پیپلز پارٹی ملکی جوڑ جاڑ و شونہالی کن اہم فیصلہ غاتیٹی حکومت تون ہر گام آ تفینے ، وزیراعظم محمد شہباز شریف

اسلام آباد۔ 03مارچ (اے پی پی) وزیراعظم محمد شہباز شریف پاکستان پیپلز پارٹی ءِ حکومت نا اسہ اہم ءُ سیوتی جماعت اس گوندسا پارینے کہ ملک انا جوڑ جاڑ و شونداری نا اہم فیصلہ غاتیٹی پیپلز پارٹی حکومت تون ہر گام تفینے۔وزیراعظم آفس نا میڈیا ونگ نا کنڈ آن جاری بیان نا رد اٹ، وزیراعظم دا خیال آتا درشانی ءِ پاکستان پیپلز پارٹی پارلیمنٹیرینز نا اسہ ڈل اسے  تون گپ و تران کرسا کرے، ہرا سے شنبے نا دے داڑے اوڑتون اوڑدہی کرے۔دا اوڑدہی ٹی نائب وزیراعظم و وزیرِ خارجہ سینیٹر محمد اسحاق ڈار، بنجائی وزیر احسن اقبال، اعظم نذیر تارڑ و وزیراعظم نا سلاہکار رانا ثناء اللہ ئسک ہم ساڑی ئسر، وخت اس کہ پیپلز پارٹی نا ڈل اٹ سینیٹر شیری رحمان، راجہ پرویز اشرف، سید نوید قمر و اعجاز جاکھرانی ئسک اوار ئسر۔وزیراعظم ڈل اتون ہیت و گپ کرسا پاکستان پیپلز پارٹی نا حکومت نا اہم ءُ سیوتی جماعت اس مننگ آ منت واری ءِ ہرفے۔ دیوان اٹ ساڑی آ ملکی سیاسی حالیت آتیا سلابت کننگا۔ داکن بیدس، ڈیہہ انا حالیت آتیا ہم گپ و تران مس۔