کشمیر ءِ سیاہیں روچ ءِ درگت ءَ راجی اسمبلی ءِ اسپیکر سردار ایاز صادق ءِ کلوہ

اسلام آباد۔26اکتوبر  (اے پی پی):راجی اسمبلی ءِ اسپیکر سردار ایاز صادق ءَ گوشت کہ 27اکتوبر ھندوستان ءِ کشمیر ءِ غصب گیریں قبضہ ءُ کشمیری الس ءِ سر ءَ بیوکیں زلم ءُ زوراکی آناں پدر کنگ ءِ روچ انت۔ اکتوبر 1947 ءَ ھندی لشکر سری نگر ءَ اتک ءُ جموں ءُ کشمیر ءِ ناجائزیں وڑے ءَ قبضہ کنگ ءِ گندی کوشست کت۔ راجدپتر ءَ را ہندوستان ءِ اے گامگیج مدام سیاہیں باب ءِ رنگ ءَ یات بیت۔ یک شمبے ءِ روچ ءَ کشمیر ءِ سیاہیں روچ ءِ درگت ءَ وتی کلوہ ءِ تہ ءَ اسپیکر راجی اسمبلی ءَ گوشت کہ وت واجئی ءِ ھک کشمیری راج ءِ بنیاتی ءُ ناگزیریں ھک اِنت، ایشی ءِ واستہ کشمیری راج ءَ مزنیں قربانی داتگ۔ آئی ءَ گوشت کہ بھارت ءَ زلم ءُ زوراکی ءِ وسیلگ ءَ اے ھک ءِ ھلاسی ءِ واستہ ھمک رنگ ءِ کوشست کتگ، بلے کشمیری الس ءِ جزم ءُ مھکمی ءَ را نزور کنگ نہ بوتگ۔ سردار ایاز صادق ءَ گوشت کہ 5اگست 2019 ءَ بھارت ءِ نیمگ ءَ چہ آرٹیکل 370 ءُ 35-اے ءِ ناجائزیں رد کنگ کشمیری آناں وتی منفردیں پجار ءُ زمین ءَ چہ زبھر کنگ ءِ پدریں کوشست بوتگ کہ اے میاں اوستمانی کانود ءُ اقوام متحدہ ءِ قرارداد آنی ھاسیں ھلاپ ورزی اِنت۔ اے گامگیج کشمیری راج ءِ نیمگ ءَ سرجمی ءَ رد کنگ بوتگ اَنت۔ اسپیکر سردار ایاز صادق ءَ گوشت کہ پاکستان کشمیری راج ءِ وت واجئی ءِ ھک ءِ سرجمی ءَ کمک کنت ءُ ھمک پڑ ءَ سیاسی، سفارتی ءُ اخلاقی کمک ءَ دیم ءَ کنت۔ کشمیر ءِ آجوئی ءِ تحریک ءِ شہید ءُ راہشون آناں ستا کنان ءَ آئی ءَ گوشت کہ آھانی قربانی راجدپتر ءَ زرین آب آنی تہ ءَ یات کنگ بنت۔ آئی ءَ گوشت کہ کشمیر ءِ جیڈھ بھارت ءِ بھر ءُ بانگ ءِ یک نا سرجمیں ایجنڈا انت ءُ پڑ ءَ دائمی امن ءِ واستہ المی انت کہ اے جیڈھ اقوام متحدہ ءِ قرارداد ءُ کشمیری الس ءِ واھشت آنی رد ءَ گیش ءُ گیوار کنگ بہ بیت۔ آئی ءَ گوشت کہ گوستگیں روچاں اقوام متحدہ ءِ 80 سالی روچ مراگش کنگ بوتگ ءُ میاں اوستمانی براتی اقوام متحدہ ءِ امن ءُ جیڈھ آنی گیواری ءِ میکانزم ءَ را موثر ءُ مھکم جوڑ کنگ ءِ سر ءَ زور دیگ ءَ انت تانکہ فلسطین، غزہ ءُ مقبوضہ جموں ءُ کشمیر ءِ وڑیں دیریں جیڈھ آناں ایمنی ءِ گوما گیواری کنگ بہ بیت۔ راجی اسمبلی ءِ سروک ءَ گوشت کہ نوں وھد انت کہ میاں اوستمانی براتی اے عمل ءَ را ترند بہ کنت ءُ اقوام متحدہ ءِ سلامتی کونسل ءِ قرارداد آنی سر ءَ عمل کنگ ءَ را دل یکیمی بہ کنت تانکہ جھان ءُ دمگی امن برجائی بنیات آنی سر ءَ جوڑ کنگ بہ بیت۔ سردار ایاز صادق ءَ وتی کلوہ ءِ تہ ءَ میاں اوستمانی براتی ءَ گوں دزبندی کتگ کہ آ کشمیری الس ءِ وت واجئی ءِ ھک ءِ کمک ءَ وتی جوانیں کرد ءَ پیلو بہ کنت ءُ مقبوضہ کشمیر ءَ انسانی ھک لگتمالی آنی سر ءَ زوت نوٹس بہ زوریت۔