بنجائی وزیر پیٹرولیم تون سعودی سفیر نا اوڑدہی، پاکستان ءِ کوینبع بندرگاہ غان تیل سپلائی نا سیکورٹی نا باوری

اسلام آباد۔ 04 مارچ (اے پی پی) بنجائی وزیر پیٹرولیم علی پرویز ملک تون پاکستان اٹ سعودی عرب نا سفیر نواف سعید المالکی اوڑدہی کرے ہراٹی تین پہ تینی است خواہی نا امور و ہڑتوم آ کنڈآتا کمکاری آ گپ وتران کننگا۔ ترجمان پیٹرولیم ڈویژن نا رداٹ بنجائی وزیر سعودی سفیر ءِ ساڑی آ حالیت و آبنائے ہرمز نا بندش نا جہانی توانائی منڈی تیا اثرآتا بابت معلومدار کرے۔ اوپارے کہ پاکستان ہڑدے ئی بنداو آ بدل مروک حالیت آتا خوڑتی اٹ جاچ ءِ ہلنگ ءِ انتئے کہ پاکستان ایندھن نا بھلا بشخ انا ترسیل آبنائے ہرمز نا کمک اٹ مریک۔ اوپارے کہ حکومت پاکستان تینا الس کن توانائی نا فراوانی نا چرجوئی نا تسلسل ءِ پک کننگ کن فعال گام گیج کننگ اٹی ءِ۔ اوپارے کہ مشکل حالیت آتیٹی سعودی عرب کون آ ایلم ملک انا مخ تفی پاکستان کن بھاز اہمیت تخک۔ اومستی پارے کہ سعودی حوالی بحیرہ احمر اٹی واقع سعودی بندرگاہ ینبع نا کمک اٹ سپلائی نا سیکورٹی نا باوری کرفینے ہرا توانائی نا گرج آتے پورو کننگ اٹ کمکار جوڑ مننگ کیک ۔ علی پرویز ملک سعودی عرب نا پدریسہ مخ تفی آ منت واری نا درشانی ءِ کرے وپارےکہ سعودی عرب مہالو آن پاکستان نا کمک ءِ کننگ اٹی ءِ۔