مزن وزیر شہباز شریف ءَ روشن معیشت توان  پیکج ءِ جار ، صنعتی ءُ کشت ءُ کشاری ءِ شوبگ ءَ سئے سال ءِ واستہ گیشیں بجلی پجارینگ بیت کہ یک یونٹے 22.98کلدار اِنت

اسلام آباد۔23اکتوبر  (اے پی پی): مزن وزیر محمد شہباز شریف ءَ صنعت ءُ کشت ءُ کشاری ءِ دیمروئی ءِ واستہ روشن معیشت توان  پیکج ءِ جار جتگ ایشی ءِ رد ءَ آیوکیں سئے سال آنی تہ ءَ صنعت ءُ کشت ءُ کشاری ءَ را 22.98 کلدار ءِ رعایتی نیاد ءَ گیشیں بجلی پجاری کنگ بیت۔ پنچ شمبے ءِ روچ ءَ مزن وزیر محمد شہباز شریف ءَ صنعتی ءُ کشت ءُ کشاری شوبگ ءِ ماہرین ءُ کاروباری برات ءِ ڈل ءَ گوں گند ءُ نند ءَ اے پیکج ءِ جار جتگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءِ نیمگ ءَ جار جتگیں پیکج ءِ چیر دستی ءَ آیوکیں سئے سال (نومبر 2025 ءَ بگر داں اکتوبر 2028) ءِ واستہ صنعت ءُ کشت ءُ کشاری ءَ را رعایتی نیاد ءِ سر ءَ گیشیں بجلی پجاری کنگ بیت۔ مزن وزیر ءَ ڈل ءَ گوں تران کنان ءَ گوشت کہ صنعتی شوبگ ءَ 34کلدار ءُ کشت ءُ کشاری شوبگ ءَ 38 کلدار ءَ دستیابیں یونٹ آنی تہ ءَ سک باز کم کنگ بیت۔ یونٹ پجارینگ بنت، آیوکیں سئے سال آنی تہ ءَ سرجمیں سال ءِ واستہ صنعتی ءُ کشت ءُ کشاری شوبگ آناں 10کروڑ کلدار ءِ نیاد ءَ گیشیں بجلی پجارینگ بیت۔ 22.98 فی یونٹ ءِ سرا روشن یادو بجلی پیکج ءِ چیر دستی ءَ داتگیں بجلی ءِ بار ءَ نہ ملکی صارف ءُ نہ دگہ شعبہ ءِ سرا زور دیگ بیت۔ آئی ءَ اے پیکج ءِ جوڑ کنگ ءِ واستہ وفاقی وزیر برائے بجلی ءِ بہر ءُ بانگ سردار اویس لغاری ءُ آئی ءِ ٹیمب ءَ را مبارکی دات ءُ گوشت کہ ملک ءِ معیشت ءِ دیمروئی ءُ روزگار ءِ تہ ءَ گیشی ءِ واستہ صنعت ءُ کشت ءُ کشاری ءِ دیمروئی سک باز ارزشتی اِنت۔ خطہ ءِ تہا ملکی صنعت ءُ کشت ءُ کشاری شعبہ آنی رقابت ءِ تہا گیشی ءُ کاروباری آسراتی ءِ تہا گیشی ءِ ھاتر ءَ درستیں ممکنہ گامگیج کنگ بوھگ ءَ انت۔ مزن وزیر ءَ گوشت کہ گوستگیں سال ءِ زمستان ءَ داتگیں پیکج ءِ چیر دستی ءَ صنعتی ءُ کشت ءُ کشاری شوبگ ءَ 410گاواٹ ءِ گیشیں بجلی کارمرد کتگ ایشی ءَ چہ صنعت آناں دیمروئی رستگ، برآمدات ءِ تہ ءَ گیشی بوتگ ءُ روزگار ءِ موہ پیداک بوتگ انت۔ مزن وزیر ئَ گوشت کہ اقتصادی بحران ئَ چہ اقتصادی برجائی ءِ سفر یقینا گران ات، بلے اقتصادی ٹیمب ءِ محنت ئُُ ھمک مردم ءِ کمک ئَ اے ممکن بوت۔ آئی ءَ گوشت کہ صنعتی ءُ کشت ءُ کشاری ءِ شوبگ دیمروئی کت گڈا ملک ءَ را وام آنی تہ ءَ چہ آجو بیت۔ آئی ءَ جوانیں پالیشی آنی سبب ءَ اقتصادی اشارہ آنی تہ ءَ گہتری ءِ واستہ اللہ تعالیٰ ءِ شگر ءُ منت گپت ءُ گوشت کہ مارا درستاں یکجائی ءَ گیش محنت کنگی اِنت۔ مزن وزیر ءَ اے گپ ءِ سر ءَ باور سہرا کت کہ درست آنی کمک ءُ اقتصادی ٹیمب ءِ روچ پہ روچ محنت ءَ چہ پاکستان ءِ اقتصادی آجوئی ءِ مول ءُ مراد زوت سرجم کنگ بیت۔