پاکستان نا جمہوریہ نیامی افریقہ  ٹی ساڑی آ گچین کاری تا خیرمقدم، پدریسہ نازرک حالیت آتے سوگو کننگ کن جہانی کمکاری المی ءِ ، سفیر عثمان جدون

اقوام متحدہ۔ 26 فروری (اے پی پی)  پاکستان جمہوریہ نیامی افریقا ٹی دسمبر 2025ء ٹی مروک آ صدارتی، پارلیمانی، علاقائی و بلدیاتی گچین کاری تا خیرمقدم کرسا خبڑدار کرینے کہ ساڑی آ سال تیٹی دوئی مروک پیش رفت پدریسہ نازرک ءُ، ہرافتے سوگو کننگ کن جہانی کمکاری المی ءِ ۔دا ہیت آتے اقوام متحدہ ٹی پاکستان نا نائب آخبتی مندوب سفیر عثمان جدون سلامتی کونسل ٹی جمہوریہ وسطی افریقا نا حالیت آتا بارواٹی شرہ غان تران اٹی کرے۔ او پارے کہ دا گچین کاریک اقوام متحدہ نا کثیر جہتی مربوط استحکام مشن (ایم آئی این یو ایس سی اے) نا لاجسٹک، تکنیکی و سکیورٹی کمکاری آن اڈ ہلکر ، ہرا دا ہیت نا شاہدی ءِ کہ دا مشن سیاسی عمل ءِ مون آ دننگ و سوگوی نا ضامن نا وڑاٹ اہم ءُ کرد اس ادا کننگ اٹی ءِ۔او 2019 نا امن معاہدہ غا عمل درآمد، سلہہ بند ٹولی تا چٹفنگ  و ڈی ڈی آر (سلہہ تلفی، غیر فوجی کاری و بحالی) پروگرام اٹی پیش رفت ناخیرمقدم کرے، ولے دے ٹِکی و دے ٹِک-سویلی علاقہ غاتیٹی بدامنی ایلو ماندہ سلہہ زموار آتا ساڑی گری و سوڈان نا اثر آتا تالانی ءِ  گڑتی اس گوندا ۔ او نا پاننگ ئس کہ قومی دفاع و داخلی سکیورٹی نا ادارہ غاتے سوگو کننگ، ریاستی عملداری ءِ ودفنگ و انصاف و مفاہمت نا عمل ءِ مون آ دننگ دیرپاسوگوی کن المی ءِ۔پاکستانی سفیر پارے کہ ایم آئی این یو ایس سی اےسلامتی کونسل نا اسہ سرسہب ءُ درور اسے، ولے پاکستان ءِ بے پرخ مالی کٹوتی آتیا گڑتی ءِ ہرا امن مشن و کونسل نا بنداوی مینڈیٹ ءِ زہمی کننگ کیک۔ اوپیدواری کرے کہ فوجی دستہ تروک آ ملک آتے 30 ستمبر 2025آن کارندہ غاتا خڑچ و 31 دسمبر 2024آن سازوسامان تا مد اٹی ادائیگی موصول متنے، داحالیت آتیٹی فوجی دستہ فراوان کروک آ ملک آک نئے بیرہ انسانی وسیلہ و قربانی تننگ ءُ بلکن مالی بھاریم ءِ ہم سگنگ ءُ وخت اس کہ مینڈیٹ نا ٹہیفنگ یا بدلی نا عمل اٹی اوفتا شمولیت محدود ءِ، جمہوریہ وسطی افریقا نا وتواجہی نا پورو مخ تفی نا درشانی ءِ کرسا پارے کہ پاکستان شریدار آتون اواری اٹ ہموڑے پائیدار امن و سوگوی نا مون آ دننگ کن تینا کڑد ءِ برجاتخک۔