راجی اسمبلی ءِ اسپیکر ایاز صادق ءِ گشگ انت کہ زالبولاں بااختیار کنگ راجی دیمروئی، چاگردی برجائی ءُ جمہوریت ءِ مھکم کنگ ءِ ھاترا المی انت

اسلام آباد۔7مارچ  (اے پی پی):راجی اسمبلی ءِ اسپیکر سردار ایاز صادق ءَ گشتگ کہ ملک ءَ را دیمروئی ءُ وشحالی ءِ راہ ءَ برگ ءِ واب زالبولاں توانمند کنگ ءَ ابید پیلو بوت نہ کنت۔ ھرچ راج ءِ راستیں دیمروئی ھما وھد ءَ ممکن نہ اِنت کہ زالبولاں زند ءِ ھر پڑ ءَ برابریں موہ ءُ موثریں بھر زوری مہ بیت۔ پاکستان ءِ برجمیں دیمروئی ءُ چاگردی ھمگرنچی ءِ واستہ وانگ ءُ زانگ، جان سلامتی، روزگار، سروکی ءُ پیسلہ کنگ ءِ عمل ءِ تہ ءَ زالبول آنی موثر نمائندگی المی اِنت۔ شمبے ءِ روچ ءَ راجی اسمبلی ءِ سیکرٹریٹ ءِ نیمگ ءَ چہ جاڑی بوتگیں بیان ءِ رد ءَ زالبول آنی میاں اوستمانی روچ ءِ موہ ءَ وتی ھاسیں پیغام ءِ تہ ءَ اسپیکر سردار ایاز صادق ءَ گوشت کہ اسلام زالبول آناں عزت ءُ شرپ ءُ برابریں ھک ءِ دات کنت ءُ زالبول آنی تہ ءَ صنفی فرق ءُ ناانصافی ءِ ھچ گنجائش نہ یلہ دنت۔ آئی ءَ اے گپ ءِ سر ءَ زور پر دات کہ ریاست ءُ چاگرد ءِ یکجائی ذمہ واری اِنت کہ آ زالبول آنی دیم ءَ اوشتاتگیں چاگردی رکاوٹ، نابرابری ءُ زوراکی ءِ ھلاسی ءِ واستہ موثر ءُ ٹھوس گامگیج بہ زور اَنت ءُ آھاں یک ایمنیں چاگرد، شرپداریں روزگار ءُ دیمروئی ءِ واستہ یک وڑیں موہ ءِ پھجارینگ بہ کن اَنت۔ آئی ءَ گوشت کہ استیں پارلیمنٹ ءَ زالبول آنی ھک آنی رکھینگ ءُ آھانی سر ءَ زوراکی ءِ ھلاسی ءِ واستہ موثر کانود سازی وتی اولیت آنی تہ ءَ ھوار کتگ۔ آئی ءَ اے سال ءَ منظور بوتگیں لوگی زوراکی ءِ گر ءُ دار ءِ ایکٹ 2026 ءَ را یک ھاسیں سنگ میل لیک اتگ ءُ گوشت کہ اے کانود زالبول ءُ زھگ آناں لوگی زوراکی ءُ زوراکی ءَ چہ رکھینگ ءِ ھاترا یک مزنیں گامگیج یے ءُ ایشی ءِ جوانیں رنگ ءَ عمل کنگ ءَ را دل یکیمی کنگ بیت۔ اسپیکر راجی اسمبلی ءَ گوشت کہ پارلیمنٹ ءَ زالبول آنی مزنیں نمائندگی است انت کہ آ کانود سازی ءُ راجی کار آنی تہ ءَ سرگرمیں کرد پیلو کنگ ءَ انت۔ آئی ءَ زالبول آنی پارلیمانی کاکس ءُ جینڈر مین اسٹریمنگ ءِ ھاسیں کمیٹی ءِ کوشست آناں ساڑات ءُ گوشت کہ اے فورم زالبول آنی سیاسی، چاگردی ءُ اقتصادی بااختیار کنگ ءِ دیمروئی ءُ پارلیمنٹ ءَ صنفی برابری ءِ دیمروئی ءِ واستہ ھاسیں کرد پیلو کنگ ءَ انت۔ آئی ءَ زالبول آنی پارلیمانی کاکس ءِ نیمگ ءَ گوستگیں روچ ءَ یورپی یونین ءُ اقوام متحدہ ءِ کمک ءَ زالبول آناں یکجا کنگ ءُ آھانی جیڈھ آناں پدر کنگ ءِ ھاترا بندات کتگیں نوکیں ایپ ءِ بندات ءِ ھم وش آتک کت۔ اسپیکر سردار ایاز صادق ءَ ایران ءَ گوستگیں اسرائیل ءِ اُرشانی وھد ءَ 150 ءَ چہ گیش اسکول ءِ نودربر آنی شھید بوھگ ءِ سر ءَ سک باز دلپدردی ءُ اپسوز درشان کتگ ءُ اے وئیل ءَ را یک غمناکیں ءُ مذمت ءِ لائکیں وئیل لیک اتگ۔ آئی ءَ گوشت کہ بے گناھیں اسکول ءِ نودربر آنی جانی تاوان جنگی جرم آنی تہ ءَ کیت ءُ اے سانحہ ءِ سر ءَ زالبول ءُ زھگ آنی ھک آنی رکھینگ ءِ دعویٰ کنوکیں میاں اوستمانی گل آنی بے تواری جیڈھ ءِ گپ اِنت۔ آئی ءَ اے گپ ءِ سر ءَ زور پر دات کہ زالبول آنی ھک آنی رکھینگ ءُ آھانی سر ءَ زلم ءُ زوراکی آنی دیم ءَ دارگ ءِ واستہ میاں اوستمانی براتی ءَ را وتی ذمہ واری آناں پیلو کنگ لوٹ ایت۔ آئی ءَ مقبوضہ جموں ءُ کشمیر ءَ بھارتی قبضہ گیریں اُرد ءُ فلسطین ءَ اسرائیل ءِ اُرد ءِ نیمگ ءَ زالبول ءُ زھگانی سر ءَ بوتگیں زلم ءُ زوراکی آنی سک باز مذمت کتگ ءُ گوشت کہ بے سلاہیں شہری ھاسیں رنگ ءَ زالبول ءُ زھگ آناں نشانگ جوڑ کنگ میاں اوستمانی انسانی کانود ءِ مزنیں ھلاپ ورزی اِنت۔ میاں اوستمانی براتی ءَ اے وڑیں ظلم ءُ زوراکیانی نوٹس زورگ ءُ مظلومیں زالبول ءُ زھگانی رکھینگ ءِ واستہ عملی گامگیج چست کنگی انت۔ قومی اسمبلی ءِ صدر ءَ گوشت کہ پنجاب ءِ اولی زالبولیں سر وزیر محترمہ مریم نواز شریف ءِ سروکی اے گپ ءِ ثبوت انت کہ پاکستانی زالبول آنی تہ ءَ مزنیں انتظامی ءُ سیاسی اگدہ آنی سر ءَ سوبمندیں کرد پیلو کنگ ءِ سرجمیں صلاحیت است انت۔ آئی ءَ جمہوریت ءُ راجی ھک آنی واستہ شہید محترمہ بے نظیر بھٹو ءُ بیگم کلثوم نواز ءِ ھزمت آناں ھم یات کت۔ آئی ءَ گوشت کہ پاکستانی زالبول ھمک پڑ ءَ وتی صلاحیت ءَ را سہرا کنگ ءَ اَنت ءُ راجی دیمروئی ءَ سرجمی ءَ کرد پیلو کنگ ءَ اَنت۔ راجی اسمبلی ءِ صدر ءَ پاکستان موومنٹ ءُ جمہوری جہد ءِ تہا زالبول آنی راجدپتری کرد ءِ سر ءَ چمشانک دیان ءَ محترمہ فاطمہ جناح، بیگم رانا لیاقت علی خان، بیگم جہان آراء شاہنواز ءُ بیگم شیستہ اکرام اللہ ءِ ازمت آنی سر ءَ مزنیں شگر ءُ منت گپت۔ آئی ءَ گوشت کہ اے دلیریں زالبول آناں راجی ءُ جمہوری ارزشت آنی دیمروئی ءُ زالبول آنی ھک آنی رکھینگ ءِ تہ ءَ مزنیں کرد پیلو کتگ۔ ایشی ءَ ابید راجی اسمبلی ءِ ڈپٹی اسپیکر سید غلام مصطفیٰ شاہ ءَ وتی کلوہ ءِ تہ گوشت کہ زالبول ھرچ چاگرد ءِ نیم ءَ چہ گیش آبادی ءِ جوڑ کن اَنت ءُ آھانی توانائی ءَ را سرجمی ءَ کارمرد کنگ ءَ ابید پائیدار ءُ ھواریں دیمروئی ممکن نہ اِنت۔ آئی ءَ گوشت کہ پاکستان ءِ آئین ءَ زالبول آنی برابریں ھک ءُ رکھینگ ءِ ضمانت داتگ ءُ پارلیمنٹ زالبول آنی گہبودی، چاگردی سلامتی ءُ اقتصادی توانمندی ءِ واستہ کانود ءُ پالیسی گامگیج جوڑ کنگ ءَ برجاہ دار ایت۔