وفاقی وزیر دفاع خواجہ محمد آصف ءِ گشگ انت کہ پاکستان ءُ اوگانستان ءِ نیام ءَ دائمی امن ءِ واستہ یک سرجمیں ضابطہ اخلاق ءِ جوڑ کنگ المی انت

سیالکوٹ۔25اکتوبر  (اے پی پی):وفاقی وزیر دفاع خواجہ محمد آصف ءَ گوشت کہ پاکستان ءُ اوگانستان ءِ نیام ءَ دائمی امن ءِ واستہ یک سرجمیں ضابطہ اخلاق ءِ جوڑ کنگ المی اِنت تانکہ دوئیں ملک یکے دومی ءِ احترام، ھمساھگی ءُ اسلامی براتی ءِ رھبندانی سر ءَ بنیات ءَ بہ مان اَنت۔ پاکستان ھچ راج ءِ ھلاپ نہ اِنت بلکیں امن، براتی ءُ کمک لوٹ اِیت۔ بلے نوں وھد اتکگ کہ اے سیادی نظم ءُ ضبط ءُ یکے دومی ءِ ذمہ واری ءِ بنیاد ءَ منظم کنگ بہ بیت دانکہ چاگردی ءُ معاشی توازن برجاہ بہ بیت۔ اگاں گپ ءُ تران ءِ تہا تپاک کنگ بوتگیں شرت پاکستان ءِ نپ ءُ سیت ءِ تہا بہ بنت گڈا امن ءِ قول ممکن انت ۔ اے ھیالانی درشانی آئی ءَ سیالکوٹ ءَ میڈیا ءَ گوں تران کنان ءَ کت۔ خواجہ محمد آصف ءَ گوشت کہ گوستگیں چار ءُ پنچ روچ ءَ چہ ملک ءَ ناشرکاری ءِ ھچ وڑیں نا شریں وئیل نہ بوتگ، قطر ءَ ھما چیز ءِ سر ءَ تپاک کنگ بوتگ ایشی ءِ سر ءَ عمل کنگ بوھگ ءَ اِنت۔ آئی ءَ گوشت کہ پاکستان اے وھد ءَ بھارتی پراکسی جنگ ءِ دیمپانی ءَ انت، ءُ بژن ءِ گپ ایش انت کہ اوگانستان بھارتی پراکسی ءِ بستار ءَ مئے ھلاپ ءَ کارروائی کنگ ءَ انت۔ آئی ءَ گوشت کہ اللہ تعالیٰ ءِ فضل ءُ کرم ءَ پاکستان اے سازش آنی گوما سر ءُ سر ءَ جنگ ءَ انت ءُ راج ءَ را اللہ تعالیٰ ءِ کمک ءِ سر ءَ سرجمیں ایمان است انت۔ وفاقی وزیر دفاع ءَ قطر ءُ ترکی ءِ وڑیں براتیں ملک آنی سفارتی ثالثی ءَ را ساڑاتگ ءُ گوشت کہ آوانی دلجمیں کوشست آنی سبب ءَ گپ ءُ تران ءَ جوانیں دیمروئی ءِ موہ پیداک بوتگ اَنت۔ آئی ءَ گوشت کہ گپ ءُ تران ءِ وھد ءَ من دیست کہ اوگانستان ایمنی لوٹ ایت ۔ خواجہ محمد آصف ءَ گوشت کہ پاکستان ءَ چل سال ءَ چہ گیش اِنت کہ اوگان پناہ گزین آناں میزبانی کتگ ءُ مرچی ھم سرجمیں ملک ءَ نزیک ءَ چار ملین اوگان نندوک اَنت کہ آھانی بازیں نسل ادا مزن بوتگ اَنت۔ ہما کہ مئے گوں گپ ءُ تران ءَ انت آ ہم پاکستان ءَ مزن بوتگ انت۔ آئی ءَ گوشت کہ اوگان آنی گیشتریں بہر ءَ را دائمی نندگ ءِ بستار نیست ءُ لھتیں ءَ دمگی کاروبار ءُ روزگار ءِ شوبگ آنی سر ءَ ھاسیں اثر داتگ۔ آئی ءَ گوشت کہ چار دہائی ءَ چہ مہمانداری ءِ درشان کنوکیں راج ءِ بدل ءَ ناشرکاری یا تخریب کاری ءِ حمایت کنگ انتہائی افسوس ءِ گپ اِنت، پمیشکا نوں یک ھاسیں ضابطہ اخلاق ءُ وت مہ وتی احتساب ءِ میکانزم ءِ ضلورت اِنت تانکہ پاکستان ءُ اوگانستان امن ءُ احترام ءِ تہ ءَ زندگ بہ بنت۔ آئی ءَ گیش گوشت کہ اے سیادی ءَ را زمہ واری ءُ نظم و ضبط ءِ گوما دیم ءَ برگ بیت ءُ سیادی داروکیں ادارگ آنی گوما ھمگرنچی ءِ وسیلگ ءَ اے درگت ءَ عملی گامگیج چست کنگ بیت۔ ایشی ءَ چہ پیسر وفاقی وزیر دفاع خواجہ محمد آصف ءَ سرکاری سردار بیگم ٹیچنگ ہسپتال ءِ تر ءُ تاب کتگ ءُ آئی ءِ نوکیں ماڑی ءِ بنگیج کتگ۔ اے موہ ءِ سر ءَ آئی ءَ گوشت کہ اسپتال ءِ نوکیں ماڑی ءُ نوکیں آسراتی شرپ ءُ شرپ ءِ رنگ ءَ تیار کنگ بوتگ انت بلے کارندہ ءُ طبی تربیت یافتہ پیشہ ور آنی دست نہ کپگ جیڈھ ءِ سبب انت۔ آئی ءَ گوشت کہ بریفنگ ءَ آئی ءَ را گوشگ بوتگ کہ گوستگیں یک سال ءِ تہ ءَ بیست ءُ دو پروفیسر ءُ ڈاکٹر لاہور ءَ دیم دیگ بوتگ انت ایشی ءَ چہ دمگی طبی ازمت آناں تاوان رسیت۔ آئی ءَ گوشت کہ لھتیں ڈاکٹر لھتے روچ کار کن اَنت پدا لاہور ءَ واتر بنت، ایشی ءِ سبب ءَ نادراہ آناں مُدامی دوا ءُ درمان ءِ آسراتی نہ رس اَنت۔ اے رھبند نا منّگ بیت ءُ زوتیں اصلاحات ءِ ضلورت اِنت۔ وزیر دفاع ءَ سلاہ بندیں اُرد، پولیس ءُ ایندگہ سیکورٹی فورسز ءِ روح ءِ حوالہ ءَ اے جُست چست کتگ کہ اگاں فورسز ہما رویہ ءَ بہ زور اَنت کہ لھتے طبی کارندہاں زرتگ گڑا راج ءِ رکھینگ ءَ کئے کنت؟ آئی ءَ گوشت کہ ملک ءِ رکھینگ ءِ ھاترا دیم داتگیں سپاھیگ آناں وتی جان ندر کتگ، آھاں دگہ راہ نیست، پمیشکا ڈاکٹر ءُ طبی کارندہ آناں ھم وتی پیشہ ءَ گوں ھزمت ءِ روح ءَ دیم ءَ برگ لوٹ ایت۔ آئی ءَ اے گپ ءِ سر ءَ اپسوز کت کہ داں طبی کارندہ وتی ذمہ واری ءَ گوں سنجیدگی ءَ نہ زور اَنت لس مھلوک ءِ بھروسہ پدا زندگ نہ بیت۔