زالبول ھمک چاگرد ءِ دیمروئی، وشھالی ءُ مھکمی ءِ تہ ءَ بنیاتی ءُ ناگزیریں کردے پیلو کن اَنت، سید یوسف رضا گیلانی

اسلام آباد۔8مارچ  (اے پی پی): چیئرمین سینیٹ سید یوسف رضا گیلانی ءَ گوشت کہ کجام ھم چاگرد ءِ دیمروئی، وشھالی ءُ برجائی ءِ تہ ءَ زالبول بنیاتی ءُ ناگزیریں کرد ءِ پیلو کن اَنت۔ پاکستانی زالبولاں سیاست، معیشت، وانگ ءُ زانگ، جان سلامتی ءُ چاگردی آسراتی ءَ ہوار جتا جتائیں پڑ آنی تہ ءَ مزنیں سوبمندی ءِ وسیلگ ءَ ملک ءَ را نامدار کتگ۔ یک شمبے ءِ روچ ءَ زالبولانی میاں اوستمانی روچ ءِ موہ ءَ وتی کلوہ ءِ تہ ءَ چیئرمین سینیٹ ءَ گوشت کہ زالبول آناں یک وڑیں موہ پجاری، آوانی واستہ ایمن ءُُ شرپداریں چاگرد ءِ دل یکیمی کنگ ءُُ راجی دیمروئی ءِ لڑ ءِ تہ ءَ جوانیں کرد ءِ پیلو کنگ ءِ اہل جوڑ کنگ ریاست ءُُ چاگرد ءِ یکجائی ذمہ واری اِنت۔ آئی ءَ گوشت کہ پارلیمنٹ ءَ کانود سازی ءُ عملی گامگیج آنی وسیلگ ءَ زالبول آنی ھک آنی رکھینگ، وانگ ءُ زانگ، اقتصادی آجوئی ءُ چاگردی توانمندی ءِ تہ ءَ مزنیں کردے پیلو کتگ۔ سید یوسف رضا گیلانی ءَ راج ءِ مات فاطمہ جناح ءَ را شگر ءُُ منت گپت ءُُ گوشت کہ آئی ءَ پاکستان ءِ جوڑیشت ءِ جہد ءَ سروکیں کرد پیلو کتگ ءُُ ہمت، جزم ءِ زھمکشانی کتگ ءُُ سروکی ءِ یک درپشناکیں مثال ءِ دیم ءَ آؤرتگ۔ ایشانی ھزمت مرچی ھم زالبولاں راجی زند ءِ تہ ءَ فعالیں کردے پیلو کنگ ءِ ھاترا دلبڈی دنت۔ سید یوسف رضا گیلانی ءَ بیگم رانا لیاقت علی خان ءُُ ایندگر دلیریں مسلمانیں زالبول آناں ھم یات دات کہ آہاں پاکستان ءِ جوڑیشت ءِ جہد ءَ ھاسیں کرد پیلو کتگ ءُُ پد ءَ پاکستان ءَ دیمروئی، وشھالی، چاگردی ھزمت ءُُ جمہوریت ءِ دیمروئی ءِ واستہ ارزشتی ایں ھزمت کتگ۔ آئی ءَ گوشت کہ اے زالبول آنی کوشست، قربانی ءُ ھزمت پاکستانی زالبول آنی واستہ یک چپکیں درور انت۔ چیئرمین سینیٹ ءَ پاکستان ءُ مسلم دگنیا ءِ اولی گچین بوتگیں زالبولیں مزن وزیر محترمہ بے نظیر بھٹو شہید ءَ را ھم شگر ءُ منت گپت۔ شہید بے نظیر بھٹو ءَ راجی سیاست ءُ سروکی ءَ زالبولاں نامداریں جاگہ ​​دیگ ءِ واستہ راجدپتری جہد کتگ ۔ ایشانی سروکی ءَ نہ ایوک ءَ پاکستان ءَ بلکیں سرجمیں مسلم دگنیا ءَ زالبولانی واستہ امیت ءُُ دلیری ءِ نوکیں بابے جوڑ کتگ۔ چیئرمین سینیٹ ءَ گوشت کہ پاکستان پیپلز پارٹی ءَ زالبول آنی ھک آنی رکھینگ، آھانی سیاسی نمائندگی ءُُ چاگردی ءُُ اقتصادی دیمروئی ءِ واستہ مدام عملی گامگیج چست کتگ ءُُ زالبول آناں را سروکی ءِ موہ پجاری ءَ چہ راجی مین اسٹریم ءَ دیم ءَ آرگ ءِ واستہ ھاسیں کرد پیلو کتگ۔ آئی ءَ گوشت کہ زالبول آنی وانگ ءُُ زانگ، اقتصادی آجوئی ءُُ توانمند کنگ ءِ واستہ گیش موثریں گامگیج چست کنگ بہ بنت تانکہ آ ملک ءِ دیمروئی ءُُ وشھالی ءِ تہ گیش ءَ چہ گیش فعال ءُُ موثر کرد پیلو بہ کن اَنت۔ مھکم، وشھال ءُ مھکمیں پاکستان ءِ واستہ زالبول آں توان دیئگ ناگزیر اِنت ۔ سید یوسف رضا گیلانی ءَ پاکستانی زالبول آنی ازمت آناں ساڑاتگ ءِ ساھت ءَ اے امیت سھمکا کت کہ آ آیوکیں وھد ءَ ھم وتی ازم ءُُ محنت ءَ گوں ملک ءُُ راج ءِ دیمروئی ءِ تہ ءَ مزنیں کردے پیلو کن اَنت۔