پاکستان ایران تون اوار سلوک ءِ، مذاکراتنا کمک اٹ ایسر کننگ نا کوشست آک جاری ءُ، نائب وزیراعظم اسحاق ڈار

اسلام آباد۔ 03مارچ (اے پی پی) نائب وزیراعظم و وزیرِ خارجہ سینیٹر محمد اسحاق ڈار پارینے کہ پاکستان است و جان اٹ ایران تون اوار سلوک ءِ، ملک انا تہہ ٹی دا باندات ءِ غلط رنگ تننگ جوان اف، فریق آتے مذاکرات نا میز آ اتنگ کن پاکستان پدریسہ کوشست کننگ اٹی ءِ ۔سے شنبے نا دے آسینیٹ نا دیوان اٹی ہیت و گپ کرسا او پارے کہ 28 فروری آ پاکستان ایران آ جلہو نا حالیت آتیا اولیکو باضابطہ ردعمل تس، وخت اس کہ آیت اللہ علی خامنہ ای نا شہیدی آ وزیراعظم شہباز شریف یکم مارچ آ ہڑزخواہی بیان اس جاری کرے۔ وزیرِ خارجہ پارے کہ پاکستان ہر فورم آ دا موقف ءِ ہرفے کہ دا جھیڑہ جہانی کانود و ہیت و گپ نا کمک اٹ بایدے ایسر مرے۔اسحاق ڈار مستی پارے کہ تدوک آ مسہ دے تیٹی چندی آتتون رابطہ کننگا و عمان نا وزیرِ خارجہ تون ہم ہیت و گپ مس، ہراٹی دا اومیت ظاہر کننگا کہ مذاکرات نا کمک اٹ جھیڑہ ایسر مننگ کیک۔ او یات کرفے کہ جون اٹی ہم ایران آ جلہو مسوسس و ہمو وخت ہم پاکستان ترکیہ، سعودی عرب، متحدہ عرب امارات، قطر و یورپی یونین تون اوار چندی ملک آتتون رابطہ کرین تانکہ باندات ءِ ایسر کننگ مرے۔او زور شاغا کہ ایران پاکستان نا ایلم اسلامی و ہمسایہ ملک ءِ و پاکستان تینا زمواری ءِ پورو کننگ اٹی ءِ و پورو کرسا کیک۔ وزیرِ خارجہ پارے کہ ایران تینٹ پیدوار کرینے کہ او جوہری سلہہ (ہتھیار) جوڑ کپک و غٹ جھیڑہ غاتا ایسر ہیت و گپ و سفارتی کسر اٹ کشنگک۔ پاکستان نا ثالثی نا پیشکش آ ایران نا ورندی مثبت ئس۔اسحاق ڈار پارے کہ امریکہ و اسرائیل نا کنڈ آن ایران آ جلہو و ایران نا کنڈ آن ورندی ٹی خلیجی ملک آتیا جلہو آن پد ہرا حالیت آک ودی مسر، اوڑآ پاکستان صاف ءُ پالیسی اس اختیار کرے۔ پاکستان جوہری توانائی نا پرامن کاریم اٹ اتنگ نا حق اٹی ایران نا مخ تفی ءِ کرے و مچ آ دنیا ٹی اسٹ انگا ملک مننگ نا شرف ءِ دوئی کرے ہرا ایران آ جلہو نا کھلے عام مذمت ءِ کرے۔او پارے کہ 12 سال آن پد اقوامِ متحدہ نا سلامتی کونسل اٹی امنائی سلاہ اٹ قرارداد اس پاس مس، ہراٹی ایران آن پابندی تے اینک کننگ نا پاننگا ۔ پاکستان 28 فروری آ سکیورٹی کونسل نا ہلہلہ ئی دیوان ءِ بٹنگا وایران آ جلہو نا مذمت ءِ کرے۔ او پیدوار کرے کہ حکومت ڈیہہ اٹی سوگوی ءِ برقرار تخنگ و جھیڑہ غاتے سفارتی وڑ اٹ ایسر کننگ نا کوشست آتیٹی پورو وڑاٹ لگوک ءِ ۔