بنجائی وزیر احسن اقبال نا انرجی چائنہ پاکستان نا ہیڈکوارٹر نا دورہ، ایگزیبیشن ہال نا معائنہ اور سی پیک نا رداٹ توانائی نا بشخ اٹی دوئی مروک اہم مزل آتا جاچ ءِ ہلک

اسلام آباد۔ 04مارچ (اے پی پی) بنجائی وزیر ڈٹ بندی، شونداری، اصلاحات و خصوصی گام گیج پروفیسر احسن اقبال چارشنبے نا دے آانرجی چائنہ پاکستان نا ہیڈکوارٹر اسلام آباد نا دورہ ءِ کرے، ہراڑے اودے جم وجوش اٹ بخیر کننگا۔ فریق آک اسٹریٹجک شریداری نا عزم انا درشانی ءِ کریر ۔ بنجائی وزیر ایگزیبیشن ہال انا معائنہ ءِ کرے اور سی پیک نا رداٹ توانائی نا بشخ اٹی دوئی مروک اہم مزل آتا جاچ ءِ ہلک ۔ دا وخت آ تین پہ تینی کمکاری ، برجا ء ڈٹ آتیا پیش رفت و آخبت نا حکمت عملی نا بارواٹی گپ وتران کننگا۔اوکان پد سی ای ای سینا سرکڑدہ و پراجیکٹ ٹیم آتون اسہ بڑزکو کہولی دیوان اس مس ہراٹی سکھی کناری ہائیڈرو پاور پروجیکٹ ، داسو ہائیڈرو پاور پروجیکٹ ، مہمند ڈیم ونیلم جہلم ہائیڈرو پاور پروجیکٹ تون اوار ڈٹ آتیا پیش رفت نا سرجمی اٹ جاچ ءِ ہلنگا ۔ دا ڈٹ آتا کمک اٹ پن بجلینا شونداری ءِ ترند کرسا توانائی نا رکھ اور سوز شوندارینا اسیجائی عزم ءِ سی پیک نا ارٹ میکو ریسہ نا رداٹ پین سوگو کننگ انگ ءِ ۔ دیوان اٹی دا ہیت آ زور شاغنگا کہ دا ڈٹ آتا وخت آ پوروی آن توانائی نا رکھ ءِ پک کننگ وسوزو پائیدار شونداری نا ہدف آتا دوئی کننگ اٹی کمک رسینگک۔پروفیسر احسن اقبال پالیسی نا چرجوئی ، زرکاری نا رکھ اور شفاف عملدرآمد نا عزم انا درشانی ءِ کرسا پارے کہ حکومت سی پیک نا ارٹ میکو ریسہ نا رداٹ صنعتی کمکاری ، گرین انرجی و علاقائی رابطہ غاتا مون آ دننگ آ خصوصی چکار کننگ انگ ءِ ہراڑان زرکارآتا پت پین سوگو مریک۔ اونا پاننگ ئس کہ دا دورہ پاکستان و چین نا نیام اٹ سوگو تعلقداری ، پائیدار شونداری و علاقائی شونہالی نا کنڈآ اسیجا پیش رفت نا عکاس ءِ ۔