ساڑی آ چیلنج آتون مون تننگ کن قومی سیوت، تین پہ تینی شرف و سنجیدہ ہیت و گپ المی اے، ڈپٹی چیئرمین سینیٹ سیدال خان ناصر

اسلام آباد۔ 03مارچ (اے پی پی) ڈپٹی چیئرمین سینیٹ سیدال خان ناصر پارینے کہ ساڑی آ چیلنج آتون مون تننگ کن قومی سیوت ، تین پہ تینی شرف و سنجیدہ ہیت و گپ المی ءِ ، سیاسی سرکڑدہ ئی و ریاستی ادارہ غاک ملک انا زرگزرانی سوگوی و پائیدار شونداری کن تینا کڑد ءِ ادا کرسا کیرہ ۔دا خیال آتا درشانی ءِ او مسلم لیگ (ن) پنجاب نا نائب صدر شیخ ارسلان حفیظ نا کنڈآن تروک آ اسہ افطار ڈنر اسے ٹی بطور مہمان خاص تران اٹی کرے ۔ دود اٹی وزیراعظم نا سلاہکار سیاسی امور سینیٹر رانا ثناء اللہ، بلوچستان نا مسکوہی وزیراعلیٰ عبدالقدوس بزنجو، سینیٹر ناصر بٹ،مسکوہی سینیٹر مشاہد حسین سید، چندی ملک آتا سفیر آک و ملک نا پنی آ سیاسی و راجی شخصیت آک بشخ ہلکر ۔ڈپٹی چیئرمین سینیٹ ملک انا شونداری ، شونہالی ، سوگوی و قومی یکجہتی کن تینا نیک ا است خواہی تا درشانی ءِ کرسا پارے کہ ساڑی آ چیلنج آتون مون تننگ کن قومی سیوت ، تین پہ تینی شرف و سنجیدہ ہیت و گپ المی ءِ ۔ او دا عزم انا درشانی  ءِ کرے کہ سیاسی سرکڑدہ ئی و ریاستی ادارہ غاک تین پہ تینی کمک اٹ پاکستان ءِ زرگزرانی سوگوی و پائیدار شونداری نا کسر آ دننگ کن تینا پبی کڑد ءِ ادا کرسا کیرہ ۔افطار ڈنر نا وخت آ بشخ ہلوک آک ملکی و علاقائی سکیورٹی نا حالیت، سیاسی منظرنامہ و اسہ ایلو نا است خواہی نا باندات آتیا ہیت و گپ کریر۔ ترانکار آک دا ہیت آ زور شاغار کہ سیاسی ہم گرنچی و سلابت نا عمل ءِ مون آ دننگ آن ہی ملک ءِ مون تروک آ ویل آتا آخبتی و جوان ءُ ایسر اس ممکن ءِ ۔میزبان شیخ ارسلان حفیظ شرفمند آ مہمان تا بننگ آ منت وار ی ہرفسا پارے کہ دا وڑ نا وخت آک قومی یکجہتی نا مون آ دننگ و مثبت سیاسی روایت آتے سوگو کننگ اٹاہم ءُ کڑد اس ادا کیک ۔