پاکستان ءُ پولینڈ ءِ نیام ءَ تجارت، توانائی، بنیاتی ڈھانچگ، دیمپانی، ناشرکاری گر ءُ دار، سائنس ءُ ٹیکنالوجی ءُ وانگ ءُ زانگ ءِ پڑ ءَ دو نیمگی کمک ءَ را گیش کنگ ءِ سر ءَ تپاک کنگ بوتگ، نائب مزن وزیر اسحاق ڈار پولینڈ ءِ ھمکار ءِ گوما پریس کانفرنس ءَ گوں تران

اسلام آباد۔23اکتوبر  (اے پی پی): نائب مزن وزیر ءُ دری کارانی وزیر اسحاق ڈار ءَ وتی پولینڈ ءِ ھمکار ءِ پاکستان ءِ تر ءُ تاب ءَ را المی لیک اِتگ ءُ گوشت کہ دوئیں ملک آنی نیام ءَ ڈل ءِ تک ءِ گپ ءُ تران ءِ ساھت ءَ دوئیں نیمگ ءَ کمک ءَ را گیش کنگ ءِ سر ءَ تپاک کنگ بوتگ۔ پنچ شمبے ءِ روچ ءَ درئی کارانی کارگس ءَ پولینڈ ءِ نائب مزن وزیر ءُ درئی کارانی وزیر راڈوسلا سکورسکی ءِ گوما پریس کانفرنس ءَ گوں تران کنان ءَ آئی ءَ گوشت کہ ڈل ءِ تک ءَ گپ ءُ تران ءِ ساھت ءَ پولینڈ ءِ ھمکار راڈوسلا سکورسکی ءُ پولینڈ ءِ ھمکار ءَ پاکستان ءُ پولینڈ ءِ نیام ءَ دو نیمگی سیادی آنی سر ءَ چار ءُ تپاسی کت۔ نائب مزن وزیر محمد اسحاق ڈار ءَ گوشت کہ مئے دو نیمگی تجارت ءِ کساس یک ارب ڈالر ءَ چہ گیش اِنت ءُ دوئیں نیمگ ءَ اے گپ ءِ سر ءَ تپاک کنگ بوت کہ تجارت ءُ اقتصادی کمک ءَ را گیش وسعت دیگ ءِ بے دروریں گنجائش است اِنت۔ آئی ءَ گوشت کہ پاکستان ءُ پولینڈ ءِ نیام ءَ تجارت، توانائی، بنیاتی ڈھانچگ، دیمپانی، ناشرکاری ءِ ھلاپ ءَ جنگ، سائنس ءُ ٹیکنالوجی ءُ وانگ ءُ زانگ ءِ ھوالگ ءَ دو نیمگی کمک ءَ را گیش کنگ ءِ سر ءَ تپاک بوتگ۔ نائب مزن وزیر محمد اسحاق ڈار ءَ جموں ءُ کشمیر ءِ دیریں جیڈھ ءُ فلسطین ءِ جیڈھ ءَ را اقوام متحدہ ءِ قرارداد آنی رد ءَ گیش ءُ گیوار کنگ ءِ ضلورت ءِ سر ءَ زور پر دات۔ آئی ءَ گوشت کہ دوئیں ملک آنی دری کارانی وزارت آنی نیام ءَ یک مفاہمت نامہ ءِ سر ءَ دستخط کنگ بوتگ ایشی ءِ مول ءُ مراد دوئیں ملک آنی نیام ءَ کمک ءَ را گیش دیمروئی دیگ اِنت۔ آئی ءَ گوشت کہ اسلام آباد ءَ انسٹی ٹیوٹ آف اسٹریٹجک اسٹڈیز ءُ پولینڈ ءِ انٹرنیشنل افیئرز ءِ ادارگ ءِ نیام ءَ کمک ءِ واستہ یک مفاہمت نامہ ءِ سر ءَ دستخط کنگ بوتگ۔ نائب مزن وزیر محمد اسحاق ڈار ءَ وتی پولینڈ ءِ ہم منصب ءَ را وش آتک کنان ءَ گوشت کہ اے آئی ءِ دومی پاکستان ءِ تر ءُ تاب اِنت، آئی ءَ پیسر ءَ 2011 ءَ پاکستان ءِ تر ءُ تاب کتگ ات۔آئی ءَ گوشت کہ پولینڈ ءِ نائب مزن وزیر دنیا ءِ اے دمگ ءَ ھچ وڑیں اجنبی نہ اِنت، آئی ءَ 1900 ءَ دمگ ءَ جنگی نمائندہ ءِ بستار ءَ کار کتگ۔ مزن وزیر محمد اسحاق ڈار ءَ گوشت کہ پاکستان پولینڈ ءِ گوما وتی سیادی ءَ را سک باز ارزشت دنت ۔ آئی ءَ پولینڈ ءِ آجوئی ءِ جہد ءَ را مثالی لیک اِتگ ءُ گوشتگ کہ پاکستان ءُ پولینڈ ءِ نیام ءَ یک انچیں راجدپتری سیادی یے است، دومی جھان جنگ ءِ وھد ءَ ھزاراں پولینڈ ءِ پناہ گیر آں  کراچی ءُ کوئٹہ ءَ پناہ گپتگ کہ مرچیگیں پاکستان اِنت۔ آئی ءَ پاکستان ءِ ھوائی دمگ ءِ برجائی ءَ پولینڈ ءِ پائلٹ ءُ انجینئر آنی کرد ءِ یات ءَ کت ءُ آوانی توسیپ کت۔ آئی ءَ گوشت کہ اے یکجائی راجدپتری چمشانک ءِ گوما پاکستان پولینڈ ءَ را دو نیمگی ءُ یورپی یونین ءِ تہ ءَ یک ھاسیں شریک ءِ رنگ ءَ گندیت۔ نائب مزن وزیر ءَ گوشت کہ مارا وشی بیت کہ پولینڈ ءَ نوں اقتصادی پیشرفت کتگ تانکہ ارباں ڈالر ءِ معیشت جوڑ بوتگ۔ آئی ءَ امیت سہرا کت کہ دوئیں ملک دو نیمگی سیادی ءَ را گیش مھکم کن اَنت ءُ کثیر نیمگی فورم آنی تہ ءَ کمک ءَ را برجاہ دار اَنت۔