این ایچ اے ٹول پلازا آناں پچ ءُ ساپ ءُ سلہ ایں رنگ ءَ انتظام کنگ جوانیں گامگیج اِنت، جاری منصوبگ آناں یک معقولیں وھد ءِ تہ ءَ سرجم کنگ بہ بیت ءُ کار ءِ جوانیں معیار ءَ را دل یکیمی کنگ بہ بیت، مزن وزیر شہباز شریف این ایچ اے ءِ کارکردگی ءِ سر ءَ چار ءُ تپاسی دیوان ءَ گوں تران

اسلام آباد۔5مارچ  (اے پی پی): مزن وزیر محمد شہباز شریف ءَ گوشت کہ این ایچ اے ٹول پلازا آناں پچیں ءُ ساپ ءُ سلہ ایں رنگ ءَ انتظام کنگ جوانیں گامگیج اِنت، برجاھیں منصوبگ آناں معقولیں وھد ءِ تہ ءَ سرجم کنگ بہ بیت ءُ موٹروے آنی جوڑیشت ءِ وھد ءَ کار ءِ جوانیں معیار ءَ را دل یکیمی کنگ بہ بیت۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ آئی ءَ اے ھیالانی درشانی نیشنل ہائی وے اتھارٹی ءِ کارکردگی ءِ ھوالگ ءَ چار ءُ تپاسی دیوان ءِ سروکی ءَ کنان ءَ کت۔ گند ءُ نند ءَ وفاقی وزیر برائے منصوبہ بندی احسن اقبال، وفاقی وزیر مواصلات عبدالعلم خان، وفاقی وزیر اقتصادی امور احد خان چمہک ءُ سرکاری مزنیں حکام ءَ بہر زرتگ۔ مزن وزیر ءَ وفاقی وزیر مواصلات عبدالعلم خان ءُ آئی ءِ ٹیم ءِ توسیپ کت کہ آہاں این ایچ اے ءِ آمدنی ءَ را گیش کنگ، موٹروے ءُ شاہراہ آنی سر ءَ سیفٹی ءِ گامگیج آناں جوانیں رنگ ءَ عمل کنگ، سروس ایریا آناں گہتر کنگ ءُ ایندگر گامگیج آناں ساڑات۔ آئی ءَ گوشت کہ این ایچ اے ٹول پلازا آنی پچیں ءُ ساپ ءُ سلہ ایں نیلامی جوانیں گامگیج اِنت، ءُ موٹروے آنی جوڑیشت ءِ وھد ءَ جوانیں رھبند آنی سر ءَ عمل کنگ بہ بیت۔ دیوان ءَ این ایچ اے ءِ کارکردگی ءِ بابت ءَ سرجمیں بریفنگ دیگ بوت۔ دیوان ءَ را گوشت کنگ بوت کہ مالی سال 2025ءَ این ایچ اے ءِ آمدنی 2024ءِ مقابلہ ءَ 66.8ارب کلدار ءَ چہ 109ارب کلدار ءَ سر بوتگ۔آمدنی ءِ تہا 63درسد گیشی ٹول ٹیکس ءِ یکجا کنگ ءُ مزن وزیر ءِ نیمگ ءَ چہ 2024ءِ ہدایت ءِ سرا کتگیں دگہ گامگیج آنی سبب ءَ ممکن بوتگ۔ دیوان ءَ گیش گوشگ بوت کہ موٹروے آنی سر ءَ ایم ٹی جی آنی کساس 2024ءِ مقابلہ ءَ 20 ءَ چہ 81درسد ءَ گیش بوتگ۔شاہراہ ءُ موٹروے آنی سر ءَ ایکسل لوڈ ریسٹرکشن ریٹ ھم 90 ءُ 95درسد ءَ سر بوتگ ایشی ءَ چہ نہ ایوک ءَ حادثہ آنی کساس کم بوتگ بلکیں سڑک آنی سر ءَ آھانی تہ ءَ گیشی ءِ دباؤ ھم کم بوتگ۔ دیوان ءَ گیش گوشگ بوت کہ موٹرویز ءِ سر ءَ سروس ایریا آناں گہتر کنگ ءَ ابید راجی شاہراہ آنی سر ءَ ھم سروس ایریا جوڑ کنگ بوھگ ءَ انت۔ دیوان ءَ چہ گوشگ بیت کہ اے سال ءَ موٹرویز ءِ سر ءَ ایر ایمبولینس سروس بندات کنگ بیت۔ ایشانی ھوار 1122 سروس موٹروے ءِ ھرچ انٹرچینج ءَ ھمک وھد ءَ پچ اِنت۔ گند ءُ نند ءَ گوشتگ ات کہ لاکی ایکسپریس وے، ٹھوکر نیاز بیگ  (N 5) ءُ اسلام آباد مری ایکسپریس وے ءِ اپگریڈیشن این ایچ اے ءِ وتی بجٹ ءَ چہ سرجم کنگ بوتگ۔ مزن وزیر ءَ وزیر مواصلات ءُ آئی ءِ ٹی ایم او ءِ کوشست آنی توسیپ کت ءُ جاری منصوبگ آناں ایر کتگیں وھد ءُ پاس ءِ تہ ءَ سرجم کنگ ءِ ہدایت کت۔