تکریمِ قرآن نا پوسکن آجہانی بشخ ، پاکستان اٹی اولیکو سٹیٹ آف دی آرٹری سائیکلنگ پلانٹ نا تیاری پورو، سردار محمد یوسف نا زوت آن زوت فعال کننگ نا پارت

اسلام آباد۔ 04مارچ (اے پی پی) بنجائی وزیر مذہبی امور و بین المذاہب ہم گرنچی سردار محمد یوسف اسلام آباد اٹی جوڑ ملک انا اولیکو قرآن ری سائیکلنگ پلانٹ نا دورہ ءِ کرے اور اودے زوت آن زوت فعال کننگ نا پارت جاری کرینے۔ دا ڈٹ انا مسخت ضعیف و شہید مقدس انگا پنہ غاتے شرعی اصول آتا رداٹ رکھ کننگ و اوفتے دُوارہ کاریم اٹ اتنگ نا قابل جوڑ کننگ ءِ ۔ قرآن ری سائیکلنگ پلانٹ نا دورہ نا وخت آ بنجائی وزیر مذہبی امور سردار محمد یوسف "اے پی پی” تون گپ وتران کرسا پارے کہ مچ آ ملک اٹی شہید پنہ اور ضعیف نسخہ غاتا رکھ ءِ کننگ کن جاگہ نا کمتی ئس، ہرا سوب آن بے شرفی نا گڑتی مسکہ ۔ دا پلانٹ نا جوڑ کننگ وخت نا اسہ اہم ءُ گرج اس ئس۔او پارے کہ پلانٹ خلنگ آن مست جید عالم دین آتیان باقاعدہ فتویٰ ہلنگانے تانکہ ری سائیکلنگ نا مچ آ عمل شرعی خواست آتا رداٹ مرے۔بنجائی وزیر سردار محمد یوسف پارے کہ مچ آ پاکستان آن مقدس آ پنہ و نسخہ غاتے داڑے اتنگک، ہراڑے اوفتے پوسکن آسائنسی وڑ اٹ ری سائیکل کرسا اوفتا سیاہی اور کاغد ءِ رکھ کننگک۔ او پارے کہ دا پاکستان نا اولیکو بھلا پروجیکٹ ءِ ہرا سرکاری کہول آ وزارتِ مذہبی امور نا بست وبند اٹی پورو مسنے و بھاز زوت فعال مریک۔وزارتِ مذہبی امور نا پٹ وپولی بشخ و مراجع نا ڈائریکٹر جنرل حافظ عبدالقدوس اے پی پی تون ہیت و گپ کرسا ڈٹ انا تکنیکی اور انتظامی سرجم آتے پارسا پارے کہ دا پروجیکٹ کن صوبائی اوقاف ڈیپارٹمنٹ ، قرآن بورڈز اور اسلامی نظریاتی کونسل تون اوار غٹ اسٹیک ہولڈرز آتون اسہ مرغن ءُ سلابت اس کننگا نے ۔ او پارے کہ پلانٹ کن پوسکن ءُ مشینری چائنہ غان خواہفینن ، ہرادے شریعت ءِ مون آ تخسا جوڑ کروک قاعدہ و ضابطہ و آداب ءِ مون آ تخسا چلیفنگک ۔