محمد حنیف عباسی 31 دسمبر ءَ تاں اسلام آباد ءُ تہران ءُ استنبول ءِ ٹرین ءِ سروس ءِ بحال کنگ ءِ جہد ءِ سرا زور دیگ بوھگ ءَ انت

لاہور۔26اکتوبر  (اے پی پی):ریلوے ءِ وفاقی وزیر محمد حنیف عباسی ءَ گوشت کہ پاکستان ریلوے ءَ را نوک جوڑ کنگ ءُ مسافر آناں گہتریں آسراتی پجاری ءِ واستہ سوبمندیں پیشرفت بوھگ ءَ انت۔ یک شمبے ءِ روچ ءَ ریلوے ہیڈ کوارٹر ءَ پریس کانفرنس ءَ گوں تران کنان ءَ وفاقی وزیر ءَ ریل نیٹ ورک ءَ را نوکیں لائن آنی تہ ءَ بدل کنگ ءِ مول ءُ مراد ءَ بازیں مزنیں دیمروئی منصوبگ ءُ گامگیج آنی جار جت۔ آئی ءَ انکشاف کت کہ 31دسمبر ءَ تاں اسلام آباد تہران استنبول ٹرین سروس ءِ بحال کنگ ءِ کوشست سرجمی ءَ برجاہ اِنت۔آئی ءَ گیش کرتگ کہ ازبکستان ءِ گوما یک معاہدے ءَ پد قازقستان ءِ گوما ھمے وڑیں معاہدے ءِ سر ءَ ھلاسی کنگ بوھگ ءَ اِنت، ایشی ءِ چیر دستی ءَ چمن ءَ تاں یک مال برداریں ٹرین ءِ رھادگ کنگ بیت کہ ایشی ءَ چہ کراچی ریل ءِ لائن ءَ گوں ھمگرنچ کنگ بیت۔ ایشی ءَ چہ سینٹرل ایشیا ءُ یورپ ءِ گوما تجارتی سیادی ءِ تہ ءَ گیشی ءِ راہ پچ بیت۔ آئی ءَ ریکو دیک منصوبگ ءِ واستہ 400کلومیٹر ءِ ریلوے ٹریک ءِ جوڑیشت ءِ جار جتگ ایشی ءِ تہ ءَ کل 884کلومیٹر اپ گریڈیشن ءِ کار ھوار بنت۔ آئی ءَ گوشت کہ مزن وزیر محمد شہباز شریف ءِ ھاسیں دلگوشی ءِ سبب ءَ ایشیائی دیمروئی بینک ءِ گوما 500کلومیٹر دراجیں روہری کراچی ٹریک ءِ گہتری ءِ واستہ 2 ارب کلدار ءِ منصوبگ ءِ واستہ ھم گپ ءُ تران بوھگ ءَ انت، ایشی ءِ بُن ھشت آیوکیں سال ءِ جولائی ءَ تاں ایر کنگ ءِ گمان انت۔ وفاقی وزیر ءَ گیش گوشت کہ مین لائن ٹو ءُ روہری پشاور سیکشن ءِ سر ءَ ھم آیوکیں گہتری ءِ واستہ ھیال ءُ لیکہ کنگ بوھگ ءَ اِنت۔ آئی ءَ گوشت کہ کراچی ریلوے اسٹیشن ءَ را لاہور اسٹیشن ءَ چہ گیش مزنیں ءُ نوکیں آسراتی آنی گوما نوکیں رنگ ءَ جوڑ کنگ بوتگ ءُ جوانیں انتظامی ءِ واستہ آؤٹ سورس کنگ بوتگ۔ آئی ءَ گوشت کہ 7نومبر ءَ اپ گریڈ بوتگیں شالیمار ایکسپریس ءِ بنگیج کنگ ءِ واستہ مزن وزیر ءَ را لوٹ دیم دیگ بوتگ، وھدیکہ عوامی ایکسپریس، رحمان بابا ایکسپریس ءُ علامہ اقبال ایکسپریس ءَ را ھم نوکیں کچن، ڈائننگ کار ءُ مزنیں کوالٹی ءِ وردن ءِ گوما اپ گریڈ کنگ بوھگ ءَ انت۔ آئی ءَ گوشت کہ ریلوے کارگو ایکسپریس ءَ چہ 3ارب کلدار ءَ چہ گیش پیداوار ءِ امیت اِنت ءُ مسافر آمدنی ءِ وسیلگ ءَ سبسڈی دیگ ءِ بدل ءَ مال برداری آپریشن ءَ را میاں اوستمانی معیار ءِ رد ءَ آرگ ءِ ضلورت ءِ سر ءَ زور پر دات۔ آئی ءَ گوشت کہ آیوکیں سال ءِ 23 مارچ ءَ تاں 160بندگی جوڑ کتگیں ویگن سسٹم ءَ ھوار کنگ بنت۔ وفاقی وزیر ءَ گیش جار جتگ کہ بدامی باغ ءَ ریلوے ءِ 26 تجارتی پلاٹ اوپن بولی ءِ وسیلگ ءَ نیلام کنگ بنت وھدیکہ 48گاڈاؤن آؤٹ سورس کنگ بنت۔ ڈرائیور ءُ گارڈ آنی واستہ 10 رننگ روم آنی نوک کنگ ءِ کار فروری ءَ تاں سرجم کنگ بیت ءُ اسٹاف کوارٹر آنی نوک کنگ ءُ سکھر، لودھران ءُ روہری اسٹیشن آنی اپ گریڈیشن ءِ سر ءَ 800ملین کلدار ھرچ کنگ بیت۔ نگرانی ءَ را مھکم کنگ ءِ واستہ راولپنڈی ریلوے اسٹیشن ءَ 180سی سی ٹی وی کیمرہ ایر کنگ بیت۔ کرپشن، ڈیزل دُزی، بوگس الاٹمنٹ، ماضی ءِ کارمند ءُ بے ٹکٹیں سفر ءِ ھلاپ ءَ کار کنگ ءِ ھاترا وجیلنس ڈیپارٹمنٹ ھم چالو کنگ بوتگ۔