برطانوی ہائی کمشنر جین میریٹ ءَ پی آئی اے ءِ برطانیہ ءِ آسمان ءَ واتر بوھگ ءِ وش آتک کتگ

اسلام آباد۔25اکتوبر  (اے پی پی):برطانیہ ءِ ہائی کمشنر جین میریٹ ءَ پاکستان انٹرنیشنل ایئر لائنز ءِ برطانیہ ءِ آسمان ءَ واتر بوھگ ءَ را وش اتک کتگ کہ اے دوئیں ملک آنی نیام ءَ مھکمیں سیادی ءُ رابطہ ءِ تہ ءَ نوکیں سنگ میل ءِ نشان اِنت۔ شمبے ءِ روچ ءَ سوشل ءُ میڈیا پلیٹ فارمز ءِ سر ءَ وتی پیغام ءِ تہ ءَ برطانیہ ءِ ہائی کمشنر جین میریٹ ءَ پی آئی اے ءِ اے راجدپتری موہ ءِ توسیپ کت ءُ گوشت کہ مرچی 25اکتوبر ءَ پی آئی اے ءَ مانچسٹر ءِ بنداتی بالی گراب بندات کتگ۔ آئی ءَ پی آئی اے ءِ زندگ کنگ ءَ را یک جوانیں سنگ میل ءِ رنگ ءَ لیک اِتگ ءُ دوئیں ملک آنی کوشست آنی ستا کرتگ کہ ایشی ءَ چہ راجی ایئر لائن ءِ پدا آیگ ممکن بوتگ۔ آئی ءَ گوشت کہ اے نوکیں بالی رابطہ ءَ چہ پاکستان ءِ الس ءُ برطانیہ ءِ الس آنی نیام ءَ سیادی ءَ را گیش مھکم بیت۔ جین میریٹ ءَ گوشت کہ اسلام آباد ءَ چہ مانچسٹر ءِ بالی گراب ءَ چہ پاکستان ءُ برطانیہ ءِ سیادی آنی تہ ءَ نوکیں باب ءِ بنگیج انت۔ برطانیہ ءِ ہائی کمشنر ءَ گوشت کہ بالی رابطہ ءِ بحالی ءَ چہ تجارت ءُ سیل ءُ سواد ءِ تہ ءَ دیمروئی رسیت ءُ برطانیہ ءَ نندوکیں پاکستانی کمیونٹی ءِ واستہ سفر ءُ تر ءُ تاب آسان بیت۔ برطانوی حکام ءَ پی آئی اے ءِ سروکی ءِ ھم توسیپ کتگ ءُ گوشتگ کہ راجی بالی گراب برطانیہ ءِ ھوائی دمگ ءَ مزنیں ودار ءَ پد بالی گراب بندات کنگ ءِ واستہ سرجمی ءَ تیار اِنت۔