وزیراعظم شہباز شریف نا کماشی ٹی پارلیمانی جماعت آتا راہشون تا دیوان، پاکستان نا سفارتی کوشست آتا ستاء، بشخ ہلوک آتا دہشت گردی نا چٹفنگ کن سوگو عزم انا درشان

اسلام آباد۔ 04 مارچ (اے پی پی) قومی اسمبلی و سینیٹ اٹی چندی پارلیمانی جماعت آک ساڑی آ حالیت آتیٹی ملی سیوت و امنا و اسٹی نا گرج آ زور شاغسا ڈیہہ اٹی امن کن پاکستان نا سفارتی کوشست آتا ستاءِ کرینو  واوفتے پین ترند کننگ نا گرج آ زور شاغانو۔ وزیراعظم محمد شہباز شریف نا کماشی ٹی پارلیمانی جماعت آتا راہشون و نمائندہ غاتا دیوان چارشنبے نادے آ داڑے مس۔ وزیراعظم آفس نا میڈیا ونگ انا کنڈآن جاری بیان نا رداٹ دیوان ءِ پاکستان اوغانستان حالیت، ایران، دے ٹک نیامی و خلیج اٹی بے چیٹی وپاکستان نا سفارتی کوشست آتا بابت اِن کیمرہ حوال تننگا۔ بیان نا رداٹ دیوان اٹی شریک سیاسی جماعت آتا پارلیمانی راہشونک تینا خیال آتاآجوئی اٹ درشانی ءِ کریر۔ بشخ ہلوک آک ساڑی آ حالیت آتیٹی ملی سیوت، امنا و اسٹی نا گرج آ زور شاغسا ڈیہہ اٹی امن کن پاکستان نا کنڈآن سفارتی کوشست آتا ستاءِ کریر، اوفتے پین ترند کننگ نا گرج آ زور شاغا و آخبت نا لائحہ عمل آ سلاہ پیش کریر وخت اس کہ ملک آن دہشت گردی نا چٹفنگ کن غٹ بشخ ہلوک آک سوگو عزم انا درشانی ءِ کریر۔ بشخ ہلوک آک پاکستان نا گیشتر مفاد اٹی غٹ سیاسی سرکڑدہ غاتے پت اٹ ہلنگ نا وزیراعظم نا گا م انا ستاءِ کرسا اونامنت واری ءِ ہرفیر۔