پاکستان ءَ توانائی ءِ جوانیں ذخیرہ ءُ سپلائی ءِ بندوبست است انت، وزیر ءِ ھزانگ سینیٹر محمد اورنگزیب ءِ برطانوی ہائی کمشنر ءِ گوما گند ءُ نند

اسلام آباد۔5مارچ  (اے پی پی): وفاقی وزیر خزانہ ءُ آمدنی سینیٹر محمد اورنگزیب ءَ گوشت کہ پاکستان ءَ توان ءِ جوانیں ذخیرہ ءُ سپلائی ءِ بندوبست است انت۔ منابع آناں عقلمندیں کارمرد کنگ ءِ واستہ صوبائی حکومت آنی گوما نزیکیں ھمگرنچی برجائی کنگ بوھگ ءَ اِنت۔ حکومت ءِ جزم انت کہ آ میاں اوستمانی مالیاتی فنڈ ءِ گوما پروگرام ءِ مول ءُ مراداں سر بہ بیت ءُ ڈھانچہ ءِ اصلاحات ءَ را دیم ءَ برگ بہ بیت۔ آئی ءَ اے گپ پنچ شمبے ءِ روچ ءَ پاکستان ءِ واستہ برطانیہ ءِ ہائی کمشنر جین میریٹ ءَ گوں گند ءُ نند ءَ کت۔ گند ءُ نند ءَ خطہ ءِ انوگیں ردوم، پاکستان ءِ اقتصادی جاور، جاری اقتصادی اصلاحات ءُ دو نیمگی اقتصادی کمک ءَ را گیش مھکم کنگ ءِ امکان آنی سر ءَ ھیال ریچی کنگ بوت۔ وزیر خزانہ ءَ ہائی کمشنر ءَ را سرپد کت کہ حکومت خطہ ءِ بدل بوھوکیں جاور ھال آنی ممکنہ اقتصادی اثر آناں گر ءُ چیل بوھگ ءِ واستہ فعال گامگیج زورگ ءَ انت۔ مزن وزیر ءَ کلیدی وفاقی وزارت ءُ اسٹیٹ بینک آف پاکستان ءِ سر ءَ یک مزن تک ءِ کمیٹی جوڑ کتگ ایشی ءِ تہ ءَ کلیدی شوبگ آنی تہ ءَ ھاسیں رنگ ءَ توان ءِ پھجاری ءُ سامان ءِ جھان ءِ مارکیٹ آنی تہ ءَ جاور ھال آنی سر ءَ روچ پہ روچ چار ءُ تپاسی کنگ بوھگ ءَ اِنت۔ کمیٹی سپلائی چین، قیمتانی تہا اتار چڑھاؤ ءُ پٹرولیم ءِ پیداوار، خام تیل، کوئلہ ءُ گیس ءِ ممکنہ کمی یا رکاوٹ ءِ سرا چار ءُ تپاسی کنگ ءَ انت، ہمے وھد ءَ مہنگائی، درائیں اکاؤنٹس ءُ مالیاتی استحکام ءِ سرا ممکنہ اثرات ءِ تجزیہ کنگ ءَ انت۔ وزیر ءِ ھزانگ ءَ گوشت کہ اے وھد ءَ پاکستان ءَ توان ءِ جوانیں ذخیرہ ءُ سپلائی ءِ بندوبست است انت، حکومت ھم جتا جتائیں سناریو آناں منصوبگ بندی کنگ ءَ انت ءُ ممکنہ جاور آناں ھیال ءَ دارگ ءَ حساسیت ءِ تجزیہ کنگ ءَ انت۔ ایشی ءِ گوما توان ءِ جوانیں کارمردی ءِ واستہ گامگیج آنی سر ءَ ھم ھیال ءُ لیکہ کنگ بوھگ ءَ اِنت ءُ صوبائی حکومت آنی گوما نزیکیں ھمگرنچی برجائی کنگ بوھگ ءَ اِنت تانکہ وسیلگ آناں زانتکاریں کارمردی ءَ را دل یکیمی کنگ ءُ مارکیٹ ءَ بے وسی ءِ گھبراہگ ءَ چہ بچگ بہ بیت۔ ھزانگ ءِ وزیر ءَ پاکستان ءِ برجاھیں اقتصادی اصلاحات پروگرام ءِ دیمروئی ءُ انٹرنیشنل مانیٹری فنڈ ءِ گوما استیں پروگرام ءِ بابت ءَ ھم سرپد کت۔ آئی ءَ گوشت کہ حکومت پروگرام ءِ مول ءُ مراد آنی سر ءَ سر بوھگ ءُ ڈھانچہ ءِ اصلاحات آناں دیم ءَ برگ ءِ واستہ جزم اِنت ھاسیں رنگ ءَ ٹیکس پالیشی، آمدنی ءِ یکجا کنگ، جوانیں حکومت داری ءُ ادارگی شفافیت ءِ پڑ آنی تہ ءَ۔ آئی ءَ گوشت کہ حکومت ءِ دلگوشی ڈیٹا ءِ سر ءَ بنیات ءِ سر ءَ نگرانی ءُ جوانیں رنگ ءَ تعمیل ءِ وسیلگ ءَ ٹیکس نیٹ ءَ را گیش کنگ اِنت، وھدیکہ شوبگ آنی تہ ءَ انصاف ءَ را دل یکیمی کنگ اِنت۔ وزیر خزانہ ءَ گوشت کہ پاکستان ءِ کلیدی اقتصادی اشارہ استحکام ءُ وشھالی ءِ درشان کنگ ءَ انت، رواں مالی سال ءِ اولی سہ ماہی ءَ اقتصادی دیمروئی ءِ شرح 3.7درسد بوتگ، وھدیکہ مزنیں صنعت آنی پیداوار ءِ تہ ءَ گہتری ءُ کشت ءُ کشاری شوبگ ءِ تہ ءَ مھکمی بوتگ۔ آئی ءَ اے گپ ءِ سر ءَ زور پر دات کہ حکومت نوں اقتصادی استحکام ءِ پڑ ءَ چہ دیم ءَ روگ لوٹ ایت ءُ پائیدار ءُ ھواریں دیمروئی ءِ نیمگ ءَ روگ لوٹ ایت، وھدیکہ بے روزگاری ءُ گریبی ءِ وڑیں چاگردی جیڈھ آنی گیواری ھم اولی ترجی اِنت۔ برطانوی ہائی کمشنر ءَ اقتصادی اصلاحات ءِ ھاتر ءَ حکومت ءِ عزم ءِ توسیپ کت ءُ پاکستان ءَ اقتصادی استحکام ءُ دراجیں مدتی دیمروئی ءِ ھاتر ءَ برطانیہ ءِ برجاھیں کمک ءِ یک رند ءَ پدر کت۔ آئی ءَ گوشت کہ برطانیہ پاکستان ءِ دیمروئی ءُ اقتصادی بدلی ءِ تہ ءَ یک مھکمیں شریک اِنت ءُ اصلاحات ءِ گامگیج، جندی شوبگ ءِ ھوار بوھگ ءُ ٹیکنیکل کمک ءِ وسیلگ ءَ کمک ءَ را برجاہ دار ایت۔ آئی ءَ سرمایہ کار آنی اعتماد ءَ را گیش کنگ ءِ سر ءَ ھم زور پر دات، ھاسیں رنگ ءَ کان کنی ءُ معدنی وسیلگ آنی شوبگ ءَ۔ فریق آنی تہ ءَ استحکام، جوانیں حکومت داری، قدرتی وسیلگ آنی وسیلگ ءَ چہ زرباری دمگ آنی تہ ءَ برجمیں دیمروئی، میاں اوستمانی سرمایہ کاری ءِ راجینگ ءُ ھواریں اقتصادی دیمروئی ءِ سر ءَ ھم تپاک کنگ بوتگ۔ وزیر خزانہ ءَ پاکستان ءِ اصلاحات ءِ حکمت عملی ءِ تہا برطانیہ ءِ برجاھیں ھوار بوھگ ءُ کمک ءِ وش اتک کت۔ آئی ءَ یک رندے پدا گوشت کہ پاکستان پالیسی ءِ تسلسل ءَ را برجائی، گورننس سسٹم ءَ را مھکم کنگ ءُ ملکی ءُ درملکی سرمایہ کاری ءِ واستہ توانمندیں چاگرد ءِ جوڑ کنگ ءِ واستہ جزمیگ اِنت۔ فریق آناں پاکستان ءُ برطانیہ ءِ نیام ءَ اقتصادی کمک ءَ را گیش دیمروئی دیگ ءُ اقتصادی ءُ دیمروئی ءِ ترجیحات ءِ سر ءَ نزیکیں رابطہ ءِ برجائی ءِ واستہ وتی جزم ءِ ھم پدر کت۔