پاکستان ءُ ازبکستان ءِ یکجائی کارگس ءِ گند ءُ نند، بیپار ءِ دیمروئی ءُ پنچ سالی روڈ میپ ءِ سر ءَ گپ ءُ تران کنگ بوت

اسلام آباد۔6مارچ  (اے پی پی): پاکستان ءُ ازبکستان ءِ نیام ءَ دو نیمگی تجارت ءِ دیمروئی ءِ واستہ جوڑ کتگیں یکجائی کارگس ءِ دومی مزن تک ءِ دیوان مزن وزیر ءِ صنعت ءُ پیداوار ءِ ھوالگ ءَ ھاسیں کمکار ھارون اختر خان ءِ سروکی ءَ برجم دارگ بوت۔ گند ءُ نند ءَ سیکرٹری کامرس جواد پال، جتا جتائیں وفاقی وزارت ءُ ایس آئی ایف سی ءِ نمائندگاں بہر زرتگ ات۔ گند ءُ نند ءِ ساھت ءَ دوئیں ملک آنی نیام ءَ تجارتی دیمروئی، تجارتی راہ، جتا جتائیں شوبگ آنی تہ ءَ کمک ءُ پیسریگیں تپاک کتگیں مفاہمت نامہ آنی سر ءَ پیشرفت ءِ سرجمیں چار ءُ تپاسی کنگ بوت۔ دیوان ءَ گوں گشتانک دیان ءَ ھارون اختر خان ءَ گوشت کہ مزن وزیر شہباز شریف ءِ وژن ءِ چیر دستی ءَ پاکستان ءُ ازبکستان ءِ نیام ءَ تجارت ءِ تہ ءَ گیشی ءِ واستہ 2026 ءَ تاں 2030 ءَ پنچ سالی روڈ میپ پیش کنگ بیت۔ آئی ءَ گوشت کہ ازبکستان ءِ گوما تپاک کتگیں پروٹوکول آنی سر ءَ عمل کنگ ھم اے روڈ میپ ءِ وسیلگ ءَ دل یکیمی کنگ بیت۔ آئی ءَ گوشت کہ پاکستان ءُ ازبکستان اقتصادی شریکداری ءَ نوکیں راہ پچ کنگ ءَ روگ ءَ انت۔ جتا جتائیں شوبگ آنی واستہ ھاسیں حکمت عملی جوڑ کنگ ءِ واستہ ہشت ورکنگ گروپ جوڑ کنگ بوتگ انت، آہاں دیوان ءَ وتی وتی شوبگ آنی واستہ پیش کرتگیں روڈ میپ پیش کتگ۔ ہارون اختر خان ءَ گوشت کہ چین ءِ وسیلگ ءَ یک متبادلیں تجارتی راہ ازبکستان ءِ واستہ کوتاہ ءُ آسان ثابت بوت کنت ءُ اے درگت ءَ منصوبگ جوڑ کنگ بوھگ ءَ انت۔ گند ءُ نند ءَ دوئیں ملک آنی نیام ءَ توانائی، ٹرانسپورٹ، کشت ءُ کشاری ءُ صنعت ءِ شوبگ ءَ کمک ءِ تہ ءَ گیشی ءِ سر ءَ تپاک کنگ بوت۔ ایشی ءَ ابید دمگی رابطہ ءُ میاں اوستمانی ایشیا ءِ رسائی ءِ دیمروئی ءِ واستہ نوکیں تجارتی موہ آنی سر ءَ ھم ھیال ءُ لیکہ کنگ بوتگ۔ گند ءُ نند ءَ اے جزم ءِ درشان کت کہ پاکستان ءُ ازبکستان دو نیمگی تجارت ءِ کساس ءَ را مزنیں کساس ءَ گیش کنگ ءِ واستہ یکجائی گامگیج آناں گیش ترند کن اَنت۔ ہارون اختر خان ءَ گوشت کہ میاں اوستمانی ملک آنی گوما اقتصادی سیادی ءَ را دیمروئی دیگ ءِ واستہ پاکستان ءِ سفارتی ءُ تجارتی کوشست جاری انت۔