پی آئی اے ءَ مانچسٹر ءَ دیم پہ دیم بالی گراب بندات کتگ، اے دیمروئی پاکستان ءُ برطانیہ ءِ سیادی ءِ تہ ءَ راجدپتری سنگ میل اِنت، وزیر دفاع خواجہ محمد آصف ءِ گشگ اِنت

اسلام آباد۔25اکتوبر  (اے پی پی):حکومت ءِ مزنیں سوبمندی ءِ تہ ءَ پاکستان انٹرنیشنل ایئر لائنز ءَ اسلام آباد ءَ چہ مانچسٹر ءَ سرکاری رنگ ءَ براہ راست بالی گراب بندات کتگ، اے دیمروئی پاکستان ءِ ہوابازی ءِ صنعت ءُ برطانیہ ءِ گوما دو نیمگی سیادی آنی تہ ءَ راجدپتری سنگ میل اِنت۔ اولی بالی گراب ءِ بنگیج وفاقی وزیر دفاع خواجہ محمد آصف ءَ اسلام آباد ءِ میاں اوستمانی بالی پٹ ءَ برجم داشتگیں مزنیں مراگش ءِ تہ ءَ کت۔ اے موہ ءِ سر ءَ پاکستان ءَ برطانوی ہائی کمشنرجین میریٹ، سیکرٹری دفاع جنرل (ر) محمد علی، ڈی جی سول ایوی ایشن اتھارٹی (سی اے اے)نادر شفیع ڈار ءُ دفاع ءُ ایوی ایشن ءِ مزنیں کارندہ ساڑی اتنت۔ وزیر دفاع خواجہ محمد آصف ءَ مراگش ءَ گوں تران کنان ءَ گوشت کہ اے گامگیج راجی ادارگ آناں زندگ کنگ، سرکاری آسراتی آناں گہتر کنگ ءُ میاں اوستمانی تک ءَ پاکستان ءِ امیج ءَ را سہرا کنگ ءِ واستہ حکومت ءِ نیمگ ءَ چست کتگیں گامگیج آنی برجاہ اِنت۔ آئی ءَ گوشت کہ اسلام آباد ءَ چہ مانچسٹر ءَ براہ راست بالی گراب آنی بندات کنگ پاکستان ءُ برطانیہ ءِ نیام ءَ رابطہ ءِ نوکیں دور ءِ بندات انت ایشی ءَ چہ اود ءِ پاکستانی کمیونٹی ءَ را مزنیں آسراتی رس ایت۔ خواجہ محمد آصف ءَ اے موہ ءِ سر ءَ ڈی جی سی اے اے نادر شفیع در، ایوی ایشن ڈویژن، ءُ پی آئی اے انتظامیہ ءِ ھزمت آناں ساڑات ءُ گوشت کہ اے ھاسیں سوبمندی ایشانی بے مٹیں کار ءُ پیشہ وارانہ کارکردگی ءِ سبب ءَ ممکن بوتگ۔ آئی ءَ گوشت کہ اے دیمروئی حکومتی ءُ ادارگی کمک ءِ جوانیں حکمت عملی ءِ آسر انت۔ اسلام آباد ءَ چہ مانچسٹر ءَ دیم پہ دیم بالی گرابانی بندات پاکستان ءِ ہوابازی ءِ صنعت ءِ ھاتر ءَ یک راجدپتری دیمروئی یے کہ ایشی ءَ چہ دوئیں ملک آنی نیام ءَ تجارتی، سیل ءُ سواد ءُ دود ءُ ربیدگ ءِ سیادی گیش مھکم بنت۔