امریکہ و ایران نا نیام اٹ ودوک آ بے چیٹی اسہ باقاعدہ و مرغن ءُ جنگ اسے نا دروشم اختیار کرینے، چیئرمین قائمہ کمیٹی دفاعی پیدوار سینیٹر محمدعبدالقادر

کوئٹہ۔ 04 مارچ (اے پی پی) چیئرمین قائمہ کمیٹی دفاعی پیدوار سینیٹر محمدعبدالقادر پارینے کہ امریکہ و ایران نا نیام اٹ ودوک آ بے چیٹی اسہ باقاعدہ و مرغن ءُ جنگ اسے نا دروشم اختیار کرینے ٹرمپ انا ساڑی آ پالیسی و بیان ایران نا برخلاف جنگ ءِ چٹفنگ نا موڈ اٹی اف ٹرمپ و نیتن یاہو نا آمخی جنگی حکمت عملی و ڈیہہ اٹی ایران نا اثرورسوخ ءِ توننگ نا است خواہی دا جھیڑہ ءِ جنگ انا دروشم تننگ اٹ اہم کڑد ادا کرینے۔ داوخت محسوس مریک کہ ٹرمپ اتون دا جنگ ءِ چٹفنگ نا بابت ہچ ءُ پیدوار حکمت عملی اس اف ۔ دا جنگ ہندن ہندن مرغنی اختیار کرسا کیک اونا سوب آن پیچیدگی ودسا کاہک۔ دا جنگ فضائی جلہو آتسکان محدود سلپک  بلکن دانا دنگ خلیج فارس، عراق، شام و لبنان آن مرسا برطانیہ، فرانس، و جرنی اسکان تالان مننگ کیک۔ برطانیہ ، فرانس و جرمنی ایرانی میزائل پروگرام ءِ چٹفنگ کن ایران آ جلہو نا دھڑکو تسنو، ایران نا ورندی جلہو آن دا جنگ یورپ  نا تہہ ٹی سرمریک ہراڑآن بھسکاری نا دنگ ودک۔ داڑے جاری مروک اسہ بیان اسے ٹی چیئرمین قائمہ کمیٹی دفاعی پیداوار سینیٹر محمد عبدالقادر مستی پارے کہ  امریکہ و اسرائیل نا عسکری لائخی، میزائل پروگرام و ڈیہہ اٹی اونا سیوتی دا جنگ ءِ مرغن و پیچیدہ جوڑ کننگ ءُ۔ جنگ مرغن مریک تو اونا نتیجہ ٹی دسی ہزار بندغ آتا جان زیان مریک و ارب آ ڈالر نا زرگزرانی نسخان یقینی مریک۔ تیل انا جہانی منڈی ٹی شدید شیف و بڑزی ، سمندری کسر تا بے رکھ و توانائی تنکی جہانی زرگزران ءِ بھاز بے وڑ زہمی کیک، ایران تون امریکہ و اسرائیل ء ہم دا جنگ انا بھلو قیمت اس کنوئی تمک۔ ایران گمانی وڑاٹ براہ راست یا بالواسطہ ردعمل نا کمک اٹ ڈیہہ اٹی امریکی و اسرائیلی فائدہ غاتے شست کننگ نا لائخی تخک، ہراڑآن جہانی کہول آ نزوری ٹی پین ودکی مریک۔ پامداری نا خواست ہندادے کہ واک انا جاگہ غا سفارتکاری ءِ موقع تننگے، ورنہ داخاخر نا تیرونک آ ک کروڑ آ انسان تے تینا پلویڑ اٹی ہلیرہ۔