گپ ءُ تران ءُ سفارتکاری دمگ ءَ دائمی امن ءُ ایمنی ءِ برجم دارگ ءِ موثر تریں وسیلہ انت،  سینیٹ ءِ چیئرمین سید یوسف رضا گیلانی

اسلام آباد۔8مارچ  (اے پی پی): سینیٹ ءِ چیئرمین سید یوسف رضا گیلانی ءَ گوشت کہ دمگ ءَ دائمی امن ءُ ایمنی ءِ برجائی ءِ واستہ گپ ءُ تران ءُ سفارتکاری کارآمد تریں وسیلگ انت۔ آئی ءَ اے ھیالانی درشانی یک شمبے ءِ روچ ءَ آذربائیجان ءِ ملی مجلس ءِ اسپیکر صاحب غفاروف ءَ گوں ٹیلی فون ءِ سر ءَ گپ ءُُ تران ءِ ساھت ءَ کت کہ ایشی ءِ تہ ءَ دمگ ءِ نوکیں جاور ھال ءُُ وت مہ وتی مفاد ءِ جیڈھ آنی سر ءَ گپ ءُُ تران کنگ بوت۔ گپ ءُ تران ءِ ساھت ءَ چیئرمین سینیٹ ءَ گوستگیں ڈرون اُرش آنی درگت ءَ آذربائیجان ءِ حکومت ءُ الس ءِ گوما پاکستان ءِ سرجمیں یکوئی ءِ درشان کت۔ آئی ءَ گوشت کہ اے رنگیں اُرش میاں اوستمانی کانود ءِ ھلاپ ورزی اِنت ءُ وت واجہیں ملک آنی نیام ءَ سیادی ءِ اصولانی ھلاپ ورزی اِنت ءُ اے رنگیں کار دمگی امن ءُ ایمنی ءَ را ھراب کن اَنت۔ چیئرمین سینیٹ ءَ گوشت کہ پاکستان آذربائیجان ءِ دیم ءَ اتکگیں سیکورٹی جیڈھ آناں سرجمی ءَ سرپد اِنت ءُُ آذربائیجان ءِ وت واجہی، سرزمین ءِ یکوئی ءُُ ایمنی ءِ واستہ وتی بے دروریں کمک ءِ یک رندے پدر کنت۔ آئی ءَ اے درگت ءَ 6 مارچ ءَ پاکستان ءِ مزن وزیر ءُُ آذربائیجان ءِ صدر الہام علیف ءِ نیام ءَ ٹیلی فون ءِ گپ ءُُ تران ءُُ 5 مارچ ءَ پاکستان ءِ نائب مزن وزیر / درئی کار ءُُ آذربائیجان ءِ دری کارانی وزیر ءِ نیام ءَ رابطہ ءِ ھم ذکر کت کہ ایشی ءِ تہ ءَ پاکستان ءَ اے ایزر ءِ گوما سرجمیں یکوئی ءِ درشانی کت۔ چیئرمین سینیٹ ءَ پاکستان ءُُ آذربائیجان ءِ نیام ءَ نزیکیں ءُُ دیریں سیادی ءِ ذکر کنان ءَ وتی جزم ءِ پدا زور دات کہ پاکستان ھمک مشکلیں ساھت ءَ آذربائیجان ءِ گوما اوشتات کنت۔ آئی ءَ اے گپ ءِ سر ءَ زور پر دات کہ دمگ ءَ کش ءُُ چیل ءِ کم کنگ ءُُ دائمی امن ءُُ ایمنی ءِ پجارینگ ءِ واستہ گپ ءُُ تران ءُُ سفارتکاری سک باز المی اِنت ءُُ درستیں گل آناں وتی سرا زبردستی ءُُ ذمہ واری ءِ درشان کنگ لوٹ ایت۔ اے موہ ءِ سر ءَ چیئرمین سینیٹ ءَ آذربائیجان ءِ حکومت ءِ ھاسیں منت واری درشان کت کہ ایران ءَ چہ پاکستانی شھمکی آناں یلہ کنگ ءِ کار ءَ سرجمی ءَ کمک کتگ ۔ آئی ءَ گوشت کہ 113پاکستانی شھمکی آستارا ءِ سیمسر ءِ وسیلگ ءَ چہ ایمنی ءَ چہ در کنگ بوتگ اَنت، اودا آذربائیجان ءِ واکداراں آوانی دیم ءِ سفر ءِ آسراتی داتگ، ایشی ءِ تہ ءَ آیگ ءِ وھد ءَ ویزہ ءِ جاری کنگ ھم ھوار اِنت۔ اے موہ ءِ سر ءَ آذربائیجان ءِ پارلیمنٹ ءِ اسپیکر ءَ چیئرمین سینیٹ ءِ منت گپت کہ آ استیں جاور ھال آنی تہ ءَ پاکستان ءِ مھکمیں کمک ءُُ یکوئی ءَ کنت۔ آئی ءَ پاکستان ءِ گوما نزیکیں سیادی ءِ سر ءَ وتی جزم ءِ سر ءَ زور پر دات ءُُ پاکستان ءِ برجاھیں سفارتی ءُُ سیاسی کمک ءِ ساڑات کت۔ گپ ءُ تران ءِ گڈ ءَ دوئیں بامرد آں اے گپ ءِ سر ءَ دل یکیمی ءِ درشان کت کہ پاکستان ءُ آذربائیجان ءِ نیام ءَ مھکمیں شریکداری دمگ ءُ جھان ءِ تک ءَ امن، برجائی ءُ کمک ءِ دیمروئی ءِ واستہ دیم ءَ ھم جوانیں کرد پیلو کنت۔