وفاقی وزارت داخلہ ءُ منشیات ءِ کنٹرول ءُ برطانوی ہائی کمیشن ءَ ’سینٹر آف ایکسیلنس‘ ءِ بنگیج

اسلام آباد۔23اکتوبر  (اے پی پی): وفاقی وزارت داخلہ ءُ منشیات ءِ کنٹرول ءَ برطانوی ہائی کمیشن ءِ کمک ءَ اسلام آباد ءَ ’’سینٹر آف ایکسیلنس‘‘ ءِ سرکاری رنگ ءَ بنگیج کتگ۔ اے موہ ءِ سر ءَ تہی کارانی وزیر مملکت طلال چوہدری ءُ برطانیہ ءِ ہائی کمشنر جین میریٹ ساڑی ات۔ مراگش ءَ گوں گشتانک دیان ءَ وزیر مملکت طلال چوہدری ءَ گوشت کہ نوکیں سینٹر آف ایکسیلنس ءَ چہ میاں اوستمانی جرم ءِ تہ ءَ کمک ءَ را مھکم کنگ، ٹرانس نیشنل آرگنائزڈ کرائم ءِ ھلاپ ءَ نوکیں پسو آنی دیمروئی ءُ ادارگی ھمگرنچی ءَ را دیمروئی دیگ ءِ واستہ ھاسیں کرد پیلو کنت۔ آئی ءَ گوشت کہ اے مرکز یوکے پاکستان اپ اسکیل پروگرام ءِ چیر دستی ءَ جوڑ کنگ بوتگ۔ آئی ءَ گوشت کہ مرکز ءِ پائلٹ مرحلہ ءِ وھد ءَ باہمی قانونی کمک ءِ کیس آنی کارروائی ءِ تہ ءَ 400درسد گیشی ریکارڈ کنگ بوتگ، وھدیکہ حوالگ ایکٹ ءِ تہ ءَ آرگ بوتگیں اصلاحات آنی سبب ءَ کیس آنی ٹائم لائن ءَ را نزیک ءَ یک سال ءِ کمی ءِ گمان اِنت۔ طلال چوہدری ءَ گیش گوشت کہ مرکز ءِ تہ ءَ گیشی ءِ گوما میاں اوستمانی کمک سیکشن ءَ را یک بالیگ ءِ درجہ دیگ ءَ چہ ایشی ءِ کارندہ ءُ ڈھانچہ ءِ تہ ءَ مزنیں گہتری آرگ بوتگ۔ آئی ءِ رد ءَ سینٹر آف ایکسیلنس ڈیجیٹل وژن ءُ جھان ءِ کمک ءِ نیمگ ءَ یک ھاسیں گامگیج اِنت ایشی ءَ چہ میاں اوستمانی کانود نافذ کنوکیں ادارگ آنی گوما پاکستان ءِ ھمگرنچی ءَ را گیش مھکم کنگ بیت۔ مراگش ءَ گوں گشتانک دیان ءَ برطانیہ ءِ ہائی کمشنر جین میریٹ ءَ گوشت کہ نوکیں دگنیا ءَ جرم ءِ ھچ سیمسر نہ زانت، سینٹر آف ایکسیلنس پاکستان ءُ برطانیہ ءِ نیام ءَ مھکمیں شریکی ءُ یکجائی وژن ءِ مزنیں مثال اِنت۔ وزارت داخلہ ءِ رد ءَ مرکز ءِ تہ ءَ گلوبل پارٹنر آنی گوما صلاحیت سازی، تربیت ءُ میاں اوستمانی معیار آنی گوما یکوئی ءَ را دل یکیمی کنگ بیت، ایشی ءَ چہ پاکستان ءِ منشیات ءُ اینٹی کرائم ءِ نظام ءَ را نوکیں لیکہ آنی سر ءَ جوڑ کنگ ءَ کمک رسیت۔