وفاقی کابینہ ءَ تحریک لبیک پاکستان ءِ سرا پابندی ءِ منظوری داتگ

اسلام آباد۔23اکتوبر  (اے پی پی): وفاقی کابینہ ءَ ناشرکاری ءُ زوراکی ءِ کارانی تہ ءَ ھوار بوھگ ءِ سبب ءَ انسداد ناشرکاری ایکٹ ءِ چیر دستی ءَ تحریک لبیک پاکستان ءِ سر ءَ پابندی ءِ منظوری داتگ۔ پنچ شمبے ءِ روچ ءَ وفاقی کابینہ ءِ دیوان ءَ پد جاڑی بوتگیں بیان ءِ رد ءَ تہی کارانی وزارت ءَ پنجاب حکومت ءِ لوٹ ءِ سر ءَ ٹی ایل پی ءِ سر ءَ بندش ءِ واستہ وفاقی کابینہ ءَ سمری پیش کتگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ وفاقی کابینہ ءَ را ملک ءَ ٹی ایل پی ءِ زوراکی ءُ ناشرکاری ءِ کار آنی بابت ءَ سرپدی دیگ بوتگ۔ پنجاب سرکار ءِ مزنیں افسراں ویڈیو لنک ءِ وسیلگ ءَ گند ءُ نند ءَ بہر زرتگ۔ دیوان ءَ ممنوعہ تنظیم ءِ زوراکی ءُ آشوبی چست ءُ ایراں چہ سرپد کنگ بوت۔ دیوان ءَ ھال دیگ بیت کہ اے گل کہ چہ 2016 ءَ جوڑ بوتگ، سرجمیں ملک ءَ زوراکی ءَ را گیش ءُ گیوار کتگ ءُ اے گل ءِ سوب ءَ ملک ءِ جتا جتائیں دمگاں زوراکی ءِ وئیل بوتگ اَنت۔ کابینہ ءَ را ھال دیگ بیت کہ 2021 ءَ ھما وھد ءِ سرکار ءَ ٹی ایل پی ءِ سر ءَ ھم بندش جتگ ات کہ 6 ماہ ءَ پد اے شرط ءِ سر ءَ ھلاس کنگ بوتگ ات کہ ملک ءَ دگہ ناامنی ءُ زوراکی ءِ کارروائی کنگ مہ بنت۔ اے گل ءِ سر ءَ بندش ءِ سبب ھم 2021 ءَ داتگیں ضمانتانی رد کنگ اِنت۔پیش ءَ سیکورٹی کارندہ ءُ بے گناھیں راہ گوز ٹی ایل پی ءِ زوراکی ءِ زھرشانی ءُ جلسہانی تہ ءَ بیران بوتگ اَنت۔ وسیلگ ءِ رد ءَ وفاقی کابینہ ءَ دیوان ءَ داتگیں بریفنگ ءُ پنجاب سرکار ءِ سفارش ءَ پد یکوئی ءَ اے گپ ءِ سر ءَ ھلاس کتگ کہ ٹی ایل پی ناشرکاری ءُ زوراکی ءِ کارانی تہ ءَ  دست مانجن  اِنت۔