نائب مزن وزیر ءُ درئی کارانی وزیر سینیٹر  محمد اسحاق ڈار ءَ گوشت کہ پاکستان اقوام متحدہ ءِ منشور ءِ مول ءُ مراد امن، انصاف ءُ دیمروئی ءِ سرجمیں رنگ ءَ حمایت کنت ءُ کثیر جہتی نظام ءَ را گیش شمولیت، نمائندگی ءُ موثر جوڑ کنگ ءِ واستہ وتی جوڑیشتی کرد ءَ را برجاہ دار ایت

اسلام آباد۔23اکتوبر  (اے پی پی):نائب مزن وزیر ءُ درئی کارانی وزیر سینیٹر محمد اسحاق ڈار ءَ گوشت کہ پاکستان اقوام متحدہ ءِ منشور ءِ مول ءُ مراد امن، انصاف ءُ دیمروئی ءِ سرجمیں حمایت ءَ کنت ءُ کثیر جہتی نظام ءَ را گیش ھوار، نمائندگی ءُ کارآمد جوڑ کنگ ءِ واستہ وتی جوڑیشت ءِ کرد ءَ را برجاہ دار ایت۔ اے ھیالانی درشانی آئی ءَ پنچ شمبے ءِ روچ ءَ محل ءَ اقوام متحدہ ءِ روچ ءِ موہ ءَ برجم داشتگیں مراگش ءَ گوں گشتانک دیان ءَ کت۔ اے موہ ءِ سر ءَ اقوام متحدہ ءِ ریذیڈینٹ کو آرڈینیٹر محمد یحییٰ، چیئرمین سینیٹ سینیٹر سید یوسف رضا گیلانی،  ڈپٹی سپیکر قومی اسمبلی سید میر غلام مصطفیٰ شاہ،  جتاجتائیں ملک آنی سفیر ءُ مزنیں کارندہ ھم ساڑی اتنت۔ درئی کارانی کارگس ءِ نیمگ ءَ جاڑی بوتگیں بیان ءِ رد ءَ نائب مزن وزیر ءُ دری کارانی وزیر اسحاق ڈار ءَ گوشت کہ اقوام متحدہ ءِ 80 سالی روچ جہانی امن، انصاف ءُ انسانی دیمروئی ءِ واستہ یکجائی ءِ عزم ءِ علامت انت۔ آئی ءَ گوشت کہ اقوام متحدہ ءَ اے وھد ءَ چیلنج آنی دیم ءَ انت، نابرابری گیش بوھگ ءَ انت، میاں اوستمانی ادارگ آنی سر ءَ بھروسہ ھم نزور بوھگ ءَ انت۔ آئی ءَ گوشت کہ جموں ءُ کشمیر ءُ فلسطین ءَ دیراں چہ استیں جیڈھ یک یات ءِ انت کہ وت واجئی ءِ ھک ءُ انصاف ءِ وعدہ انگت ءَ سرجمی ءِ ودار ءَ انت۔ آئی ءَ گوشت کہ پاکستان اقوام متحدہ ءِ امن مشن آنی تہ ءَ سرگرمیں شریک انت ءُ یونموجیپ ءِ میزبانیں ملک ءِ بستار ءَ خطہ ءَ امن ءِ واستہ وتی بے مٹیں کمک ءَ را برجاہ دارگ ءَ انت۔ آئی ءَ گوشت کہ پاکستان کہ اے وھد ءَ سلامتی کونسل ءِ غیر دائمی باسک انت، جھان ءِ امن، انصاف ءُ کثیر نیمگی کمک ءِ دیمروئی ءِ واستہ توامیں باسکیں ملک آنی گوما کار کنگ ءَ انت۔ آئی ءَ گوشت کہ جولائی 2025ءَ پاکستان ءِ اقوام متحدہ ءِ صدارت ءِ وھد ءَ سلامتی کونسل ءِ قرارداد ءِ یکوئی ءَ را منظوری پاکستان ءِ جیڈھ آنی پرامن گیواری ءَ را جھان ءِ سفارتکاری ءِ مرکز جوڑ کنگ ءِ جزم ءِ درشان اِنت۔ آئی ءَ اقوام متحدہ ءِ سیکرٹری جنرل ءِ سروکی ءَ برجاہیں کوشست آناں ساڑات ءُ گوشت کہ اے گامگیج ادارگ ءَ را گیش شفاف، کارآمد ءُ نوکیں دور ءِ لوٹ آنی رد ءَ جوڑ کنگ ءِ وھد ءُ پاس ءِ کوشست انت۔ آئی ءَ گوشت کہ اقوام متحدہ ءِ بنیاتی مینڈیٹ ھاسیں رنگ ءَ میاں اوستمانی امن ءُ ایمنی ءِ برجائی ءُ جیڈھ آنی گر ءُ دار ءَ را بجٹ یا مالی ھیال آنی سبب ءَ نزور کنگ مہ بیت بلکیں اے گامگیج آناں گیش مھکم کنگ وھد ءِ ضلورت اِنت۔ آئی ءَ گوشت کہ دیمروئی کنوکیں ملک آنی اولویت ھاسیں رنگ ءَ 2030ءِ برجمیں دیمروئی ءِ مول ءُ مراد اقوام متحدہ ءِ ایجنڈا ءِ مرکزی گولائی  بہ بنت۔ نائب مزن وزیر ءَ گوشت کہ پاکستان یک انچیں جھان ءِ نظام ءِ لوٹ ایت کہ ایشی ءِ بنیات ءَ کمک، شمولیت ءُ ایمنی ءِ گوما ھوار بہ بیت، ایشی ءِ تہ ءَ من یونائیٹڈ نیشنز ھوار اِنت۔ آئی ءَ اقوام متحدہ ءِ منشور ءِ مول ءُ مراد امن، دیمروئی ءُ درستیں انسان آنی شرپ ءِ سر ءَ پاکستان ءِ بے مٹیں عزم ءِ پدا زور دات۔