وزیر اعظم نا ہولی نا وخت آ ہندو برادری ءِ مبارکباد، دا تہوار پاکستان نا دود و ربیدہ  ئی تنوع نا درشانی و راجی ہم گرنچی نا ڈیک ءِ ، محمد شہباز شریف

اسلام آباد۔ 04مارچ (اے پی پی) وزیر اعظم محمد شہباز شریف ہندو تا مذہبی تہوار ’’ہولی‘‘ نا وخت آ ہندو برادری ءِ مبارکبادی ترسا پارے کہ دا تہوار پاکستان نا دود و ربیدہ ئی تنوع نا درشانی اور راجی ہم گرنچی نا ڈیک ءِ۔ ہندو برادری ننا راج انا بیش قدر بشخ ءِ ہرا نا راجی ہم گرنچی ،زرگزرانی شونداری و شونہالی و پرامن بقائے تین پہ تینی ٹی جوان ءُ کڑد اسے ۔داخیال آتا درشانی او ہولی نا وخت آ تینا کلہو اٹی کرے۔ پی ایم آفس نا میڈیا ونگ آن جاری بیان نا رداٹوزیر اعظم محمد شہباز شریف پارے کہ اینو (چارشنبے نادے ) ہندو تا مذہبی تہوار ہولی نا وخت آ او پاکستان نا ہندو کمیونٹی کن نیک است خواہی تا درشانی ءِ کیک۔ او پارے کہ ہولی نا تہوار خوش نما رنگ آتا اواری تون راجی ہم گرنچی نا عکاسی ءِ کیکاونا روایت آک پاکستان نا دود و ربیدہ ئی تنوع نا درشانی ءُ ۔اوناپاننگ ئس کہ ہندو کمیونٹی ننا راج انا بیش قدر بشخ ءِ ہرانا ملکی راجی ہم گرنچی،زرگزرانی شونداری و شونہالی و پرامن بقائے تین پہ تینی ٹی جوان ءُ کڑد اسے۔ وزیر اعظم محمد شہباز شریف پارے کہ پاکستان نا آئین بے پرخ رنگ و نسل، مذہب و عقیدہ غٹ شاری تیکن مذہبی آجوئی اور انسانی حق آتا رکھ ءِ کیک۔ او پیدوار کرے کہ حکومتِ پاکستان غٹ اقلیت آتا آئینی حق آتا رکھ ءِ کروک ءِ، دا رداٹ حکومتی گام گیج آتیٹی پالیسی بین المذاہب ہم گرنچی (2025) و حکمت عملی مذہبی سگ (2025) نمان ءُ۔ وزیر اعظم محمد شہباز شریف بین المذاہب ہیت و گپ، عبادت گاہ تا رکھ و تین پہ تینی شرف نا راجی وڑ وڑوڈل نا مون آ دننگ کن مچ آ قوم ءِ اواری اٹ کاریم کننگ نا گرج آ زور شاغسا سلہ خلک کہ ببو اینو دا قومی عزم انا پوسکنی ءِ کین کہ نن رواداری، ہمدردی و یکجہتی نا قدر اتون پرامن ، اسیجا و شونہال آخبت کن اواری اٹ کوشست آتے برجاتخنہ۔