اقوام متحدہ نا امن فوجی تا رکھ اکن دمدستی گام گیج المی ، پوسکن تکنیکی خطرہ غاک ودانو،  عاصم افتخار احمد

نیویارک۔ 26 فروری (اے پی پی) اقوام متحدہ نا امن مشن تیٹی دنیا نا غٹ آن بھلا فوجی شریدار آتیٹی اوار پاکستان امن فوجی تیکن ودوک آ خطرہ غاتا بابت سخت انتباہ جاری کرینے ۔ اقوام متحدہ ٹی پاکستان نا آخبتی مندوب عاصم افتخار احمد پارے کہ دشمن زموار آتا کنڈ آن ڈرونز و ایلو پوسکن آ ازباب آتا کاریم اٹ اتنگ خطرہ نا چاگڑد ءِ بدل کرینے ۔او نیویارک اٹی اقوام متحدہ نا ہیڈکوارٹرز اٹی اڈہلوک اسہ دود اسے ٹی تران کرسا پارے کہ امن فوجی تیکن چاگڑد پیچیدہ، بے سوگو و ہلاکت خیز مننگ اٹی ءِ۔ او پارے کہ ننا ورندی ہم ہندا وڑاٹ، مربوط و اجتماعی بایدے مرے ۔ اوپارے کہ اقوام متحدہ نا جتا جتا مشن تیٹی پاکستان ناداتم اسکان  182 امن فوجی شہید مسنو، و سویلی سوڈان، جمہوریہ وسطی افریقا، کانگو و لبنان و اسرائیل نا سیم آ ساڑی آ امن فوجی کارندہ غاک ساڑی ءُ ، کن سلامتی نا خطرہ غاک ودنگ اٹی ءُ۔پاکستانی مندوب کادُگلی ٹی ساڑی آ ڈرون جلہو نا حوالہ ءِ ترسا پارے کہ داٹی 6 بنگلہ دیشی امن فوجی زوال کریر، دا ظاہر کیک کہ پوسکن آ ٹیکنالوجی نا کاریم اٹ اتنگ غیر ریاستی عنصر آک کننگ اٹی ءُ ہراڑآن جلہو گیر آتا شناخت و جوابدہی مشکل مریک ۔ او زور شاغانے کہ پوسکن آ ٹیکنالوجی خطرہ غاتے ودفک ولے دا ایسر نا ہم اسہ بشخ  اس ارے۔ دا بابت اٹ غیر مسلح فضائی نظام (Counter-UAS) نا لائخی ، گچین الرٹ سسٹم، پوسکن آ نگرانی و ڈیٹا غا تالان خطرہ غاتا جاچ امن فوج انا رکھ کن المی ءِ۔پاکستانی سفیر دا ہیت ءِ پیدوار کرے کہ رکھ و سلامتی نا اصول دابایدے مرے کہ مشن نا مینڈیٹ ءِ المی لائخی و وسیلہ غا تون ہم گرنچ کننگے۔ او پارے کہ رکھ و سکیورٹی نا بناء اسہ سادہ ءُ اصول اسے آن بایدے مرے ہراٹی مینڈیٹ ءِ المی لائخی و وسیلہ غاتون بایدے ملفنگے ۔