءُ سنگینیں سفارتی گپ ءُ تران بندات کنگ ءِ وھد اِنت۔ دومی نیمگ ءَ امریکی صدر ڈونلڈ ٹرمپ ءَ گْوشتگ کہ ایران ءِ سر ءَ امریکہ ءُ اسرائیل ءِ نیمگ ءَ برجاھیں اُرشانی وھد ءَ آ ایوک ءَ ایران ءِ نیمگ ءَ چہ ”بے شرطیں سرنڈر“ ءَ منّ اِیت ءُ ایران ھم پسو ءِ زورگ ءَ اِنت۔ امریکہ ءِ صدر ءَ وتی سوشل میڈیا پلیٹ فارم ٹروتھ سوشل ءِ سرءَ گشتگ داں ایران بے شرط سرنڈر مہ کنت آئی ءِ گوما ہچ وڑیں سودا نہ بیت۔ دومی نیمگ ءَ لبنان ءَ اقوام متحدہ ءِ ہجرت ءِ ادارہ ءِ مشن ءِ سروک میتھیو لوسیانو ءَ گشتگ کہ بازیں اجتماعی پناہ گاہ ھاسیں رنگ ءَ بیروت ءُ کوہ لبنان ءَ سرجم ءَ پُر انت کہ ایشی ءِ سبب ءَ مردم دگہ دمگاں ھاسیں رنگ ءَ لبنان ءِ رودراتکی دمگ ، القعہ ءُ بیکا ءَ دیم دیگ بوھگ ءَ انت۔ اقوام متحدہ ءِ پناہ گزین ادارہ ءَ اے گیش بوھوکیں بحران ءَ را مزنیں ہنگامی جاور لیک اتگ کہ ایشی ءِ ھاتر ءَ زوتیں دمگی پسو ءِ ضلورت انت۔ UNHCR ءِ ایمرجنسی ءِ ڈائریکٹر آیاکی ایٹو ءَ جنیوا ءَ احوالکاراں گوں تران کنان ءَ گشتگ کہ اے جنگ ءِ سبب ءَ سرجمیں دمگ ءَ ءُُ جنوب مغربی ایشیا ءِ نیمگ ءَ مزنیں آبادی ءِ آوار جنگ ءِ سبب جوڑ بوت کنت۔ آئی ءَ گوشت کہ آماچیں دمگ آنی تہ ءَ 25ملین ءِ کساس ءَ مردم پیسر ءَ چہ پناہ گزین اَنت، اندری بے لوگ بوتگ اَنت یا نوکیں وھد ءَ واتر بوتگ اَنت کہ ایشی ءَ چہ میزبانیں ملک آنی سر ءَ زور گیش بوھگ ءَ اِنت۔ جنگ ءِ سوب ءَ بوتگیں مزنیں تجارتی دریائی بحران ھم گیش بوتگ ءُ ایشی ءِ سبب ءَ ایران ءِ جنوب ءَ ھواریں تنگہ ہرمز ءَ جہاز رانی تقریباً سرجم ءَ بند کنگ بوتگ کہ ایشی ءِ تہ ءَ دگنیا ءِ نفت ءِ نزیک ءَ پنچمی بھر ءُ ھمے رنگ ءَ مزنیں کساسے ءَ تجارتی سامان ھم ھوار اِنت۔ دومی نیمگ ءَ اقوام متحدہ ءِ تہ ءَ ایران ءِ سفیر امیر ایراوانی ءَ سلامتی کونسل ءِ دپ ءَ احوالکاراں گوں تران کنان ءَ گْوشتگ کہ ایران جنگ ءُ کش ءُ چیل ءَ نہ لوٹ اِیت بلے ھچبر وتی وت واجہی ءَ دست ءَ نہ دنت۔ ایران وتی سرزمین ءُ حاکمی ءُ آجوئی ءِ رکھینگ ءِ واستہ ھمک رنگ ءِ گامگیج چست کنت ۔