غیر کانودی امیگریشن نا برخلاف پاکستان نا اسہ بھلو سفارتی سرسہبی اس، بنجائی وزیر داخلہ محسن نقوی نا 3 یورپی ملک آتا وزراء داخلہ غاتون اوڑدہی، کانفرنس اٹی شرکت

روم۔  26 فروری(اے پی پی) غیر کانودی امیگریشن نا توننگ کن پاکستان و یورپی ملک آتا نیام اٹ اہم پیش رفت اس مون آ بسنے۔ بنجائی وزیر داخلہ محسن نقوی روم اٹی اٹلی و اسپین نا وزیر داخلہ و یونان نا وزیر مائیگریشن تون اسہ اہم چار ملکی کانفرنس اسے ٹی بشخ ہلک، ہراٹی انسانی سمگلنگ و غیر کانودی ہجرت نا چٹفنگ کن جوان ءُ فیصلہ کننگا۔وزارت داخلہ نا ترجمان نا رداٹ اٹلی، اسپین و یونان غیر کانودی امیگریشن اٹی 47 درسد کمتی اتنگ آ پاکستان نا کوشست آتے زبردست خراج تحسین پیش کریر ۔ وزیر داخلہ محسن نقوی نا سلاہ غا ہر مسٹ آ یورپی ملک آک دا ہیت آ امنا کریر کہ غیر کانودی کسر تا جاگہ غا کانودی وڑ ءُ ڈول ءِ مون آ درسا انسانی سمگلنگ ءِ توننگک ۔ہر چارآملک آک غیر کانودی امیگریشن، انسانی سمگلنگ و منشیات نا برخلاف اسہ سوگوءُ حکمت عملی و اسیجائی پالیسی فریم ورک اس تینا کننگ آ امنا کریر۔ دیوان اٹی دا فیصلہ کننگا کہ سنگین ڈوہ اٹی اوار کسبی ڈوہدار آتے یورپ آن پاکستان آ پدی اتنگک ، ہراڑے اوفتا برخلاف کانود نا رداٹ سخت کارروائی مریک۔اطالوی وزیر داخلہ میٹیو پینٹے ڈوسی و اسپین نا وزیر داخلہ فرنینڈو گرینڈے مارلاسکا محسن نقوی نا کماشی ٹی پاکستانی ادارہ غاتا مثالی ایکشن آتا ستاءِ کرسا  پاریر کہ پاکستان دا چیلنج تون مون تننگ  کن گچین گام گیج کرینے ۔ یورپی یونین نا کمک اٹ پاکستان نا کاریم نا کچ ءِ ودفنگ کن پبی کمکاری  نا ہم باوری کرفنگا۔وزیر داخلہ محسن نقوی نا پاننگ ئس کہ یورپ غیرکانودی امیگریشن آن کل آن زیات زہمی ءِ ۔ دا چیلنج نا چٹفنگ  اسہ اسیجائی و موثر میکنزم نا کمک اٹ ہی ممکن ءِ ۔ نن مافیا تے کانود نا گرفت اٹی ہتنگ کن سخت گام گیج کرینن۔ کانفرنس اٹی فیصلہ کننگا کہ ہرچار آملک آتا بروک آ دیوان ہندا سال پاکستان اٹی مریک۔ دمدستی ردعمل نا نظام (Rapid Response System) ءِ پین گچین کننگک۔ ہڑتوم آ کنڈآتا کمک و کوآرڈینیشن ءِ شیفکوکہول اسکان جوان کننگک۔ دا اہم آ اوڑدہی ٹی پاکستانی سفیر علی جاوید، ڈی جی ایف آئی اے ڈاکٹر عثمان انور و ایلو بھلا کمامدار ہم ساڑی ئسر۔