فیکلٹی پے اسکیل سسٹم ءِ سرا ایچ ای سی ٹاسک فورس ءَ ٹی ٹی ایس ءِ استادانی 35 درسد گیشیں پگار ءِ ھاتر ءَ سفارشات ءِ منظوری داتگ

اسلام آباد۔5مارچ  (اے پی پی): فیکلٹی پے اسکیل سسٹم ءِ ھوالگ ءَ ٹاسک فورس ءِ ھشتمی دیوان ہائیر ایجوکیشن ءَ وفاقی وزیر ءِ منصوبگ بندی، دیمروئی ءُ ھاسیں گامگیج پروفیسر احسن اقبال ءِ سروکی ءَ برجم دارگ بوتگ۔ ایچ ای سی ءُ صوبائی ہائیر ایجوکیشن ءِ محکمہ ءِ نمائندگاں دیوان ءَ بہر زرتگ۔ دیوان ءَ گوں تران کنان ءَ احسن اقبال ءَ گوشت کہ 2021 ءَ چہ ٹینور ٹریک سسٹم ءِ پگار منجمد کنگ بوتگ اَنت ایشی ءِ سبب ءَ ہائیر ایجوکیشن ءِ شوبگ ءَ لائک ءُ باصلاحیتیں استاد آناں برجاہ دارگ مزنیں چیلنج جوڑ بوتگ۔ آئی ءَ گوشت کہ ٹی ٹی ایس ءِ پیمانہ ءِ تہ ءَ 35درسد فرق ھلاس کنگ بوتگ، البت اے نظام ءَ را گیش موثر ءُ مقابلہ ءِ لائک جوڑ کنگ ءِ ضلورت اِنت۔ آئی ءَ ھشدار داتگ کہ اگاں لائکیں استاد یونیورسٹی آنی تہ ءَ مہ مان اَنت گڈا ہائیر ایجوکیشن سسٹم ءَ را مزنیں بحران ءِ آماچ بوت کنت۔ آئی ءَ گوشت کہ یونیورسٹی آنی تہ ءَ ٹیلنٹ ءِ را وتی نیمگ ءَ رازیگ کنگ ءُ برجاہ دارگ ءِ واستہ پگار ءِ پیمانہ ءِ تہ ءَ ترمیم المی اِنت۔ وفاقی وزیر ءَ ہدایت کت کہ جوانیں پگار ءِ پیمانہ ءِ گوما کارکردگی ءِ اشارہ آنی سر ءَ ھم سک باز عمل کنگ بہ بیت تانکہ وانگ ءُ زانگ ءِ کوالٹی ءَ را گہتری ءَ را دل یکیمی کنگ بہ بیت۔ آئی ءَ ٹی ٹی ایس ءِ تہ ءَ ھواریں استاد آناں بیس لائن ءِ 35درسد گیشیں پگار دیگ ءِ ھوالگ ءَ سفارشات ھم منظور کتگ اَنت۔ احسن اقبال ءَ اے گپ ءِ سر ءَ زور پر دات کہ ایچ ای سی ءَ صوبائی حکومت آنی گوما کار کنگی اِنت تانکہ یونیورسٹی آناں بجٹ ءِ تہ ءَ گیشی ءَ را دل یکیمی کنگ بہ بیت۔ آئی ءَ گوشت کہ پی ایچ ڈی ءِ ھر ڈگری یک وڑیں کوالٹی ءِ نہ اِنت پمیشکا دگنیا ءِ 50 جوانیں یونیورسٹی آناں پی ایچ ڈی کنوکیں استاد آناں ھاسیں ترغیب دیگ بہ بیت تانکہ جھان ءِ تک ءِ پٹ ءُ پول ءُ وانینگ ءَ را دیمروئی دیگ بہ بیت۔ دیوان ءَ اے گپ ءِ سر ءَ تپاک کنگ بوت کہ ہائیر ایجوکیشن سسٹم ءَ را جھان ءِ لوٹ آنی گوما ھمگرنچ کنگ ءِ واستہ ترندیں ءُ جوانیں گامگیج المی اَنت۔