اینو پاکستان ءِ ہرا چیلنج آتا مون تروک ءِ اوفتے تون مون تننگ کن المی ءِ کہ نن تینا صف آتیٹی سیوت و اتفاق ءِ برقرار تخن و بابائے قوم قائد اعظم محمد علی جناح نا روشنا اصول آتے تینا نصب العین تکسا اوفتیا عمل کین، پاکستان مسلم لیگ (ن) نا مرکزی سینئر راہشون و فوکل پرسن پرائم منسٹر یوتھ پروگرام چوہدری نعیم کریم

کوئٹہ۔ 24 دسمبر (اے پی پی)پاکستان مسلم لیگ (ن) نا مرکزی سینئر راہشون و فوکل پرسن پرائم منسٹر یوتھ پروگرام چوہدری نعیم کریم پارینے کہ  اینو پاکستان ءِ ہرا چیلنج آتا مون تروک ءِ اوفتے تون مون تننگ کن المی ءِ کہ نن تینا صف آتیٹی سیوت و اتفاق ءِ برقرار تخن و بابائے قوم قائد اعظم محمد علی جناح نا روشنا اصول آتے تینا نصب العین تکسا اوفتیا عمل کین۔ مسلم لیگ (ن) بلوچستان نا رابطہ آفس آن قائد اعظم محمد علی جناح  نا ودی دے آ تینا اسہ کلہو اسے ٹی چوہدری نعیم کریم پارے کہ برصغیر پاک و ہند انا تاریخ اٹی دادے انا بھاز اہمیت ءِ اینو اسہ ہندن ءُ وژنری راہشون اسے نا ودی مننگ نادے ءِ ہرا تینا اہم دانشمندی، سرکڑدہ ئی و دوراندیشی نا کمک اٹ مسلمان تے غلامی آن نجات ترفے و اسہ آجو و وتواجہ پاکستان اسے نا کسر ءِ آوار کرے۔ اوپارے کہ داوخت آ چندی پیشن و تہہ نا چیلنج آتا مون تروک ءِ ولے قائد اعظم نا پاروک آ تنظیم، سیوت و ڈسپلن نا اصول آتے تینا کرسا نن دا مون تروک مشکل آتے مر کرسا تینا ملک و صوبہ ءِ حقی شونداری و شونہالی نا کنڈآ دننگ کینہ۔ اوپارے کہ قائد اعظم محمد علی جناح ءِ خراج تحسین پیش کننگ کن نن نئے بیرہ اونا اصول آتیا کاربند مرین بلکن تینا ملک و قوم انا گچینی کن مخلصانہ و پبی کوشست کین، ہندا وڑ نن اسہ سرسہب آسودہی ریاست اسے نا جوڑ کننگ نا کسر ءِ آوار کننگ کینہ  ہرا اسہ شونہال و ہم گرنچ پاکستان اسے کن تینا اسلاف نا وژن نا رداٹ مریک۔ چوہدری نعیم کریم پارے کہ پاکستان نا دشمنک وطن ءِ نزوری آن دوچار کننگ نا سازش آتا بناءِ کرینو ولے مچ آ قوم سیوت و امنائی نا کمک اٹ دا سازش آتے بے سہب کننگ کن سنبرینگوک ءُ۔ اوپارے کہ ننا باوہ و پیرہ بھلو قربانی اسے آن پد دا ملک ءِ دوئی کریر و بلوچستان تون اوار مچ آملک انا الس دا قربانی تے زیان مننگ کن الیپک ۔ اوپارے کہ نن اینونادے دا قول کین کہ نن سیاسی و گروہی اختلاف آتے پدپشت تخسا ملک انا سوگوی و قومی سیوت نا مون  آ دننگ کن تینا پبی کڑد ءِ ادا کینہ و قائد اعظم نا تصور نا رداٹ اسہ سوگو جمہوری و شونہال پاکستان نا مزل ءِ ہرحال اٹ دوئی کینہ۔