ایران جنگ نہ لوٹیت، وتی حاکمیت ءُ راج ءِ دفاع ءِ ھاترا المی گامگیج چست کنت، ایران ءِ گشتانک اقوام متحدہ

اقوام متحدہ۔7مارچ  (اے پی پی):ایران ءَ گشتگ کہ من جنگ نہ لوٹاں، بلے وتی حاکمی ءُ مہلوک ءِ رکھینگ ءِ ھاتر ءَ دراہیں گامگیجاں چست کناں۔ روئٹرز ءِ رد ءَ اقوام متحدہ ءِ تہا ایران ءِ سفیر امیر سعید ایراوانی ءَ گشتگ کہ ایران ءِ سرا امریکہ ءُ اسرائیل ءِ بالی اُرشانی تہا کم چہ کم 1332 ایرانی شہری بیران ءُ ہزاراں ٹپی بوتگ انت کہ آہانی تہا زالبول ءُ زھگ ہم ہوار انت۔ ایران ءِ سفیر ءَ اے اُرش جنگی جرم ءُ انسانیت ءِ ھلاپ ءَ جرم لیک اِتگ اَنت ءُ گْوشتگ کہ اے کارانی مول ءُ مراد لس مھلوک ءِ تہ ءَ ترس ءُ بیم ءِ شنگ کنگ ءُ گیشتریں تباہی ءِ سوب جوڑ کنگ اِنت۔ آئی ءَ گوشت کہ سرجمیں ملک ءَ 180 ءَ چہ گیش زھگ شھید کنگ بوتگ اَنت وھدیکہ بیست ءَ چہ گیش وانگجاھاں تاوان رستگ۔ آئی ءَ اے اعداد ءُ شمار چہ انجمن ھلال احمر ایران ءِ گزارش ءَ نقل کتگ اَنت۔ ایران ءِ نمائندہ ءِ گشگ ءِ رد ءَ امریکہ ءُ اسرائیل ءَ سرجمیں ایران ءَ زانت ءُ زانگ ءَ شہری آبادی ءُ بنیاتی شہری بنیاتی ڈھانچہ نشانگ جوڑ کتگ۔ آئی ءَ گوشت کہ گھتریں آبادی ءِ ھند ءُ دمگ ءُ ھاسیں سول آسراتی آنی سر ءَ بے رھبندیں اُرش کنگ بوھگ ءَ اِنت۔ آئی ءَ گوشت کہ تاں انوگ ءَ ملک ءَ 13 میڈیکل سنٹر ھم نشانگ جوڑ کنگ بوتگ اَنت وھدیکہ پنچ شمبے ءِ روچ ءَ تہران ءَ ھوار جتا جتائیں شھر آنی تہ ءَ لیب ءُ گوازی ءِ جاھ آنی سر ءَ اُرش آنی تہ ءَ 18 زالبولیں ایتھلیٹ بیران ءُ نزیک ءَ 100 مردم ٹپیگ بوتگ اَنت۔ آئی ءَ امریکہ ءُ اسرائیل ءِ اے موقف رد کتگ کہ اے اُرش ایوک ءَ فوجی آسراتی ءِ نشانگ جوڑ کنگ بوتگ اَنت۔ آئی ءَ گیش کرتگ کہ ایران اقوام متحدہ ءِ منشور ءِ آرٹیکل 51 ءِ رد ءَ وتی دفاع ءِ حق ءَ برجاہ دار ایت ءُ آئی ءِ بدلی کارروائی قانونی، المی ءُ تناسبی انت ءُ ایوک ءَ فوجی ٹارگٹاں نشانگ جوڑ کنت۔ ایران ءِ سفیر ءَ اے گپ پدر کتگ کہ ایران جنگ نہ لوٹ ایت بلے وتی حاکمیت ءُ راج ءِ رکھینگ ءِ ھاترا ھرچ وڑیں گامگیج چست کنت۔ آئی ءَ اقوام متحدہ ءِ سلامتی کونسل ءَ چہ لوٹ کتگ کہ آ اے زوراکی ءِ ھلاسی ءِ واستہ ترندیں گامگیج بہ زور اَنت کہ دمگی ءُ جھان ءِ امن ءِ واستہ مزنیں ھترہ جوڑ بوتگ۔